Rute 4 - Bhiblia Yo Sawuleka

Bhowazi a tekana ni Rute

¹ Se Bhowazi a to tsula habanzani, a txi ya khalahatsha kona; wona taku, awule wa mtiruli a nga ti wombawombile ngu ngene Bhowazi, a ti ti pinda, se a txi m'gela ku khene: “He mawe, ngono ngu kheno, se hi nga khalahatsha hawa.” Se a to jika a txi ya hale eya khalahatsha.

² Sekoko Bhowazi a to dhana digumi da vavamna hagari ka madhota a didhoropa, a txi khene: “Hi nga khalahatshani hawa.” Se vona va to khalahatsha.

³ Sekoko a to womba ka mtiruli, a txi khene: “Didhawa da thembwe yile i nga ti ti ya Elimeleki, mwanathu, a yi xavisile Nowemi, wule a nga wuya ngu ditikoni ka Mowabhi.

⁴ Se ani ni lavile ku kuzivisa mhakeyo, taku: Yi tekele masoni ka vazumbi va ditiko, ni masoni ka madhota a vathu vangu. Se ngako u txi lava ku yi tirula, yi tirule; aniko ngako u si ti lavi ku yi tirula, ni gele, kasiku ani ni txi tiziva, nguko kha nga ho mmwani wa ku yi tirula, hahanze kwako, se msana kwako, ngani.” Sekoko ene a to khene: “Ani ni na yi tirula.”

⁵ Aniko Bhowazi a to khene: “Ka ditshiku di u no teka thembweyo manzani ka Nowemi, u na teka kumweko ni Rute, wa ni Mowabhi, msikati wa mfi, kasi kuwusa ditina da mfi txitimwi ka thomba yakwe.”

⁶ Sekoko mtiruli a to khene: “Ani kha ni na mbi mtirula, kasiku ni si onheteli thomba yangu; yi tirule awe ka wukhalo wangu, nguko ani kha ni na mbi sikota ku yi tirula.”

⁷ Se txihena txiya txi ti ti ho ngu kale, ka Israyeli, txaku, ngako m'thu a txi lava kuleka thomba, a ti ti tsanisa mhaka ngu kuthavisa kathula, se a txi yi ningela ka mmwani; awuwa i ti ti wufakazi ditikoni ka Israyeli.

⁸ Mtiruli koko a to khene ka Bhowazi: “Yi amukele awe thombeyo, njako.” Se a to thavisa kathula.

⁹ Sekoko Bhowazi a to womba ka madhota ni ka votshe vathu, a txi khene: Mi tifakazi nyamsi taku ni amukete manzani ka Nowemi, sotshe sile si nga ti lumba Elimeleki, ni sa Kiliyoni, ni sa Mahaloni;

¹⁰ ni ti to kambe na amukela Rute, wa Mowabhi, i nga ti ti msikati wa Mahaloni, a txi maha msikati wangu, kasi kuwusa ditina da mfi, txitimwi ka thomba yakwe, kasiku ditina da mfi di si fuvi hagari ka vanawe, ni ha banza ka wukhalo wawe; ka tiya, nyamsi mi tifakazi.

¹¹ Se votshe vathu vale va nga ti ti ha banza, ni madhota, va to kha vona: Hi tifakazi; Mkoma a na mahe ti to awu wamsikati a wulelako nyumbani kwako, a txi fanana ni Rakeli ni Leya, avale ngu wumbidi wawe va nga aka nyumba ya ka Israyeli; kateka ngutu amu ditikoni ka Efrata, u txi maha wa ditina da nduma amu Bhetlehema.

¹² Se nyumba yako yi ne nga nyumba ya Farezi, (awule a nga velekwa ngu Tamari ditikoni ka Judha), ka liveleko li Mkoma a no kuninga ka dihorana diya.

¹³ Ngu kumhaka keto, Bhowazi a to amukela Rute, e maha msikati wakwe; se ene a to patana nayo, kambe Mkoma a to katekisa Rute a txi veleka mfana.

¹⁴ Sekoko vavasikati va to kha vona ka Nowemi: “A na dhumiswe Mkoma, a nga mbi leka ku kuninga mtiruli nyamsi, niku ditina dakwe di nave ni nduma ka Israyeli!

¹⁵ Ene a na va mmalateli wa moya wako, ni ku kuxayisa amu kukumbani kwako, nguko mane wako, awule a ku dhundako, a mvelekile, kambe Rute mbwa mnene kupinda mtxhanu wa vanana ni vambidi.”

¹⁶ Se Nowemi a to teka mwanana, a txi mkhutarela, e maha txikhonje txakwe.

¹⁷ Se vaakelani vakwe va txisikati va to mraya ditina, va txi kha vona: “Nowemi a veleketwe mwanana wa m'zambi.” Se ditina dakwe va to m'dhana ku i Obhedhi. Awuwa i tate wa Jese, tate wa Dhavhidha.

¹⁸ Tiveleko ta Farezi koko ngu tiya: Farezi a to veleka Esironi,

¹⁹ se Esironi a to veleka Aroni, se Aroni a to veleka Aminadhabhe,

²⁰ se Aminadhabhe a to veleka Nahasoni, se Nahasoni a to veleka Salimoni.

²¹ Se Salimoni a to veleka Bhowazi, se Bhowazi a to veleka Obhedhi,

²² se Obhedhi a to veleka Jese, se Jese a to veleka Dhavhidha.