Ndando ya Tindando 5 - Bhiblia Yo SawulekaDijaha 1 Nita thembweni kwangu, ndiyangu, txitekwa txangu; ni ta sengeleta mira ni tixakaxaka ta tingi ta sibhumutiso, ni dyite dihesa dangu ni wulombe wangu, ni sete vhinya yangu ni masi angu. Dyanani anu vangana, selani ngutu anu sirandwa. Vaembeleli Ndando ya wumune Muhorana 2 Ni ti otete, kambe mbilu yangu yi ti ti xaniseka, dipswi da txirandwa txangu txi pekako ditimba. A khene: Ni tulele ndiyangu, awe mndoni wangu, dituva dangu da ku ambi na dikhwiti, nguko msungo wangu wu nakani ngu mwando, ni misisi yangu yi nakani ngu mathotho a wusiku. Dijaha Muhorna 3 Ni ambute syambalo sangu, na si ambalisa kutxani kani? Ni sambile minenge yangu, na mahisa kutxani kutshumela ni yi nzihatisa kani? 4 Txirandwa txangu txi to wuletisa diwoko ngu ha ka ditshoko da ditimba, se mbilu yangu yi to nyawukelwa ngu lirando. 5 Se ni to wuka, ni ya tulela txirandwa txangu ku to nyuka mafura a mira manzani kwangu, ma txi thothoketa ngu titihoni kwangu, me nakanisa sikhweketo sa ditimba. 6 Ni to tulela txirandwa txangu, kambe a ti ti khukhile e tsula. Mhefemulo wangu wu to guma mtamo, mbimo yi ene a nga womba-womba ni nani; ni to mlava, kambe kha na mmana; ni m'dhani, kambe kha orovela. 7 Ni to manwa ngu vawoneleli, vale va nga tihorolokela didhoropani, va to ni peka, ve ni dayisa, vawoneleti va diguma va to ni tekela dibhaji dangu. 8 Anu mahorana a Jerusalema, na mi kombela, ti taku ngako mi txi mana txirandwa txangu, txi geleni ti taku nafa ngu lirando. Vaembeleli 9 Njitxani txi txirandwa txako txi pindako tximwani txirandwa txangu ngu txona, awe wo tshura ngutu hagari ka vavasikati kani? Txirandwa txako txi pinda vamwani ngu kutxani, koza u hi leleta to nga eto, kani? Muhorana 10 Txirandwa txangu njo tshura ngutu, txa txiemo txo tshura, txa teka m'jeke hagari ka 10.000. 11 Msungo wakwe wu fana ni nzalam yo hehuka ngutu, misisi yakwe yi laphile, ya mtima nga digwana. 12 Maso akwe ma fana ni a matuva hafuhi, hafuhi ni mnambo wa mati, ma txi kuwulwa ngu masi. 13 Mathama akwe ma fana ni ndima ya mipepo, kufana ni simangwana sa mwasi wo nungela; txisofu txakwe txi fanana ni makhoñwa di di dotako mafura a mira. 14 Mawoko akwe ma fana ni tiphera ta nzalama ti nga tshuriselwa ngu tidhayimani; mndani kwakwe kufana ni titxheho ta tshofu to tshulelwa ngu marigwi a safira. 15 Minenge yakwe yi fana ni tiphande ta marigwi, ti ti nga zimekwa txitimwi ka siparako sa nzalama yo hehuka; a wonekisa ku nga Libhanoni, ni wunene nga mikedhari. 16 Ka tsakisa kuwombawomba kwakwe ka kunene; ina, ene wa navetisa ngutu. Txirandwa txangu txi zumbisileto, kambe ngu toneto mngana wangu, Anu vanana vamahorana a Jerusalema, |
A Bíblia em Txitxopi © Bible Society in Mozambique, 2016.
Bible Society of Mozambique