Mithumo 18 - Bhiblia Yo Sawuleka

Ta Paulo ngako a di Korinto

¹ Msana ka toneto, Paulo a to khukha Atena e tsula Korinto.

² Koneyo a ti ya mana Mujudha wokari, a nga ti dhanwa ku i Akila wa kuvelekelwa Ponto, na a di ngadi kubwaka ngu Italiya, kumweko ni Prisila, msikati wakwe; nguko Klawudhiyo a ti vekile mthetho wa ku votshe Vajudha va na khukhe Roma. Se Paulo a to ya kwawe.

³ Se ngako i nga ti wa mthumo wumwewo navo, va ti ni mthumo wa kuluka matenda, a to zumba navo a txi thuma.

⁴ Se ngu otshe masiku a Masabbata a ti womba-womba disinagogani e kholwisa Vajudha ni Vagriki.

⁵ Mbimo yi Silasi ni Timoti va nga ta ngu Makedhoniya, Paulo a to ti ningetela kugondisani ka dipswi dwe, e tsanisa masoni ka Vajudha ti to Mesiya ngene Jesu.

⁶ Kambe ngako a txi wona kukaneta kwawe, ni kuruka kwawe, Paulo a to zuza tinguwo takwe, a txi khene kwawe: “Mnoha wanu wu nave txitimwi ka misungo yanu. I di ani ni basile: Kukhukhela konkuwa ni na tsula ka vamatiko.”

⁷ Ku ti ngako a di humile hale, a to ya wulela nyumbani ka mmweyo a dhanwako ku i Titiyo Justo, mkhozeli wa Txizimu, awu nyumba yakwe yi nga ti gwatamile ni disinagoga.

⁸ Krispo, mthangeli wa disinagoga a to kholwa ka Mkoma ene ni yotshe ngamu yakwe; ni Vakorinto vavangi, ngako va txi engisa Paulo, va to kholwa ni vona, ve bhabhatiswa.

⁹ Se Mkoma e humelela ka Paulo ngu txiwoniso ni wusiku, a txi khene kwakwe: “U nga thave, womba-womba, u nga malale,

¹⁰ nguko ani ni ni nawe, kha ku nga ni m'thu wu a no kuwukela e kumaha ta walo nguko nina ni vathu vavangi didhoropani muwa.”

¹¹ Se a to zumba konamo dilembe ni mtxhanu wa mitxima ni wumwewo e va gondisa dipswi da Txizimu.

¹² Mbimo yi Galiyo i nga ti muemeli wa wukoma ditikoni ka Akaya, Vajudha va to langana kuwukela Paulo, ve mteka, ve mu yisa dibanzani,

¹³ va txi ya kha vona: “Awuwa a susumeta vathu ti to ve khozela Txizimu ngu nzila yo hambana ni mlayo.”

¹⁴ Paulo, a di ngadi a txi lava kutula txisofu, Galiyo a to gela Vajudha, a txi khene: “Anu Vajudha, ngako i di mahungu a mhaka ya kugombonyeka mi wombako ona mwendo ya wubihi wumwani, ni ndi na amukela kumangala kwanu;

¹⁵ kambe ngako i ku kukanetisana ngu mhaka ya mapswi ni matina ni Mlayo wanu, thethisanani mipune, nguko ani kha ni lavi ku ti maha muabanisi wa timhaka to ngeto.”

¹⁶ Se e va tovela dibanzani.

¹⁷ Sekoko votshe va to ñola Sostene, mthangeli wa disinagoga, ve mu peka masoni ka dibanza, aniko Galiyo kha khatala ngu tona.

Paulo a txi tshumela e tsula Antiyokiya

¹⁸ Paulo a zumbile Korinto masiku amangi. Msana keto, a to siya vanawe e tsula Siriya ngu txitimela, a di ni Prisila ni Akila. Madingano ni txixambanyo txi a nga txi maha, a to kuyulwa misisi a di Kenkreya.

¹⁹ Ku ti ngako va di hokile Efesu, Paulo a to ya va siya kona, se e wulela disinagogani eya kanetisana ni Vajudha.

²⁰ Vona va to mkombela ku e engetela masiku a kuzumba navo, kambe kha tumela.

²¹ Se a to va salisa, a txi khene: “Ni na tshumela ni wuya kwanu, ngako Txizimu txi txi ti lava.” Se a to khukha Efesu e tsula ngu txitimela.

²² Ku ti ngako a di hokile Khezareya, a to kwela eya losana ni dibanza da makholwa, ngu msana e kwitima eya Antiyokiya.

Dipfhumba da Wuraru da Paulo ( 18:23--21:16 ) Apolo kona Efesu ni Korinto

²³ Ngako a di zumbile mbimoanyana koneho, a to khukha kambe e horolokela matiko a Galatiya ni Frigiya na a txi tsanisa votshe vagondiswa.

Apolosi ngako a txi hoka Efesu

²⁴ Mujudha wokari a dhanwako ku i Apolosi, awu a nga velekelwa Alexandriya, a ti tile Efesu. I ti m'thu wa kuziva kuwombawomba ni kuziva Mibhalo.

²⁵ A ti gondisilwe nzila ya Mkoma, se ngu kukhutala kwakwe moyani a ti womba-womba ni kugondisa timhaka ta Jesu, ngu longoloko ya yinene, hambiko a nga ti ko ziva txibhabhatiso txa Johani dwe. Ngu konaho Apolosi a to khata kuwombawomba disinagogani, asi thavi txilo.

²⁶ Ku ti ngako Prisila ni Akila va di mu engisile, va to mteka ve mu txhamusela ta tinene Nzila ya Txizimu.

²⁷ Se ngukuva a nga ti lava kuya Akaya, vanawe va to mtsanisa ve bhalela dipapilo vagondiswa, kasiku ve mu amukela. Ngako a di bwakile kwawe, a vhuni ngutu makholwa ngu wunene wa kateko ya Txizimu.

²⁸ Nguko a ti ti va kona Vajudha ngu mtamo ha vathuni, e va kombisa ngu Mibhalo ti to Jesu ngene Mesiya.