Rute 1 - Bhiblia Yo Sawuleka

Elimeleki ni mwaya wakwe, ditikoni ka Mowabhi

¹ Se ku to maheka taku, ka masiku a kulamula ka valamuli, kuhumelela nzala ditikoni; se wamwamna wokari wa Bhetlehema ka Judha a to rura eya ditikoni ka Mowabhi, ene ni msikati wakwe, ni vanana vawe vavambidi va vafana.

² Wamwamna eyo ditina dakwe i ti ti Elimeleki, se ditina da msikati wakwe i ti ti Nowemi, se matina a vanana vakwe vavambidi vavafana, i ti ti Mahaloni ni Kiliyoni, va lihunzu la Efrata, ka Bhetlehema wa Judha; se va to ta aka ditikoni ka Mowabhi.

³ Se Elimeleki, mwamna wa Nowemi, a to fa; se Nowemi e sala ni vanana vakwe va vambidi va vafana,

⁴ ava va nga teka vasikati hagari ka Vamowabhi, se ditina da mmweyo i ti ti Orpa, ani ditina da mmwani, i ti ti Rute; va to zumba kona hafuhi ka digumi da malembe.

⁵ Se va to fa ni vona ngu wumbidi wawe, Mahaloni ni Kiliyoni, Nowemi e sala a di fetwe ngu vanana vakwe va vambidi, ni mwamna wakwe.

Kutshumelela Bhetlehema

⁶ Sekoko, ene a to khukha ditikoni ka Mowabhi ni vamane vakwe, nguko a ti engisile a di ditikoni ka Mowabhi, ati to Mkoma a endete vathu vakwe ngu kuvaninga sakudya.

⁷ Ti di ngeto, Nowemi a to khukha ka wukhalo wule a nga ti ti ka wona, ni vamane vakwe vavambidi. Se va to tshumelela ditikoni ka Judha,

⁸ Nowemi a to khene ka vamane vakwe vavambidi: Tsulani! Mmwani ni mmwani a na tshumelele m'tini ka mame wakwe; se Mkoma a na mi xayise ngu wunene, nga ti mi nga xayisisa tona avale va nga fa, kumweko ni nani!

⁹ Mkoma a na mahe ti to mmwani ni mmwani wanu e mana kuhumula nyumbani ka mwamna wakwe. Se mbimo yile ene a nga va pswopswa, va to guleta mapswi awe, ve dila,

¹⁰ se va txi m'gela tiya: “Lambi! Hi na tsula ni nawe ka va ka kwanu.”

¹¹ Aniko Nowemi a to khene: Tshumelani vanavangu; ngu kutxani mi no ni londeta kani? Ina mrumbuni kwangu ku ngadi ni vanana vo dingana ku ta va vamna vanu kani?

¹² Tshumelani vanavangu, ti tsuleleni, ani ni kumbile ngutu, kha ni na kutekwa kambe; hambi i di ku no khani: Ni na ni kuthemba, mwendo kumanana ni wamwamna wusiku wuwa, ni txi veleka vanana,

¹³ ina mi nga va rinzela kala va txi kula kani? Mi ndi na ti ñola mi si tekwi ngu vamwani vavamna kani? Ahim-him, vanavangu! Kuxaniseka kwangu nga hombe kupinda kwanu, nguko dianza da Mkoma di ni wuyisete wusiwana.

¹⁴ Sekoko va to engeta kuguleta mapswi awe, va txi dila; se Orpa a to pswopswa masale wakwe, e tshumelela ka va ka kwawe; aniko Rute a to londeta Nowemi.

¹⁵ Sekoko Nowemi a to khene: “Wona, mtekwakuloni a tshumelete ka va ka kwawe, ni ka sizimu sawe; tshumela na nawe, u mlondeta.”

¹⁶ Aniko Rute a to khene: U nga ni kurumete ti to ni kuleka, ni hambana ni nawe; nguko, ni hayi u no ya kona, nani ni na ya konaho, ni ha u no ya zumba kona wusiku wuwa, ni na ya zumba konaho; vathu vako, mbathu vangu, Txizimu txako, Njizimu txangu.

¹⁷ Ni hayi u no fela kona, ni na fela konaho nani, kambe ni na tshotshwa konaho; Mkoma a na ni rumele txitsayiso, ngako ni txi tumela kuhambaniswa ni nawe, ngako ni txi hambana ni nawe ngu yimwani mhaka, na i si nga ngu lifo.

¹⁸ Mbimo yile koko Nowemi a nga wona tito, Rute a tsanisile ku mlondeta, a to malala.

¹⁹ Ngu kumaha keto koko, va to tsula ngu wumbidi wawe, kala veya hoka Bhetlehema. Se ku to maheka taku, mbimo yile va nga txi wulela Bhetlehema, dotshe didhoropa di to xamala ngu mhaka yawe, va txi kha vona: “Ina hi nga Nowemi wuwa kani?”

²⁰ Aniko ene a ti ti va gela ku khene: “Mi nga ni dhaneni ku ni Nowemi; ni dhaneni ku ni Mara, nguko awu wa Mtamo-wotshe a ni ningile sixaniso sa hombe.

²¹ Ni tsute ni di taletwe, aniko Mkoma a ni wuyisa ni si nga ni txilo! Ngu kutxani koko mi no ni dhana ku Nowemi kani? Na kuve Mkoma a ni tshuralete, awu wa Mtamo-wotshe a ni xanisile ngutu.”

²² Ngu toneto, Nowemi a to wuya ni mane wakwe Rute, wa Mowabhi, a nga wuya ngu ditiko ka Mowabhi; se va to hoka Bhetlehema ngu mbimo yo khata kuelula sevhadha.