Vaefesu 6 - Bhiblia Yo Sawuleka

Vanana ni vaveleki

¹ Anu vanana, engisani vaveleki vanu, nguko eto ti lulamile masoni ka Mkoma.

² “Thava tate wako ni mame wako, ngu txona txirumo txo khata txi ku ni txithembiso,

³ kasiku u na kateka u txi hanya mbimo yo lapha ha mafuni.

⁴ Nananu vaveleki, mi nga henyiseni vanana vanu, aniko va kuliseni ngu ku va laya ngu sileleto ni tigondo ta Mkoma.”

Tikhumbi ni vanyamne va tona

⁵ Anu sithumi, engisani vanyamne vanu va ha mafuni, ngu txithavo ni kudhudhumela, na timbilu tanu ti di basile, kota nga mo engisa Kristu.

⁶ Mi nga va thumeleni dwe, ngako va txi mi wona, nga mo randa kutsakisa vathu, aniko aku mi ku sithumi sa Kristu, mahani kuranda ka Txizimu ngu yotshe mbilu.

⁷ Va thumeleni ngu lirando nga mo thumela Mkoma, i si nga kuthumela vathu.

⁸ Ma tiziva ti to m'thu ni m'thu a na ya amukela manzani ka Mkoma wotshe wunene wu a nga wu maha, hambi i di txithumi, hambi i di wo thuseka.

⁹ Nananu vakoma, mahisani toneto kwawe, mi txi leka ku va dhusetela, ngu kuziva ti to Mkoma wu i ku wawe ni wanu i mmweyo a ku nzumani, ni ti to ene kha yi ngu khohe.

Matxhari a mkristu

¹⁰ Ngu kugwitisa, zumbani mi di tsani ta tinene ka Mkoma, ni ka mtamo wakwe wu si tandwiko ngu txilo.

¹¹ Ti vhikeleni ngu matxhari a Txizimu, kasiku mi sikota kuxula siduko sa Sathani;

¹² nguko kha hilwi ni nyama ni mnoha, aniko hilwa ni mimoya yo biha yi ku txitimwi mpfhukani, ni tinduna, ni vafumi ni vakoma va va fumako ka ditiko diya da txidema.

¹³ Ngu toneto, xomani sivhikelo ni matxhari otshe a Txizimu, kufela ku mi sikota kubamba ka ditshiku do biha, se msana ka kuva mi di ti lulamisete, mi na sikota kutserama.

¹⁴ Emekani ngu kutsana. Sungani siwunu ngu ditshuri, di txi maha libhande lanu. Ambalani kululama ku txi maha txivhikelo txa khana yanu.

¹⁵ Mi txi ambala tikathula mikondoni kwanu, kasi kuya txhumayela Evhangeli ya kudikha.

¹⁶ Ngutu-ngutu tekani txitxhavangu txa likholo, i ku txi mi no vhika ngu txona siholoma sa mndilo sa m'bihi.

¹⁷ Amukelani kuhanyiswa ku txi maha txidgoko txanu ha msungo, se dipswi da Txizimu di txi maha ditxhari danu da Moya.

¹⁸ Mahani totshelele tiya na mi txi khongela, mi txi kombela kuvhunwa ngu Txizimu. Khongelani yotshe mbimo, nga ti Moya wu mi leletisako tona. Ngu konaho, zumbani mi di ti lulamisete, mi txi khongela mi si karali, mi txi kombelela vasawuleki votshe va Txizimu.

¹⁹ Nanani ni kombeleleni, kasiku Txizimu txi txi ni tula khana, mbimo yi ni lavako kugondisa, ti to ni sikota kuwombawomba, ni si thavi txilo, ni txi zivisa vathu txikungo txa Evhangeli;

²⁰ ayi ni ku muemeli wa yona kona kusungwani muwa; kasi ku ni sikota kuwombawomba ngu kutxhatxheka, nga ha ti fanelako kuva ni txhumayela.

Madingula o gwitisa

²¹ Kufela ku a ta mi zivisa mahungu angu ni ti ni thumako tona, ni mi rumela Tikiko, mwanathu wo randeka, ni kuthembeka mthumoni ka Mkoma, ene a na mi zivisa totshe.

²² Ngu toneto, ni m'rumelako kwanu, kasiku e ta mi gela ati hi ku ngu tona, kasi mi na mana kutsaniswa timbilu.

²³ Kudikha ni lirando li li ku ni likholo, si tako ngu ka Txizimu Tate ni ka Mkoma Wathu Jesu Kristu si nave ni vanathu.

²⁴ Makatekwa ma nave ni votshe va va randako Mkoma Wathu Jesu Kristu ngu lirando lo mbi onheka!