Vafilipiya 4 - Bhiblia Yo Sawuleka

Milayo yo gwitisa

¹ Ngu kota yeto, vanathu vo randeka ngutu ni kunaveleka, anu mi ku litsako ni m'bhoti wangu, zumbani mi di tsani ka Mkoma, wo randeka ngutu.

² Na kombela ka Evhodhiya, na khongotela ka Sintike, ti to ve engisana ka Mkoma.

³ Na ku kombela nawe Siziku, mngana wangu wo thembeka ti to u txi va vhuna vamame va va nga lwa kumweko ni nani ka mhaka ya Evhangeli, va di ni Klemente ni vamwani vathumi kulothu, ava matina awe ma nga bhalwa dibhukuni ka wutomi.

⁴ Tsakani ka Mkoma yotshe mbimo! Na engeta ni mi gela: Tsakani!

⁵ Wunene wanu wu na ziwe ngu votshe vathu. Mkoma a hafuhi!

⁶ Mi nga karatekeni ngu txilo, vanathu, aniko mikombelo yanu yi na kombe minavelo yanu ni kubonga kwanu ka Txizimu.

⁷ Sekoko kuthutha ka Txizimu, kupindako wotshe wuzivi, ku na veketa timbilu tanu ni mialakanyo yanu ngu Kristu Jesu.

⁸ Vanathu, ngu kugwitisa, ni khani: Totshe ti i ku ta ditshuri, totshe ti i ku ta lisima, totshe ti i ku ta kululama, totshe ti ti dhundekako, totshe ti ti ku ni nduma ya yinene, totshe ti i ku ta mahanyelo amanene ni kudhumiseka, ngu toneto mi fanelako kuzumba mi txi ti alakanya.

⁹ Ati mi nga gonda ni ti mi nga ti amukela, ati mi nga tiengisa, ni ti mi nga ti wona kwangu, ngu ti mi fanelako ku ti maha. Txizimu txa kudikha txi nave ni nanu.

¹⁰ Ni tsakile ngutu ka Mkoma, ngu kuwa mi nga tshumela mi wuseta kukhatala kwanu ngu ngani; kha ditshuri mi ti ni khatalela, aniko mi ti si nga ni nzila yo komba kukhatala kwanu.

¹¹ Kha ni wombi tiya ngu mhaka ya kuhenya, nguko ni gondile kutsaka ngu tihi ni tihi ni manekako ni di ka tona.

¹² Na tiziva kuhanya ngu wusiwana, na tiziva kambe kuhanya ngu kuenelelwa. Ka yotshe mbimo ni ka otshe mahanyelo, ni gondile kudya ni txi khura, ni kuzumba ni si dyi txilo, kuhanya ngu kutalelwa mwendo kuxaniseka ngu kupwata.

¹³ Totshe na ti kota, ngu kutsaniswa ngu wule a ni ningako mtamo.

¹⁴ Hambi ti di ngeto, mi mahile ta tinene mi nga patana ni nani kuxanisekani kwangu.

¹⁵ Ma tiziva ta tinene, anu Vafilipiya, tito, kukhatani ka Evhangeli, mbimo yi ni nga khukha Makedhoniya, kuwalo dibanza ni da dimwedo di nga ti vhunana ni nani, amu ka kuninga ni mu ko amukela, hahanze kwanu kugwita.

¹⁶ Nguko hambi ku ni nga ti Tesalonika, mi ni rumete so ni vhuna ka si ni nga txi si pwata, i si nga kumweko dwe.

¹⁷ Hi nga ti to no vilela kuhiwa, aniko ni vilela ni m'hando wu wu no mi ninga dibhindu.

¹⁸ Ngu toneto, sotshe ni naso, so tala si sala. Ni taletwe ngu ku ni nga amukela manzani ka Epafrodhito asi mi nga ni rumela, matolo o bhumula ta tinene, mhamba yo amukeleka ni kutsakisa Txizimu.

¹⁹ Txizimu txangu, txi na mi ninga, ngu kutatiseka, sotshe si mi si vilelako, madingano ni kutala ka thomba ya txona ya kuphatima, ngu Kristu Jesu.

²⁰ Txi na dhumiswe Txizimu, Tate wathu, ngu malembe ni malembe, Amen.

Madingula o gwitisa

²¹ Ni dinguleleni vasawuleki votshe ngu ka Kristu Jesu. Vanathu va ku ni nani va mi dingula.

²² Vasawuleki votshe va mi dingula, ngutu-ngutu ava i ku va nyumba ya Khezari.

²³ Kateko ya Mkoma wathu Jesu Kristu yi nave ni mimoya yanu.