Mtuletelo 15 - Bhiblia Yo Sawuleka

Tingelozi ni mitungu yo gwitisa

¹ Ni to wona kambe nzumani tximwani txikombiso txa hombe txa kuxamalisa: Mtxhanu wa tingelozi ni timbidi kumweko ni mtxhanu wa mitungu ni yimbidi, yo gwitisa, nguko ngu yona ku na hetiseka kuhenya ka Txizimu.

² Ni woni kambe txo nga Linene la ngilazi yo pataniswa ni mndilo ni va va nga xula Txikalani, ni txithombe, ni txikombiso, ni txibalo txa ditina da txona: Va ti emile txitimwi ka Linene la ngilazi na va di ñote tiharipa ta Txizimu,

³ na va txi embelela lindando la Mosi, txithumi txa Txizimu, ni lindando la Txinvutana, va txi kha vona: “Mithumo yako nja hombe, kambe ya xamalisa, awe Mkoma Txizimu txa mtamo wotshe, tinzila tako ndo lulama ni ta ditshuri, awe mfumeli wa otshe matiko.

⁴ Mkoma, i mani a no mbi thava ni kupfalisa ditina dako, kani? Ina! Ngawe dwe u ku msawuleki! Yotshe mifumo yi nata khizama masoni kwako, nguko mithumo yako ya kululama yi ha kubasani.”

⁵ Msana ka tiya ni to wona ku di tutwe dithepele nzumani, amuwa ku nga ti ni ditenda da mtshangano.

⁶ Se ku txi huma mndani ka dona mtxhanu wa tingelozi ni timbidi ti nga ti ni mtxhanu wa mitungu ni yimbidi. Ti ti ambate tinguwo ta linya ya lisima, yo khetima, ti di sungile tibhande ta nzalama ha khana ka tona.

⁷ Tximwetxo ka sivangwa sa mune si hanyako txi to ningela ka tingelozi ta mtxhanu ni timbidi, mtxhanu wa magombe ni mambidi a nzalama, ma di tate ngu kuhenya ka Txizimu, txi txi hanyako ngu hawa ku si gumiko.

⁸ Dithepele di to tala ngu wutshi, ngu mhaka ya wudhumo wa Txizimu ni mtamo wa txona, ahawa koza ni wammweyo asi sikoti kuwulela Dithepeleni, kala kuza kuhetiseka mitungu yile ya mtxhanu ni yimbidi ya tingelozi ta mtxhanu ni timbidi.