Nahume 3 - Bhiblia Yo Sawuleka

Kudila ka Ninivha

¹ Dikhombo ka didhoropa da mnoha, dona dotshe di tate ngu makuhu ni wubihi! Kupa kha ku khukhi ka dona.

² Ka pfala kutuma ka txisephu, ni diguwa da kurindilikela ka madangarita; ni mahantxhi ma gumulana, se sikotxikani sa ndaka-ndaka.

³ M'gadhi wa dihantxhi wa guleta ditxhari do phatima, ni mseve wo keluka nga nzuma, se ku nava ni vathu vavangi vo fa, ni sirumbi sasingi, vafi kha va na mbi va ni magwito; va na humbwa ngu mimidi yawe.

⁴ Ngu mhaka ya kutala ka sionho sa digelegele do tshura, da wutxhari wa wuloyi, di nga xavisa vathu ngu wugelegele wa dona, ni tihunzu ngu wuloyi wa dona.

⁵ Wona taku ani na kuwukela, kuwomba Mkoma wa Mabutho a Tiyimbi, se ni na vhunungula khohe yako, ni kombisa wumbwiri wako ka matiko, ni tingana tako ka mifumo.

⁶ Se ni na rinza txitimwi kwako simaha so nyenyeza, kambe ni na kupoyila, ni txi kumaha txikombiso txa walo.

⁷ Se ku na maheka taku, votshe vale va no kuwona, va na kututuma, va txi kha vona: Ninivha a hoxotilwe; i mani a no mpfela wusiwana kani? Ni na ya va teka hani vo ta kuthavelela kani?

⁸ I na wo va wamnene awe kupinda No-Amoni, m'ti wu manekako hagari ka minambo, wu nga ranganyetwa ngu mati, eho khohe yako i ku linene, ni linene diguma dako kani?

⁹ Etiyopiya ni Egipta i ti ti mtamo wa dona, kambe dona di si nga ni magwito; Pute ni Libhiya, i ti ti valamuleli vako.

¹⁰ Hambi keto, dona di tekilwe di tsula wukhumbini; vanana va dona va phatuletwe amu ka totshe tinzila ta hombe, se txitimwi ka vathaviseki vawe va to xaxuva tixolo, ni votshe vahombe vawe va sungilwe ngu titxhini.

¹¹ Nanawe Ninivha, u na leva u txiya sisala, kambe u na lava mtamo, ngu kuthava valala vako.

¹² Yotshe mikhokhola yako mi na nga mikuwu, yi ku ni makuwu o vitwa; ma txi zuzwa, ma wela mkanani ka wule a no ma dya.

¹³ Wona taku vathu vako, a va va ku hagari kwako, va na nga vavasikati; sike sa ditiko dako, si tulekile ka valala vako; mndilo wu na tshokomisa sikhoto sa tisimbi.

¹⁴ Reka mati u ma vekela ditshiku da kurandelwa kwako, tsanisa mikhokhola yako, wulela ndopeni, kandetela dibumba, u lulamisa m'dhikila wo hisa sitini.

¹⁵ Eho mndilo wu na kutshokomisa, ditxhari di na kuhetisa; di txi kulovisa nga humbi, anda ku nga humbi, anda ku nga humbi.

¹⁶ Mbavangi ngutu vanyamabhindu vako kupinda tinyeleti ta nzumani; humbi yi na anda yi txi puruma.

¹⁷ Va nyamibhoti vako va fana ni tihumbi, se vathangeli vako va fana ni tihumbi ta hombe, ti ti khandamako masetani ngu masiku a pheho; ngu kuguleka ka ditambo, ta puruma, ku si ziwi ni mu ti ku kona.

¹⁸ Awe mfumeli wa Asiriya, vadyisi vako va na otela; va thaviseki vako va na otela, vathu vako va hangalakile mimangoni, ku si nga ni wo e va sengeleta.

¹⁹ Kha ku nga ni mrende wo kalamukisa txilonda txako; mbanga yako yo panda ngutu, votshe vale ngu ditshuri va no pfa nduma yako va na ku bhwabhwatela manza, nguko i mani wule wu nga mbi pinda ngu kwakwe wubihi wako kani?