Mtuletelo 20 - Bhiblia Yo Sawuleka

Malembe a 1.000

¹ Se ni to wona ngelozi yi txi txhika ngu nzumami, manzani yi di ni khiya ya diphala do hokoma ni txhini ya hombe.

² Ngelozi yi to ñola mwamilambo, mnyoka wa kale i ku Dhiyabhulosi mwendo Sathani yi msunga ngu txhini kasi ku e zumba 1.000 wa malembe.

³ Yi mrinza diphalani ko hokoma, adiya yi ngadi khubhunyeta, yi di lema ngu txixambanyo, kasi ku asi engeti e kanganyisa mifumo, kala me guma malembe a 1.000. Msana keto, a fanete kuthukunyulwa ngu mbimwanyana.

⁴ Konako ni to wona sikhalo sa wukoma. Se avava va nga ti khalahatshile ka sona va to ningwa mtamo wo lamula. Ni to wona kambe mimoya ya vale va nga wilwa misungo ngu mhaka ya wufakazi wa Jesu ni Dipswi da Txizimu; ni vale va nga mbi khizamela txikalani ni txithombe txa txona. Kambe kha va amukela txixambanyo txa txona ha timbanza kwawe mwendo manzani kwawe. Vona va tshumete ve hanya ve fuma kumweko ni Kristu, txipimo txa 1.000 wa malembe.

⁵ Aniko vamwani vafi, kha va tshumela ve hanya kala kuza kuguma digumi da mazana a malembe. Akuwa ngu kona kuwuka ko khata ka vafi.

⁶ Va katekile ni kusawuleka avale va manako txyavelo txa kuwuka ko khata ka vafi. Txitimwi kwawe lifo la wumbidi kha li nga ni mtamo, vona va na va vaphaxeli va Txizimu ni va Kristu, va na fuma nayo 1.000 wa malembe.

⁷ Ngako ma di tshanganile malembe yale a digumi da mazana, Sathani a na thukunyulwa kusungwani kwakwe,

⁸ a na huma kasiku e kanganyisa mifumo ya mune wa madhawa a mafu, Goge ni Magoge, e va tshanganisa kasiku ve lwa yimbi; mtengo wawe wu ti dingana ni kutala ka mafu a linene.

⁹ Va to huma ve hangalaka ni dotshe ditiko ve randela midhuti ya vasawuleki ni didhoropa do randeka; kambe ku to txhika mndilo ngu nzumani wu txi ta va heta.

¹⁰ Dhiyabhulosi wu a nga ti va xengetela a to vinzwa txizivani ka mndilo ni txivavula, amu se txi nga ti ti kona txikalani ni mprofeti wa makuhu. Va na zumba ve dyiswa mihumbo wusiku ni mitshikari, ngu hawa ku si gumiko.

¹¹ Ngu msana ni to wona txikhalo txa hombe txa wukoma txo basa ni wule a khalahatshako ka txona. Nzuma ni mafu si tutuma si mu thava, ku si sali txikombiso txa hawa si nga ti kona.

¹² Se ni to wona vafi vahombe ni vavadhoto, va di emile masoni ka txikhalo txa wukoma, se me tulwa mabhuku. Ku tutwe kambe dimwani dibhuku, dibhuku da wutomi. Vafi va to lamulwa madingano ni mithumo yawe, nga ti ti nga ti bhalisilwe tona mabhukuni.

¹³ Linene li to tshumeta vafi va va nga ti ka lona. Lifo ni Hadhesi si to ningela vafi va va nga ti ka sona, se mmwani ni mmwani a to lamulwa mandingano ni mithumo yakwe.

¹⁴ Lifo ni Hadhesi si to vinzwa txizivani ka mndilo. Aliya i lifo la wumbidi: Txiziva txa mndilo.

¹⁵ Se avale va nga ti sa bhalwa dibhukuni ka wutomi va to vinzwa ni vona txizivani ka mndilo.