Mtuletelo 16 - Bhiblia Yo Sawuleka

Magombe a kuhenya ka Txizimu

¹ Se ni to engisa dipswi da hombe di txi ta ngu Dithepeleni, di txi gela tingelozi ta mtxhanu ni timbidi, di txi kha dona: “Tsulani, mi txi ya theketa txitimwi ka mafu, magombe a mtxhanu ni mambidi a kuhenya ka Txizimu.”

² Ngelozi yo khata yi to huma yi theketa digombe da yona ha mafuni. Se txilonda txo biha, txo pandisa txi to humelela ka vale va nga ti ni txixambanyo txa Txikalani ni vale va nga ti khozela txithombe txa txona.

³ Ngelozi ya wumbidi yi to theketa digombe da yona lineneni; se linene li hinduka li maha mnoha, wo nga wa m'thu wa kufa, ahawa koza si fa sotshe sivangwa si si nga ti hanyela lineneni.

⁴ Ngelozi ya wuraru yi to theketa digombe da yona minamboni ni sisimani. Se sona si hinduka si maha mnoha.

⁵ Se ni to engisa ngelozi ya mati yi txi kha yona: “Mlulami ngawe, u kuho, awe u nga ti ho, awe Msawuleki, nguko u lamulisile toneto.”

⁶ Nguko avava ngako va nga theketa mnoha wa vasawuleki ni vaprofeti, na nawe u va ningile mnoha ve sela. Va ni fanelo yeto.

⁷ Se ni to engisa yimwani ngelozi yi txi kha yona: “Ina, Mkoma, Txizimu txa mtamo wotshe. Kulamula kwako ku tate ngu ditshuri ni kululama.”

⁸ Ngelozi ya wumune yi to theketa digombe da yona txitimwi ka ditambo; se dona di ningilwe kuhisa vathu ngu mndilo wa dona.

⁹ Se vathu ve hya ngu kuhisa ka hombe, ve khata kuruketela ditina da Txizimu, txi txi ku ni mtamo txitimwi ka mitungu yiya. Kambe kha va hunduluka ve txi pfalisa.

¹⁰ Ngelozi ya wutxhanu yi to theketa digombe da yona txitimwi ka txikhalo txa wukoma txa txikalani. Se mfumo wa txona wu to sala mtemani, vathu ve ti luma tidimi ngu kupandiseka;

¹¹ Se ve ruketela Txizimu txa nzumani ngu mhaka ya kupandiseka kwawe ni silonda sawe. Aniko kha va hunduluka ka mahanyelo awe.

¹² Ngelozi ya wutxhanu ni yimweyo yi to theketa digombe da yona txitimwi ka mnambo wa hombe wa Ewufrate, se mati a mnambo ma to phwa me tulela nzila vakoma va Wutxani.

¹³ Konako, ni to wona ku txi huma ngu ka mwamilambo, ni mkanani ka txikalani ni mkanani ka mprofeti wa makuhu, mimoya yiraru ya nzambwa nga makhele;

¹⁴ nguko ngu yona mimoya ya madhimoni yi mahako sixamaliso, yi hoka ni ka vafumeli va dotshe ditiko, kasi ku yi va tshanganisa ku yalwa yimbi ya ditshiku da hombe, da Txizimu txa mtamo wotshe.

¹⁵ Wonani, nata kufana ni dikhokhokho: A katekile awule a wonelelako e veketa tinguwo takwe kasiku asi tsimbili tximbwiri e wonwa tingana takwe.

¹⁶ Yona mimoya yi to va tshanganisa ka wukhalo wu, ngu Txihebheru wu dhanwako ku “Armagedhoni.”

¹⁷ Ngelozi ya wutxhanu ni timbidi yi to theketa digombe da yona ha mpfhukani: Konako ku to huma dipswi da hombe ngu Dithepeleni, di txi kha dona: “Ti mahekile.”

¹⁸ Konako ku to humelela kukeluka ka nzuma, mapswi, singwalangwanda ni kudekadeka ka mtamo ka mafu: Kudekadeka ka hombe ngutu akuwa txima kha kuzivi kuhumelela kukhukhela m'thu a di tumbulukile ha mafuni.

¹⁹ Didhoropa da hombe di to abaneka ngu madhawa mararu, se madhoropa a mifumo ma to wa, konako Txizimu txi to khumbula Bhabhilona, Didhoropa da Hombe, kasiku txi di ninga digombe da vhinya ya txiviti txa kuhenya ka txona.

²⁰ Sitondolo sotshe si to thava, mimango ni yona yi to mwalala;

²¹ ma to wa ngu nzumani, me wela vathu, maralala o nemela nga titalenta, se vathu ve khata kuruketela Txizimu ngu mhaka ya ntungu wa maralala, nguko i ti wa hombe ngutu.