Sidilo 3 - Bhiblia Yo Sawuleka

Txitsayiso, kutisola ni kuthemba

¹ Ani ngani m'thu wu a nga wona kupandiseka ngu ndonga ya txiviti txakwe.

² A ni tekile e ni tsimbilisa txidemani i si nga ha liwoningoni.

³ Nguditshuri, ditshiku ni ditshiku a zumbete ku ni peka.

⁴ A kumbisile mmidi wangu ni didhowo dangu a txi funyetela ni marambu angu.

⁵ A ni randete, a txi ni dyisa tshiku ni tshani.

⁶ A ni zumbisile txidemani, kufana ni vathu va vangafa kale.

⁷ A ni sekete mkorani kasi ku ni si humi, a txi ni sungelela ngu titxhini to banga ngutu.

⁸ Hambi ni txi dila, ni kupeka huwa, ene kha amukeli mkombelo wangu.

⁹ A tsivetete tinzila tangu ngu marigwi o vatelwa, e gombonyekisela ni dibhudhula dangu.

¹⁰ Ene a ti mahile kwangu nga txikankanka txi ni zingelako, a txi nga ngonyamo yi ni baramelako.

¹¹ A jikisile tinzila tangu, a txi ti haxulela ngu sihango, e ni siya ni si vhuni txilo.

¹² A dombile wulaho wakwe a txi ni maha tshungameto ya lingove.

¹³ A ni thote mbilu ngu miseve a nga humisa ka mswapu wakwe.

¹⁴ Ni hundukile ni maha txisekiso hagari ka va ka kwathu dotshe ditshiku, va txi ni poyilela ngu tindando.

¹⁵ Txizimu txi ni khurisile ngu so bava, txi ni setile nyongwa ni za ni kosa.

¹⁶ Akunute makwasa angu ngu sirigwana, a txi ni fenengeta ngu dikhuma.

¹⁷ A rethete kule kudikha ka moya wangu, ni divala ni litsako.

¹⁸ Sekoko ani ni ti khani: “Wudhundo wangu wu lovile! Kumweko ni themba yangu ka Mkoma!”

¹⁹ Alakanya kuxaniseka kwangu ni kurerela kwangu, ngu txhefu ni nyongwa.

²⁰ Dihika dangu, ngu ditshuri da khumbula, se ni guma mtamo.

²¹ Hambiketo, siho simwani si ni si alakanyako ni txi si emela, asi ni si thembako i ku siya:

²² Wumbilu wa Mkoma, ngu wona wu mahako ti to hi si fuviswi; nguko wumbilu wakwe kha wu na magwito.

²³ Wumbilu wa Mkoma, wu woneka i di wa wuphya ka ditshiku ni ditshiku; kuthembeka kwako Mkoma nga hombe.

²⁴ Ni womba toneto, ni khani: Mkoma Txizimu i thomba yangu ngu toneto ni veka themba yangu kwakwe.

²⁵ Mkoma Txizimu ani wunene ka vale va mthembako, ka vathu vale va mlavako.

²⁶ Ndinene ngako m'thu a txi laphisa mbilu a txi verela ngu kuthutha tito, Mkoma a na muhulukisa.

²⁷ Ndinene ngako m'thu a txi gonda kurwala sikarato i di ngadi mphya;

²⁸ M'thu wu Txizimu txi nga mrweka sixaniso, a na ti ñole ekha a txi tsanisela;

²⁹ A na ti namise ngutu, mwendo a na thuka adi ningilwe kuthemba!

³⁰ A na dingetele dithama, ka wule a m'yamasako, a txi amukela ni kuruketelwa.

³¹ Nguko Mkoma kha na mbi mtshotsha da magwito.

³² Nguko hambi txi txi pfisa kupanda m'thu, txi na mpfela wusiwana madingano ni wuhombe wa wumbilu wa txona.

³³ Txizimu kha txi tsakeli kuveka hahatshi vathu mwendo ku va tisela makhombo.

³⁴ Kukandetela ngu mikondo Totshe tikhumbi ta ha mafuni;

³⁵ Kurethela didhawa tifanelo ta m'thu, masoni ka Nyatxitimwi;

³⁶ ni kugombonyekisa habanza, Mkoma kha lavi ni ku ti wona eto.

³⁷ I mani wule a nga wombako ti txi maheka kani? Ngako i si nga Mkoma a wombako kani?

³⁸ Ina hi nga ngu txisofuni ka Nyatxitimwi kuhumako wubihi ni wunene kani?

³⁹ Se m'thu wa kuhanya a vilela txani kani? Mmweyo ni mmweyo a na ti laye ngako a txi pekelwa sionho sakwe.

⁴⁰ A hi ti soleleni hi wonisisa tinzila tathu, se hi txi tshumelela ka Mkoma Txizimu.

⁴¹ A hi guleteni timbilu tathu ni manza hi txi phaxa ka Txizimu txa nzumani, hi txi khathu:

⁴² Hi ti lambisile hi kuonhela, awe Mkoma, ngu mhaka yeto, khwa hi divavela.

⁴³ Ha kupandisekani kwako, u hi baramete, u txi hi tovelisela ni ku hi dayela u si divaleli.

⁴⁴ U ti fenengetile ngu marefu, kasiku mkombelo wathu wu si kuhokeli.

⁴⁵ Hagari ka vamatiko u hi hundute hi txi maha nzambwa ya ha ditalani.

⁴⁶ Valala vathu votshe, va tute sisofu ve hi wukela.

⁴⁷ Kuthava ni diphala si wite txitimwi kwathu, va txi hi xasela ni ku hi lovisa.

⁴⁸ Maso angu ma theketa mirongo ku txi nga mnambo, nguko ku na hoka kuloviswa ka vathu va ka kwathu.

⁴⁹ Mirongo yangu yi na thekela wusiku ni mitshikari yi si emi,

⁵⁰ kala ka mbimo yile Txizimu txi no engisa, ni kuwona, kukhukhela nzumani!

⁵¹ Maso angu ma xanisa moya wangu, ngu mhaka ya votshe vanana vamahorana va didhoropani kwangu.

⁵² Valala vangu va ni xotile nga txinyana ni si nga ni mnandu;

⁵³ Va ni susumetete diphalani ni txi ngadi ni hanya, kambe va rinzetete marigwi tximwi kwangu.

⁵⁴ Ni bhwabhwamete matini se ni txi khani: Yowe, ni lovile.

⁵⁵ Ni dhani ditina dako Mkoma, ni ti hahatshi diphalani.

⁵⁶ U engisile dipswi dangu! U nga tsive nzeve yako kudilani kwangu, ni ka huwa yangu!

⁵⁷ Ditshiku dile ni nga kudhana, u tshuketile u txi ta khawe: “U nga thave.”

⁵⁸ Mkoma, u lwete moya wangu u txi tirula wutomi wangu.

⁵⁹ U ti woni awe Mkoma, a ti va ni xanisisa tona; lamula timhaka tangu.

⁶⁰ Otshe makungo awe a ku ti dihisela, ni kulwa ni nani u ma woni.

⁶¹ Awe Mkoma, sipoyilo sawe u si pfite ni makungo awe otshe a kulwa ni nani.

⁶² Mapswi ni silumbeto sa vale va ni vengako, sa ni xanisa, otshe masiku.

⁶³ Hi nga va wona, hambi va di khalahatshile, mwendo va di emile, ani ni ndando yawe.

⁶⁴ Awe u na va ninga hakhelo yawe, Mkoma, madingano ni mithumo ya manza awe.

⁶⁵ Awe u na va ninga kunavela ka mbilu, Mkoma, txiruko txako txi nawe txitimwi kwawe.

⁶⁶ Kuhenyani kwako Mkoma, u na va tovela, se vona va na loviswa hahatshi ka nzuma yako.