Mtuletelo 14 - Bhiblia Yo Sawuleka

Lindando la va va nga tshatwa

¹ Se ni to wona tiya: Txinvutana txi ti emile txitimwi ka mmango wa Siyoni, kumweko ni 144.000 wa vathu, avava va nga ti bhatwe ha mbanza ditina da Txinvutana, ni da Tate wa txona.

² Ni to engisa dipswi da kuta ngu nzumani, do fana ni kudhuma ka mati ni kudhinda ka txingwalangwanda txa hombe; dipswi di ni ngadi engisa di ti fana ni kutuma ka tiharipa ti txi vetwa ngu vaveti va tona.

³ Va ti embelela lindando la liphya masoni ka txikhalo txa wukoma, ni masoni ka sihari sa mune ni ka madhota. A walo wu a nga ti sikota kugonda lindandolo, hahanze ka va va 144.000 wa vathu, va nga hulukiswa ha mafuni.

⁴ Avava ngu va va nga mbi ti nyeta ngu vavasikati: Mbotuma. Avava ngu vona va londetelako Txinvutana, hani ni hani txi yako kona. Avava va ponisilwe hagari ka vathu, ti to ve maha mihando yo khata ka Txizimu ni ka Txinvutana.

⁵ Txima kha kuzivi kumanwa makuhu sisofuni kwawe. Kha va nga ni txisolo.

Tingelozi ta tiraru

⁶ Ni to wona yimwani ngelozi yi nga ti puruma hagari ka mpfhuka, yi di ni Evhangeli yo mbi na makhato ni magwito, kasiku yi huwelela ka vaaki va ha mafuni, ni yotshe mifumo, totshe tixaka, totshe tidimi ni votshe vathu.

⁷ Yona yi ti womba-womba ngu dipswi da hombe, yi txi kha yona: “Thavani Txizimu mi txi pfalisa, nguko txi hokile txikhati txa kulamula ka txona; khozelani awule a nga maha nzuma ni mafu, linene ni sisima.”

⁸ Yimwani ngelozi, ayi ya wumbidi, yi to ya masoni ngu kuwomba, yi txi kha yona: “A wite, a wite, Bhabhilona wa hombe, awu a nga levisa yotshe mifumo ngu vhinya ya txiviti txa wugelegele wakwe.”

⁹ Yimwani ngelozi kambe, ayi ya wuraru, yi to ya masoni ngu ku ti tekeleta, ngu dipswi da hombe, yi txi kha yona: “Ngako m'thu a txi khozela txikalani ni txithombe txa txona, e amukela txixambanyo ha mbanza mwendo manzani,

¹⁰ eyo nene a na sela vhinya ya kuhenya ka Txizimu, yo mbi timulwa ayi yi nga thelwa mu ka digombe da kuhenya ka txona; a na xaniswa ngu mndilo ni txivavula, masoni ka tingelozi to sawuleka, ni masoni ka Txinvutana.

¹¹ Wutshi wa kuxaniseka kwakwe wu na tuvika ngu hawa ku si gumiko: Ava va khozelako Txikalani ni txithombe txa txona, ni wuhi ni wuhi a amukelako txixambanyo txa ditina da txona, txima kha nga ni kuhumula, wusiku ni mitshikari.”

¹² Atiya ngu tona ti tsanisako kuhonisela ka vasawuleki, ava va veketako sirumo sa Txizimu ni likholo la Jesu.

¹³ Konako ni to engisa dipswi da kuta ngu nzumani, di txi kha dona: “Bhala u txi khawe: Va katekile vafi vava, kukhukhela konkuwa va felako ka Mkoma. Ina, kuwomba Moya, va na humula ka mikaralo yawe, nguko mithumo yawe ya va heleketa.”

Ta kuelulwa ka ditiko

¹⁴ Msana keto, ni to wona tiya: Ku ti ni direfu do basa, se txitimwi ka direfu ku ti khalahatshile m'thu wokari, wo fana ni Mwanana wa M'thu, a di ni m'bhoti wa nzalama ha msungo, se manzani kwakwe, a ti ni sikela yo lotwa.

¹⁵ Konako yimwani ngelozi yi to huma ngu Dithepeleni, yi txi kwangula ngu dipswi da hombe ka wule a nga ti khalahatshile ha direfuni, yi txi kha yona: “Teka sikela yako u txi elula. Yi hokile mbimo ya kuelula, nguko thembwe ya mihando ya ha mafuni yi vitute.”

¹⁶ Awu a nga ti khalahatshile ha direfuni a to rumela sikela yakwe ha mafuni se mafu me elulwa.

¹⁷ Konako yi to huma yimwani ngelozi ngu ka Dithepele di di ku nzumani, ni yona yi di ni sikela yo lotwa.

¹⁸ Se yimwani ngelozi yi ku ni mtamo ka mndilo, yi to huma ngu ka txiluvelo, yi kwangula ngu dipswi da hombe ka yile yi nga ti ni sikela yo lotwa, yi txi kha yona: “Teka sikela yako yo lotwa, u txi wilela sizangwe sa m'vhinya wa ha mafuni, nguko mauvha a wona ma vitute.”

¹⁹ Konako ngelozi yi to ruma sikela ya yona ha mafuni yi elula mihando ya m'vhinya wa ha mafuni, msana keto yi yi rinza nzekani ka kuhenya ka Txizimu.

²⁰ Mauvha ma to ya sukwa nzekani yi nga ti hahanze ka didhoropa, se ngu ka yona nzeka yile ku to huma mnoha, awu ngu kutala ka wona wu nga hokela matomu a mahantxhi, wu txi hangalakisa toneto ka mnava wa mazana mararu a makilometru.