Mtuletelo 2 - Bhiblia Yo Sawuleka

Ka Dibanza da Efesu

¹ Ka ngelozi ya Dibanza da Efesu, bhala u txi khawa: A womba tiya awule a nga ñola mtxhanu wa tinyeleti ni timbidi ka dianza dakwe da txinene, awule a tsimbilako hagari ka sipande sa mtxhanu ni simbidi sa nzalama.

² Na yi ziva mithumo yako, kukhatala kwako ni kutimisela kwako, na tiziva ti to khu sikoti kupfana ni vathu vo biha; u va xote u txi va tumbula ava va nga ti ti womba ku mbaprofeti, na i si nga vona, u va woni ti to mba makuhu.

³ U na ni kutimisela, nguko u tumete kuxaniseka ngu mhaka ya ditina dangu, aniko khwa rereka.

⁴ Kambe na kusola nguko u lekile lirando lako lo khata.

⁵ Ngu toneto, alakanya ahawa u nga wela kona, hunduluka u txi teka mahanyelo o khata. U si mahi eto, ni na ku tela se, ngako u si hunduluki ni nata thavisa txipande txako txa dikhanjela ha wukhaloni ka txona.

⁶ Aniko, ta tinene ti u ti mahako ngu kunyenya mithumo ya Vanikolahita, ayi nani ni yi nyenyako.

⁷ Awu a ku ni tinzeve a na engise ati Moya wu embelako Mabanza: Ka wu a no xula, ni na m'tumelela kudya mndonga wa wutomi, wu ku paradhiseni ka Txizimu.

Ka Dibanza da Esmirna

⁸ Ka ngelozi ya Dibanza da Esmirna, bhala u txi khawe: “A womba tiya awule wo khata ni kugwitisa, awule a nga ti fite, se e tshumela e hanya.

⁹ Na kuziva kuxaniseka kwako ni wusiwana wako kambe awe u nyatithombe, ni ziva ni siruko si va ku rukako ngu sona vamwani va ti dhanako ku mba Judha, na i si nga vona, aniko vona i disinagoga da Sathani.

¹⁰ U nga telwe ngu dizowa ka tile ti no kuninga kupandiseka. Sathani a na beta mkorani vamwani kwanu, kasi ku mi duka. Mi na heta digumi da masiku na mi txi xaniseka. Zumba u di thembekile kala kufani, se ani ni na kuninga m'bhoti wa wutomi.

¹¹ Awule a ku ni tinzeve a na engise ati Moya wu embelako mabanza. Awu a xulako kha na mbi va ni kuxaniswa ngu lifo la wumbidi.”

Ka Dibanza da Pergamo

¹² Ka ngelozi ya dibanza da Pergamo, bhala u txi khawe: “A womba tiya awule a ku ni ditxhari do hinda, da kulotwa khe ni khe.

¹³ Na kuziva mu u zumbako kona: Ngu konamo ku ku ni txikhalo txa wukoma txa Sathani. Aniko awe, u ñote ta tinene ditina dangu, nguko khwa lamba likholo langu, hambi ka masiku ya Antipasi, fakazi yangu yo thembeka, a nga dawa hagari kwanu, ahawa Sathani a nga aka kona.

¹⁴ Aniko, ni ni sisolo sokari ni lavako ku si womba: U na ni vathu konaho, va londetelako gondo ya Bhalahamu, awu a nga ti gondisa Bhalake kuveka txikhuvekiso masoni ka vanana va Israyeli, kasiku ve dya tinyama ta timhamba ta sikwembu sa walo, ni kumaha wugango.

¹⁵ Ka wumbidi, u navo vamwani va londetelako gondo ya vanikolayita.

¹⁶ Ngu konaho, hunduluka. U si hunduluki, na kuluveta ni txi ku tela, ni ta lwa navo ngu ditxhari da txisofu txangu.

¹⁷ Awu a ku ni tinzeve a na engise atile Moya wu embelako Mabanza: Ka wule a xulako, ni na mu tsunulela mana yawa ma nga siwa, ni na mninga kambe dirigwanyana do basa, dirigwanyana di ka dona ku nga bhalwa ditina da diphya, adi di si ziwiko ngu m'thu, hahanze ka wule a di amukelako.”

Ka Dibanza da Tiyatira

¹⁸ Ka ngelozi ya Dibanza da Tiyatira, bhala u txi khawe: “A womba tiya Mwanana wa Txizimu, awu maso akwe ma fanako ni dituro da mndilo, ni mikondo yakwe yi fanako ni msuku.

¹⁹ Na yi ziva mithumo yako, lirando lako, likholo lako, kukhutala kwako, kutimisela kwako, mithumo yako yo gwitisa yi tate ngutu kupinda yo khata.

²⁰ Aniko nina ni txisolo ni nawe, nguko wa leka Jezabheli, msikati wu a ti mahako mprofeti, awu a gondisako ni kutimeta vakhozeli vangu kuve ve maha wugango, ve dya tinyama ta timhamba ta sikwembu sa walo.

²¹ Ni mu sikete masiku, kasi ku e hunduluka. Aniko ene kha ti lavi kuhunduluka ka wugelegele wakwe.

²² Wona, ni lava ku mu wisa ha ditahoni ka wulwati, ni va va nga maha nayo wugango va na pfa kuxaniseka ka hombe, ngako va si hunduluki ka mithumo yawe.

²³ Ni na daya vanana vakwe, kasiku otshe Mabanza me tiziva ti to ngani ni zivako makungo a titsho ni a mbilu, ni ti to mmweyo ni mmweyo wanu ni na mu tshumetela madingano ni mithumo yakwe.

²⁴ Aniko i di anu vamwani, va Tiyatira, mi si londeteliko gondo yiya, anu mi si ziviko kueta ka Sathani, nga tona ti va wombisako tona, na mi gela ti to kha ni lavi ku mi rweka wumwani mrwalo,

²⁵ aniko zumbani mi di tsani ka tile mi ku nato, kala ni txi ta.

²⁶ Ka wule a xulako, ka wule a no veketa mithumo yangu kala magwito, ni na mninga mtamo wa kufuma matiko,

²⁷ Se a na ma dyisa ngu ndonga ya simbi ya wukoma, e ma fayetela nga tikhadi ta dibumba,

²⁸ nga tiya nani ni nga ningiswa tona ngu Tate wangu. Ni na mninga kambe Nyeleti ya mixo.

²⁹ Awule a ku ni tinzeve, a na engise ati Moya wu embelako Mabanza.”