Mithumo 20 - Bhiblia Yo Sawuleka

Paulo ngako a txi ya Makedhoniya ni Gresiya

¹ Ngako yi di rengile vhilinganya, Paulo a to dhana vagondiswa, a txi va gela mapswi ova tsanisa. Msana keto, a to va satisa e teka nzila ya kuya Makedhoniya.

² Ngako a di tshawunyetile matiko awa, ni ngako a di tsanisile vanawe ngu mbimo yayingi, a to hoka Gresiya;

³ ahawa a nga ya zumba mitxima yiraru. Mbimo yi a nga lava kubela txitimelani eya Siriya, ku to tumbuluka dizunga da kuwukela ene, na di txi vhukwa ngu Vajudha, se ene e wona nzila ya kutshumelela Makedhoniya.

⁴ Ava va nga ti kumweko nayo Paulo i ti Sopatrosi, mwana Pirusi, wa Bhereya; Aristarkusi ni Sekundo, va Tesalonika; Gayo wa Dherbhe, ni Timoti ni Tikiko ni Trofimo, va kuta ngu ditiko da Asiya.

⁵ Avava va to thangela veya hi emela Trowasi.

⁶ Athu hi to khukha Filipiya hi tsimbila ngu txitimela, msana ka masiku a mapawu o mbi tshumbelwa; se hi ya va mana Trowasi, msana ka mtxhanu wa masiku ni mambidi.

Paulo ngako a txi satisana ni va Trowasi

⁷ Ka ditshiku do khata ka divhiki, hi ti tshanganile kasiku hi bhandelana dipawu. Paulo, awu a nga ti fanela kukhukha e tsula mangwanani ka kona, ene a ti ti bhula navo va Trowasi. A to laphisa kuwombawomba kwakwe navo, kuza kuya hoka dhina ya wusiku.

⁸ Ku ti ni magezi o tala ka nyumba ya txitimwi, amuwa hi nga ti tshanganete kona.

⁹ Dijaha dokari, adi di nga ti dhanwa ku i Eutiko, di ti khalahatshile ha mtshunzutini ka difasitela, di txi khata kukhudhahela ngutu, na Paulo a txi ya masoni ngu kuwombawomba kwakwe. Ngu kota ya kona kukhudhahela, a to podika a txi wa hahatshi, kukhukhela ka txitezi txa wuraru. Va ti ya mu gula, na a di fite.

¹⁰ Paulo a to txhika a txi nama txitimwi kwakwe, a txi mu singarela, a txi khene: “Mi nga karatekeni, nguko a ngadi a txi hanya.”

¹¹ Se a to tshumela a txi kwela, a txi bhanda dipawu e dya: E womba-womba kambe ngu mbimo yo lapha, kala kuhuma wuronga. Konaho a to khukha e tsula.

¹² Dijaha dileya va to di heleketa mwani di txi hanya, se mhaka yiya yi va ninga kuthavelelwa ka hombe.

Va khukha Trowasi va txi ya Mileto

¹³ Se athu hi to longoloka ngu mati, hi tsimbila ngu txitimela, kala Asosi, ahawa hi nga tshumela hi mana Paulo, awu a nga ti fanete kutsula koneyo, na a txi tsimbila ngu nzila ya hahanze, nga ti ene a nga ti ti lavisile tona.

¹⁴ Ngako ene a di hi mani Asosi, hi to mteka ngu txitimela hi tsula nayo Mitilene.

¹⁵ Mangwanani ka kona, hi ti ya khukha eyo kambe, hi txi ya hoka ahawa ku dingetanako ni Kiyo, ka ditshiku di di londetako hi hokile Samosi; se msana ka kuva hi di emile Trogiliyo, hi hokile Mileto ka ditshiku do gameta.

¹⁶ Nguko Paulo a ti pimisile kuvayilela Efesu, kasiku asi ya temeliswa Asiya. A ti ni txikuluveta txa kuya maneka Jerusalema, ngako ti txi koteka, ngu ditshiku da Pentekoste.

Paulo ngako a txi satisana ni madhota a Efesu

¹⁷ Paulo, ngako a di Mileto, a to rumela kudhana madhota a dibanza da Efesu.

¹⁸ Ngako vona va di tshanganile masoni kwakwe, a to va gela ku khene: “Ma tiziva ti ni hanyisako tona ni nanu, kukhukhela ka ditshiku di ni nga bwaka ngu dona Asiya.

¹⁹ Ni thumete Mkoma ngu kutiveka hahatshi ni kudila mirongo ni siduko si si nga ni humelela, si txi wuswa ngu mazunga a Vajudha.

²⁰ Txi walo ni txa tximwetxo ni nga mi sisela ka sile ni nga tiziva ti to sa mi vhuna; aniko ni txhumayete, ni mi gondisile masoni ka vathu ni tinyumbani kwanu;

²¹ Kufakaza kwangu i ti ka kulaya Vajudha ni Vagriki, kasiku ve hunduluka ve kholwa ka Txizimu, ni ka Mkoma wathu Jesu Kristu.”

²² “Se konkuwa, ngu kukurumetwa ngu Moya wo Sawuleka, ndiko na tsula Jerusalema, kha ni tizivi ati ti no ya ni humelela;

²³ aniko Moya wo Sawuleka wa ni fakazela ka didhoropa ni didhoropa, ti to ni rinzelwa ngu tingomondo ni sixaniso.

²⁴ Kambe kha ni khatali txilo ngu wutomi, ani ni enelelwa ngu kuhetisa nzila yangu, ngako ni txi sikota kuheta ti ni nga rumwa kumaha tona, ni mthumo wu ni nga vekelwa ngu Mkoma Jesu, kutxhumayela Evhangeli ya kateko ya Txizimu.”

²⁵ “Konkuwa na tiziva ti to kha mi na mbiswa mi txi wona khohe yangu, motshe ni nga zumba hagari kwanu ni txi txhumayela Mfumo wa Txizimu.

²⁶ Ngu toneto, na xambanya masoni kwanu: Ani ni basile ka mnoha wa votshe,

²⁷ Nguko kha ni zivi kutshumelela msana, yihi ni yihi mbimo ti nga ti laveka kutxhumayela otshe mahungu a Txizimu.

²⁸ Ti woneleni, mi txi wonelela ni wotshe mtxhambi wu, mi nga mahwa vadyisi va wona ngu Moya wo Sawuleka, kasiku mi txi dyisa Dibanza da Txizimu, adiya txona txi nga ti winela ngu mnoha wa Mwanana wa txona apune.

²⁹ Na tiziva ti to msana ka kuva ni di khukhile ni tsula, ma na wulela maxolwa a tshofu hagari kwanu, aawa ma no mbi ta divalela mtxhambi,

³⁰ ni ti to hagari kwanu va na humelela vathu, ava va nota bwabwatela to soholoka, kufela kuva txi ti lavela vagondiswa.

³¹ Ngu toneto, wonelelani, na mi txi alakanya tito, wusiku ni mitshikari, mndani ka malembe mararu, kha na leka ku mi laya ngu mirongo.”

³² “Se konkuwa na mi ningela manzani ka Txizimu ni ka dipswi da kateko ya txona, txi ku ni mtamo wa kuaka ni wa ku mi ninga thomba hagari ka votshe va va nga sawulekiswa.

³³ Kha na navela male ya silivhela mwendo ya nzalama, hambi syambalo sa m'thu;

³⁴ Anu ma tiziva ti to manza awa ngu ona ma nga ni thumela asi ni nga txi si lava ani ni vathumi kulothi.

³⁵ Ngu totshe tinzila, ni mi kombisile tito, ngu kuthumisa tiya, hi fanela kuvhuna ava i ku sisiwana, na hi txi alakanya mapswi a Mkoma Jesu, a nga khene: ‘Kuha i kateko ya hombe ngutu kupinda kuhiwa.’ ”

³⁶ Ka mapswi awa, a to khizama e khongela kumweko navo votshe.

³⁷ Votshe va to khata kudila ngutu, va txi demberela m'thamoni ka Paulo,

³⁸ Va txi mu pswopswa, na va txi karateka ngutu ngu mapswi awa a nga ma womba; a ku khene kha va na mbiswa ve wona kambe khohe yakwe. Msana keto, va to mu heleketa kala kuhoka txitimelani.