Mtuletelo 7 - Bhiblia Yo Sawuleka

Vaisrayeli va 144.000 va nga vekwa txikombiso

¹ Msana ka tiya, ni to wona mune wa tingelozi ti di emile ka mune wa makhona a mafu, ti di ñote maphuho a mune a mafu, kasi ku di si peki diphuho ha mafuni, ha lineneni mwendo ha mndongani.

² Ni woni yimwani ngelozi yi txi huma ngu wutxani, yi di ni txixambanyo txa Txizimu txi txi hanyako. Yona yi to kwangula ngu dipswi da hombe ka mune wa tingelozi ti ti nga ningwa mtamo wa kuonha mafu ni linene, yi txi kha yona:

³ “Mi nga onheni mafu ni linene ni mindonga kala kuza hi txi veka sikombekiso, ha mbanza ka sithumi sa Txizimu txathu.”

⁴ Se ni engisile ntengo wa vale va nga bhalwa sikombekiso: I ti 144.000 ava va nga bhalwa ka tixaka totshe ta vanana va ka Israyeli.

⁵ Ka lihunzu la Judha ava va nga ti vekilwe txikombiso i ti 12.000 wa vathu; va lihunzu la Rubheni i ti 12.000 wa vathu; va lihunzu la Gadhi i ti 12.000 wa vathu;

⁶ va lihunzu la Aseri i ti 12.000 wa vathu; va lihunzu la Naftali i ti 12.000 wa vathu; va lihunzu la Manasi i ti 12.000 wa vathu.

⁷ Va lihunzu la Simiyoni i ti 12.000 wa vathu; va lihunzu la Levhi i ti 12.000 wa vathu; va lihunzu la Isakari i ti 12.000 wa vathu.

⁸ Va lihunzu la Zebhuloni i ti 12.000 wa vathu; va lihunzu la Josefa i ti 12.000 wa vathu; va lihunzu la Bhenjamini i ti 12.000 wa vathu va nga vekwa txikombiso.

⁹ Msana keto, ni woni dibutho da hombe da vathu, ava ni mmweyo asi sikotiko ku va bala, va otshe matiko, totshe tixaka, yotshe mixowo, ni totshe tidimi. Va ti ti emile masoni ka txiluvelo ni masoni ka Txinvutana, va di ni syambalo so basa, na va di ñote mijindo manzani kwawe.

¹⁰ Se va to kwangula ngu dipswi da hombe, va txi: “Kuhanyisa kulumba Txizimu txathu, txi nga khalahatsha ha txikhaloni ka wukoma ni ka Txinvutana.”

¹¹ Totshe tingelozi ti ti emile, ti randela txikhalo txa wukoma, kumweko ni madhota ni mune wa sivangwa so hanya. Se tingelozi ti txi wa hahatshi ngu timbanza masoni ka txikhalo txa wukoma, ti txi khozela Txizimu, ti txi:

¹² “Amen, wudhumo, kupfaliswa, wuzivi, kubongwa, kuxoniphwa, Kufuma ni mtamo si lumba Txizimu yotshe mbimo. Amen.”

¹³ Se mmweyo wa vale va madhota a to khene kwangu: “Ava va nga ambala so basa, wa va ziva kani? Va ta ngu hani?”

¹⁴ Ani ni to angula ni txi khani: “Mkoma wangu, awe ngawe u ti zivako.” Se ene a ti khene: “Avava, ngu va va tako ngu kuxanisekani ka hombe; va nga kuwula syambalo sawe, ve si basisa ngu mnoha wa Txinvutana.

¹⁵ Ngu toneto, va maneka masoni ka txikhalo txa wukoma txa Txizimu, va txi txi khozela wusiku ni mitshikari, Dithepeleni ka txona. Awule a nga khalahatsha ha txikhaloni ka wukoma a na va fenengeta ngu ditenda dakwe.

¹⁶ Kha va na mbiswa va txi pfa nzala, kha va na mbiswa va txi pfa ditora, kha va na mbiswa va txi pfa kuhisa ka ditambo kumbe lisani.

¹⁷ Nguko Txinvutana txi txi ku ha txikhaloni ka wukoma txi na va dyisa, txi va kombisa nzila ya kuya ka sisima sa mati a wutomi. Se Txizimu txi na va bahulela mirongo yotshe ka maso awe.”