Mithumo 19 - Bhiblia Yo Sawuleka

Ta Paulo ngako a txi gondisa Efesu

¹ Ngako Apolosi a di ngadi Korinto, Paulo a to tshawunyeta matiko a Aziya e relela eya Efesu. A ti ya mana koneyo vagondiswa vokari,

² a txi khene kwawe: “Mi amukete Moya wo Sawuleka ditshiku di mi nga kholwa ngu dona kani?” Vona va to angula va txi kha vona: “Kha hi zivi ku nga tipfa ti to waho Moya wo Sawuleka.”

³ Se ene a nje khene: “Kasi mi bhabhatisilwe ngu txibhabhatiso muni kani?” Vona va to angula, va txi kha vona: “Ngu txibhabhatiso txa Johani.”

⁴ Konaho Paulo a to va gela, a txi khene: “Johani a bhabhatisile ngu txibhabhatiso txi txi yisako kuhundulukani, na a txi gela vathu ti to ve kholwa ka wule a nga txi ta msana kwakwe, i ku Jesu.”

⁵ Ngako va di engisile tiya, va to bhabhatiswa ditinani ka Mkoma Jesu.

⁶ Se mbimo yi Paulo a nga va sanzeka manza, Moya wo Sawuleka wu to txhika txitimwi kwawe, se vona ve khata kuwombawomba tidimi ni kuprofeta.

⁷ Vavamna vava va ti lava kuva digumi ni vambidi.

⁸ Paulo a to wulela disinagogani, se e heta mitxima yiraru, a txi womba-womba ngu kutsana timhaka ta Mfumo wa Txizimu, a txi zama kukholwisa avale va nga ti mu engisa.

⁹ Vamwani va to bangisa timbilu tawe, se ha wukhaloni ka kukholwa, va to sola Nzila ya Mkoma, kona hale masoni ka vathu. Paulo a to khukha masoni kwawe e tsula, e teka vagondiswa ngu phuho, a txi va gondisa dipswi, ditshiku ni ditshiku, txikolani ka Tirano.

¹⁰ Timhaka tiya ti tsimbitisile tonatiya kala kuguma malembe mambidi; ahawa va nga za ve kholwa votshe vathu va Aziya, Vajudha ni Vagriki, ngu kupfa dipswi da Mkoma.

Vanana va majaha va Skevha

¹¹ Txizimu txi ti thuma ngu manza a Paulo sidiwukiso so xamalisa ngutu,

¹² Ahawa ka kuza vathu ve teka mafadhuko ni tinguwo ti ti nga ti gwesile mmidi wakwe, ve ti kapeka txitimwi ka valwali, se vona ve kalamuka ka malwati awe, ni mimoya yo biha yi huma kwawe.

¹³ Se Vajudha vokari, i nga ti vo tsimbila ve tovela madhimoni, va to duketa ni vona kukhongela ngu ditina da Jesu txitimwi ka vale va nga ti ni mimoya yo biha, va txi kha vona: “Ani na kudhusa ngu Jesu wu a wombwako ngu Paulo.”

¹⁴ Vona i ti ti vanana va majaha va mtxhanu ni vambidi va Skevha, Mujudha, mthangeli wa vaphaxeli, ava va nga ti ti maha toneto.

¹⁵ Kambe moya wo biha wu to angula, wu txi kha wona: “Jesu ani na m'ziva. Paulo nene na tiziva ti to i mani. Aniko anu mi vamani kani?”

¹⁶ Konaho, awule wo ñolwa ngu moya wo biha, a to va ndakela a txi va xula votshe a txi va pfinya, ahawa ka kuza ve huma nyumbani ve thava, va sa ambala txilo, na va di ni tivandwa.

¹⁷ Votshe vathu va Efesu, Vajudha ni Vagriki, va yi zivile mhaka yiya. Votshe ve tala ngu kuthava. Se di kuliswa ditina da Jesu.

¹⁸ Vavangi ka vale va nga ti amukete likholo, va ti ta, va ta ti sola ni kulandula ati va nga ti maha kale.

¹⁹ Vavangi ka vale va nga txi ti ningetela ka masalamuso va to teketela mabhuku awe, va txi ta ma hisa masoni ka votshe vathu. Mbimo yi ku nga lawa kuziwa mtengo wa male ya ona, va to wona ti to ma nga teka 50.000 wa male ya silivhela.

²⁰ Ngu toneto, Dipswi da Mkoma di ti anda ni kutsaniswa ngu mtamo wa hombe.

Dizunga di di nga humelela ani Efesu

²¹ Na ti di mahekile tiya, Paulo a to kurumetwa ngu moya kuya Jerusalema, e pinda ngu Makedhoniya ni Akaya, a txi khene: “Msana ka kuva ni di zumbile niya, khene, ta laveka kambe ti to ni ya wona Roma.”

²² Se a to rumela kona Makedhoniya vavhuneteli vakwe va vambidi, ene Timoti ni Erasto, se ene e sala e zumba Aziya mbimo yokari.

²³ Ka ona masiku ale, ku tumbulukile dizunga da hombe ngu mhaka ya Nzila ya Mkoma.

²⁴ M'thu wokari, ditina dakwe a nga ti dhanwa ku i Dhemetriyo, mtshuli wa simaha sa nzalama a ti ti khanda mathepele a silivhela a Artemi, se a ti ninga dibhindu da kuzivaneka ta tinene ka vatshuli kulowe.

²⁵ Ngako a di va sengeletile ni kumweko ni vamwani vamahi va yimwani mithumo yo fanana, a to va gela, a txi khene: “Vandoni vangu, ma tiziva ti to dibhindu dathu di ta ngu ka wona mthumo wuwa,

²⁶ kambe ma ti wona ni ku tiengisa va txi womba ti taku Paulo wuwa wa kujetela vathu, votala, i si nga Efesu muwa dwe, aniko a lavile kueneta dotshe ditiko da Aziya, a txi va hambukisa ngu ku va gela ku khene sizimu si si mahwako ngu manza athu, hi nga sizimu sa txilo.

²⁷ Sekoko, hi nga wona mthumo wu wathu dwe wu no va ni dikhombo do poyilelwa, aniko hambi dithepele da Artemi, i ku txizimu txa hombe txa wamsikati, ni dona di na poyilelwa: Se wuzimu wa wule a khozelwako ngu dotshe ditiko da Aziya ni otshe mamwani matiko, wu ndi na hinduka wu txi va i si nga wa txilo.”

²⁸ Ka mapswi awa, votshe va va nga ma engisa, va to tala ngu kuhenya, va txi kwangula va txi kha vona: “Wahombe ngu Artemi wa Efesu.”

²⁹ Dizunga di to tshanganisa txotshe txidhoropana, se vathu ngu ntalo ve tutumela ka wukhalo wa misakano, na va txi ruruvisa Gayo ni Aristarkusi, vathu va Makedhoniya va nga ti tsimbila kumweko ni Paulo.

³⁰ Ene Paulo a ti lava kutiwonekisa masoni ka msengeletano wa vathu, aniko vagondiswa va to mu tsimbisa.

³¹ Hambi vamwani hagari ka tinganakana ta ditiko da Aziya, ava i nga ti vangana vakwe Paulo, va rumete dipswi kwakwe, kuya mkhongotela ti to asi ti ningeli apune ngu kutsula ka wukhalo wule wa misakano.

³² Mmwani ni mmwani a txi kwangula, nguko dibutho di ti hagari ka vhilinganya se wungi wawe va si ti zivi ti to va tshanganela txani.

³³ Sekoko va to humisa Alexandre ngu hagari ka dibutho, awu a nga ti gondisilwe ngu kale, a txi susumetelwa masoni ngu Vajudha. Alexandre a to guleta diwoko na a txi kombisa ti to a lava kutxhamusela mhaka ka dibutho.

³⁴ Aniko mbimo yi va nga tiziva ti to ene i Mujudha, votshe va to khata kukwangula ngu dipswi dimwedo, ngu mbimo ya kudingana sikhati simbidi, va txi kha vona: “Wahombe ngu Artemi wa Efesu.”

³⁵ Sekoko ngu kugwitisa, mabhalani a to malata dibutho, a txi khene: “I mani m'thu wu a si tiziviko ti to didhoropa da Efesu, ngu dona di xayisako dithepele da Wahombe Artemi, ni txithombe txakwe, txi nga wa ngu nzumani, kani?

³⁶ Ngu toneto, ngako tiya ti di tsani, mi fanete kuzumba mi di ni kudikha, mi si mahi txilo ngu magwava.

³⁷ Vavamna va mi nga va tisa hawa, kha va na mnandu wa kuruka sa wukhongeli, ka si si lumbako Txizimu txathu txa txisikati.”

³⁸ “Ngu konaho, ngako Dhemetriyo ni vatshuli-kulowe, va ku nayo, va di ni txikhalo ni mmwani m'thu, ku ni masiku a dibanza da votshe vathu, kumweko ni vaemeli va wukoma; va nate va ta xuxisana ha banzani.

³⁹ Aniko ngako ku di ni yimwani mhaka ya kuxuxa, eyo mhaka yi na ya wilwa ngu msengeletano wu wu no va wu di rambilwe ngu mlayo.

⁴⁰ Nguko hi nga maneka i di athu hi ku ni mnandu wa kuwusa dizunga ngu mhaka ya msengeletano wu wa nyamsi; kunene kha ku nga ni txigelo tximwani txi fanelako ku hi emela ngu mhaka ya msengeletano wuwa.”

⁴¹ Se a di wombile mapswi awa, a to hangalasa msengeletano.