Ndando ya Tindando 1 - Bhiblia Yo Sawuleka

¹ Ndando ya tindando, i ku ndando ya Solomoni.

Ndando yo khata Txiwutwa

² A na ni pswopswe ngu kupswopswa ka txisofu txakwe; nguko i txhuko lirando lakwe kupinda vhinya.

³ Mafura ako manene amu ko bhumula; ditina dako di fana ni mafura o tshakunutwa; ngu mhaka yeto timbiri ta kuranda.

⁴ Awe ni teke, hi na tutuma, hi kulondetela. Mfumeli a ni wuletile tinyumbani kwakwe. Hi na tsaka ngutu kwako, kambe hi na kutsakela; hi na alakanya lirando lako, kupinda vhinya; vo lulama va kuranda.

Vaembeleli Muhorana

⁵ Ani ni wa mtima, kambe ni tshurile, o anu mahorana a Jerusalema, ni fana ni matenda a Mikedhari, ni mijiyo ya nyumbani ka Solomoni.

⁶ Mi nga woneni ku ni ku ni mtima, nguko ditambo di woningile txitimwi kwangu. Tindiyangu ti ni henyete, se ti ni mahile muwoneleli wa tithembwe; thembwe yi yi ni lumbako kha na yi xayisa.

⁷ Ni gele, awe u randwako ngu mbilu yangu, ni kombe mu u dyiselako kona mtxhambi wako, ni mu u wu yisako kona ni mitshikari. Ngu kutxani ani ni xaniseka ni londetela mitxhambi ya vangana vako kani?

Muwuti

⁸ Ngako u si ti zivi, awe wo tshura ngutu hagari ka vavasikati, huma u londetela mikondo ya tinvuta u dyisa tiphongo tako hafuhi ni mazumbo a vadyisi.

⁹ Awe mndoni wangu, ni kufananisa ni mati, ale ma nga lovisa sikotxikani sa Faro.

¹⁰ Mathama ako ma tsurisetwe ngu siketiketi, ni thamo yako ngu wusekenya.

¹¹ Hi na ku mahela liketani la nzalama, li ku ni sipikiryana sa silivhela.

Muhorana

¹² A di ngadi khalahatshile mezani kwakwe mfumeli, nardhu yangu ya ninga kubhumula ka yona.

¹³ Txirandwa txangu, kwangu txi fanana ni sidhavyana sa mira; txi na zumba hagari ka titshumbu tangu.

¹⁴ Ku nga txizangwa txa Xipre, tithembweni ka Engedhi, txirandwa txangu txi lumba ani.

Dijaha

¹⁵ Wona taku u tshurile ngutu, awe mndoni wangu, wona taku u tshurile ngutu; maso ako ma fana ni a situvani.

Muhorana

¹⁶ Wona taku u zumbisekile ni kutsakisa, awe txirandwa txangu; m'bhedhu wathu mbwo tshura.

¹⁷ Minaneko ya nyumba yathu nja mikedhari, timbalelo ta lyangwa lathu nda Sipresite.