Ndando ya Tindando 7 - Bhiblia Yo Sawuleka

Dijaha

¹ Hi nga kutshura ka mikondo yako amu ka tikathula, awe dihorana da mfumeli! Tinyonga tako ti fana ni tidhayimani, to mahwa ngu manza a titxhari.

² M'dhende wako wu fana ni digombe da didangarita, di di si pwatekiko vhinya, ni mrumbu wako wu fana ni mmumbu wa fulaho, yo randelwa ngu siluva.

³ Titshumbu tako ta timbidi ti fana ni simhotyana simbidi sa mahasa.

⁴ Thamo yako yi fana ni mikhokhola yo akwa ngu makwasa a nzofu; maso ako ma fana ni mkole wa Hesibhoni, hafuhi ni txike txa Bhati-Rabhimi; thonvu yako yi fana ni mikhokhola ya Libhanoni, yi nga wonetela Dhamasku.

⁵ Msungo wako wu fana ni mmango wa Karmeli, ni misisi ya ha msungo kwako, nga disilika do bhilivhila; mfumeli a khotetwe ngu timbobo tako.

⁶ U tshurile ngutu, kambe wa navetisa, awe txirandwa, ngu kutsakisa!

⁷ Txiemo txako txi fanana ni txa mtxhese, ni titshumbu tako ti fana ni sizangwa sa mauvha.

⁸ Ni txi khani: Ni na kwela amu ka mndonga wa mtxhese, ni ya ñola madhavi a wona; sekoko titshumbu tako ti na fana ni sizangwa sa mivhinya, ni kubhumula ka kuhefemula kwako, ku na fana ni ka mahapula.

⁹ Se tshambelo yako yi fana ni vhinya ya yinene, ka txirandwa txangu, yi yi selwako ngu mkhatala, yi rithimukako sisofuni ka vale va otelako.

Muhorana

¹⁰ Ani ni wa txirandwa txangu, ni txona txa ni navela.

¹¹ Ngono, awe txirandwa txangu, a hi tsimbile thembweni, hi ya otela sidhoropanani.

¹² A hi wuke ni mixo hi ya mivhinyani, hi ya wona ti to mwendo mauvha ma veleka, mwendo siluva sa ona sa baleka, ni ku mwendo miromani yi mite, Koneyo ni na ya kuninga lirando langu la hombe.

¹³ Mandragora ma humisa kubhumula ka ona, ni sikenini kwathu ku ni mihando ya totshe tixaka, ya yiphya ni ya kale; yi ni ku xayiselako yona, awe txirandwa txangu.