Mithumo 6 - Bhiblia Yo Sawuleka

Mtxhanu wa vavhuneteli va vapostoli

¹ Ngu ka oneyo masiku, ngako mtengo wa vagondiswa wu nga txi anda, vamwani ka vona, ava va nga txi womba-womba lidimi la Txigriki va to khata kungurangura ve sola va, va nga txi womba-womba lidimi la Txihebheru, va txi kha vona tinoni ta ka kwawe ta divalwa kuphamelwani ka sakudya sa ditshiku ni ditshiku.

² Se va Digumi ni Vambidi va to ramba dibutho da vagondiswa, ve va gela tiya: “Kha ti laveki ti to hi leka kutxhumayela Dipswi da Txizimu, hi thumela timezani.

³ Ndinene, vanathu, kukhedha hagari kwanu, mtxhanu wa majaha ni mambidi a kuthembeka ta tinene, na ma di tate ngu Moya wo Sawuleka ni wuzivi, kasiku hi va veka ve thuma mthumo wuwa.

⁴ Kasi athu hi na khutala hi txi ti ningetela ka mthumo wa kukhongela ni kutxhumayela.”

⁵ Txikungo txiya txi tsakisile dibutho, se konaho va to khedha Sitefani, i nga ti dikholwa da kutsana, na a di tate ngu Moya wo Sawuleka, ni Filipi, ni Prokoro ni Nikanori, ni Timoni ni Parmenasi ni Nikolawu, mlondeteli wa kuta ngu Antiyokiya.

⁶ Va to va emisa masoni ka Vapostoli, se vona ve va mahela mikombelo ni ku va sanzeka manza.

⁷ Ti di ngeto, Dipswi da Txizimu di to khata kuanda, se mtengo wa vagondiswa wu to engeteleka ngu kutsakisa ditikoni ka Jerusalema; se dibutho do tala da vaphaxeli ve kholwa.

Kuñolwa ka Sitefani

⁸ Sitefani, a di tate ngu kateko ni mtamo, a to maha sidiwukiso ni sikombiso hagari ka vathu.

⁹ Kambe vamwani va kuta ngu ka disinagoga di di dhanwako ku nda Vathuseki, ni vamwani va Kirene ni va Alexandriya kumweko ni vamwani va Kilikiya ni va Aziya, va to ema ve kanetisana ni Sitefani.

¹⁰ Aniko ve tandeka ku kona wuzivi wakwe ni Moya wu a nga txi womba-womba ngu wona.

¹¹ Sekoko va to xavelela vathu kasiku ve womba ku kha vona: “Hi mu pfite a txi womba mapswi a kuruka Mosi ni Txizimu.”

¹² Ngu toneto, va wusile vathu, ni madhota ni vabhali, se va to mu tela ngu txidhukisa, va ta mñola, ve mu yisa banzani ka wukoma.

¹³ Se ve humisa tifakazi ta makuhu, ati ti nga womba ti txi kha tona: M'thu wuwa, kha leki kuwombawomba timhaka ti ti poyilako Wukhalo wo sawuleka ni Mlayo;

¹⁴ nguko athu hi muengisile, a txi khene: “Jesu wa Nazareta a na fuvisa Wukhalo wuwa e txitxa ni mahanyelo awa hi nga ningwa ngu Mosi.”

¹⁵ Sekoko votshe va va nga ti khate ha banzani ka wukoma va to mu ronokela ngu maso ve wona khohe yakwe yi txi fanana ni ya ngelozi.