Mtuletelo 18 - Bhiblia Yo Sawuleka

Kuwa ka Bhabhilona

¹ Msana ka tiya, ni to wona yimwani ngelozi yi txhika ngu nzumani; yi ti ni mtamo wa hombe, se mafu me woningwa ngu wudhumo wa yona.

² Konako yona yi to kwangula ngu dipswi da mtamo, yi txi kha yona: “A wite, a wite Bhabhilona wa hombe, a hindukile e maha wuzumbelo wa madhimoni, wuthavelo wa totshe tixaka ta mimoya ya nzambwa, wuthavelo wa totshe tixaka ta sinyana sa nzambwa ni so nyenyeza.

³ Nguko ene a levisile mifumo yotshe ngu vhinya ya txiviti txa wugelegele wakwe, vafumeli va ditiko va mahile nayo wugango, vaxavisi va ha mafuni va mahile va nyatithombe, ngu mhaka ya kubomba kwakwe ka wubhemba.”

⁴ Ni engisile kambe dimwani dipswi da nzumani, di txi kha dona: “Anu vathu vangu, humanimo, kasiku mi si manwi ngu mnandu wa sionho sakwe; ni kutshapelwa ngu mitungu yakwe;

⁵ nguko sionho sakwe si tshutshutile kala nzumani se wubihi wakwe wu alakanyilwe ngu Txizimu.

⁶ M'tshumeteleni ngu ti nene a nga mi mahela tona. M'diheleni kambidi madingano ni mithumo yakwe ka digombe di a nga thela ngu dona so sela anu mu theleleni kambidi.”

⁷ “Madingano ni ku ti dhumisa kwakwe ni kutikulisa kwakwe, m'tshumeteleni ngu sixaniso ni makhombo nguko mbiluni kwakwe a ti ti khene:” “Ni khalahatshile nga khosikazi, kha ni nga noni, txima kha ni na mbi va ni txidilo.”

⁸ “Ngu konaho, makhombo ma nata ngu ditshiku dimwedo; lifo, txidilo, ni nzala; se a na hiswa ngu mndilo, nguko Mkoma Txizimu txi nga mu lamula, txi na ni mtamo.”

⁹ Se vafumeli va mafu, va nga txi geleza nayo awule wamsikati ve ti tsakisa kumweko nayo, va na dila, ve peka tikhana, mbimo yi va no wona wutshi wa kuhiswa kwakwe.

¹⁰ Va di emile ngu kule, ngu kuthava sixaniso sakwe, va na womba va txi kha vona: “Ayiwee, ayiwee, didhoropawe da hombe, Bhabhilona, didhoropa da mtamo, nguko kunukunuko u hoketwe ngu txitsayiso txako.”

¹¹ Vaxavisi va ha mafuni ni vona va dila ni kupeka tihuwa, ngu mhaka yakwe, nguko awalo wu a xavako mirwalo yakwe:

¹² Mirwalo ya nzalama ni ya silivela, marigwi o dhula ni tidhayimana, tinguwo ta linya ni disilika, ni sedha ni tinguwo to bhilivila, ni totshe tixaka ta mapulango o bhumula, ni simaha sa kumahwa ngu makwasa a tinzofu; ni mapulango a lisima la hombe, ni siya sa koporo ni sa simbi, ni sa marigwi a lisima;

¹³ kinamoni, i ku mafura o bhumula, mira ni dibaselo, vhinya ni mtona, mpupu wa mafaka ni fulaho, tihomu ni tinvuta, mahantxhi ni sikotxikani, tikhumbi ni mimoya ya vathu.

¹⁴ Mihando yi moya wako wu nga txi yi navela, yi hangalakile, sotshe si si nga txi kuninga wukoma ni wudhumo si mwalate kwako, se txima kha si na mbi ngadi si maneka.

¹⁵ Vaxavisi va simaha siya, ava va nga ti mana dibhindu ngu mhaka yakwe, va na ema ngu kule, ngu kuthava kuxaniseka kwakwe, se va txi dila ni kupeka tihuwa,

¹⁶ va txi kha vona: “Ayiwe, ayiwe, Didhoropa da Hombe! Adi di nga ti ambala linya ya lisima; disilika ni nguwo yo bhilivila, di nga ti ti bombisa ngu nzalama, marigwi a lisima ni tidhayimana!

¹⁷ Ngu txikhati txa tximwetxo dwe, thomba yayingi ngutu yi fuvisilwe!” Votshe va tsimbitisi va sitimela sa mati ni va va endako ngu nzila ya mati, vatxungeli ni votshe va va bhindulako ngu kuthumela lineneni va to emela kule.

¹⁸ Se ngu kuwona wutshi wa kuhya kwakwe, va ti kwangula, va txi kha vona: “Ngu dihi didhoropa di di fananiswako ni Didhoropa da Hombe kani?”

¹⁹ Se va txi ti theletela dikhuma ha msungo, va ti ti dila, ve peka tihuwa va txi kha vona: “Ayiwe, ayiwe, Didhoropa da Hombe, votshe va nga ti ni sitimela sa mati, va mahile va nyatithombe, ngu mhaka ya tithomba ta dona! Kambe ngu txikhati txa txidotho ti dingani ku ti fuviswa.”

²⁰ Tsakani ngu mhaka ya dona didhoropa diya: “Awe nzuma ni nanu vasawuleki, vapostoli ni vaprofeti, nguko Txizimu, ngu ku di lamulisa tiya, txi mi lamulete.”

²¹ Konako ngelozi ya mtamo yi to gula dirigwi do nga txiwindi txa hombe txa txigayo, yi di rinza lineneni, yi txi kha yona: “Ngu mtamo wo fana ni wona wuwa, Bhabhilona, Didhoropa da Hombe, a na rinzwa lineneni, se kha na mbi swa e manwa.

²² Se kuembelela ka vaveti va tiharipa ni vaembeleli ni vaveti va misengele, ni vaveti va mipundu kha va na mbiswa ve pfala didhoropanimo; ni mmweyo wa marindi kha na mbi ngadi e maneka kwako; diguwa da txigayo kha di na mbi ngadi di pfala kwako.

²³ Kutura ka dilambu kha ku na mbi ngadi ku txi woninga kwako; dipswi da mwamna ni msikati kha di na mbi ngadi di engiswa kwako, nguko vaxavisi vako i ti tinganakana ta ditiko, kambe ngu matiloti ako u kanganyisile yotshe mifumo.”

²⁴ Se mndani kwako ku manekile mnoha wa vaprofeti ni wa vasawuleki, ni wa votshe va nga dawa ha mafuni.