Mithumo 16 - Bhiblia Yo Sawuleka

Paulo ni Silasi ni Timoti

¹ Paulo a to hoka Dherbhe ni Listra. A ti ti ho koneyo mgondiswa wu a nga ti dhanwa ku i Timoti, mame wakwe i ti Mujudha wu a nga ti hundulukile e maha dikholwa, tate wakwe i ti Mugriki.

² Timoti a ti sumwa wunene ngu vanawe va Listra ni Ikoniyo.

³ Paulo a to pimisa ku mteka e tsula nayo. Kunene a to mteka, se e mu yisa wukwerani, ngu mhaka ya Vajudha va va nga ti ka maphambo onayo, nguko votshe va ti tiziva ti to tate wa Timoti i Mugriki.

⁴ Ka madhoropa awa va nga ti pinda ngu ka ona, va ti zivisa vanawe milayo yi yi nga vekwa ngu Vapostoli ni madhota a Jerusalema, va txi va laya ti to ve mi veketa.

⁵ Ngu konaho, mabanza ma ti tsaniswa amu ka likholo, me anda ditshiku ni ditshiku.

Paulo ngako a txi wona txiwoniso txa m'thu wa Makedhoniya

⁶ Paulo ni Silasi va to pinda ngu Frigiya ni Galatiya, nguko Moya wo Sawuleka wu ti va tsimbile kutxhumayela Dipswi ditikoni ka Asiya.

⁷ Se ngako va di hokile mihinganoni ka Misiya, va to duketa kuwulela ditikoni ka Bhitiniya, kambe Moya wa Jesu kha wa va tumelela.

⁸ Konaho va to dhawula da Misiya, se ve relela Trowasi.

⁹ Se ni wusiku, Paulo a to wona txiwoniso: Wamwamna wa Makedhoniya masoni kwakwe, e mkombela, a txi khene: “Ngono Makedhoniya u ta hi vhuna.”

¹⁰ Msana ka txiwoniso txiya a nga txi wona Paulo, konako hi to ti longisela kasi kuya Makedhoniya, ngu kuziva ti to Mkoma a ti hi dhana kuya txhumayela kona Evhangeli.

Kubhabhatiswa ka Lidhiya

¹¹ Ngako hi di khukhile Trowasi ngu txitimela, hi to teka nzila ya kukonama Samotraka, se mangwanani ka kona hi ya Neyapoli.

¹² Ngako hi txi khukha konaho, hi to konama kuya Filipiya, i ku Didhoropa da Hombe, ditikoni ka Makedhoniya, koloniya ya Varoma. Se hi zumbile ka didhoropa diya masiku okari.

¹³ Ngu ditshiku da Sabbata, hi to huma ngu didhoropani hi ya mnamboni, ahawa hi nga pimisa ti to ku nga va ni wukhalo wo khongela kona. Ngako hi di khalahatshile, hi to womba-womba ni vavasikati, va nga ti sengeletani konaho.

¹⁴ Se mmweyo wa wamsikati, awu a nga ti dhanwa ku i Lidhiya, mxavisi wa tinguwo ta masilika o bhilivila, wa kuta ngu Tiyatira, awu a nga ti ni txithavo ka Txizimu, a ti ti hi engisela; se Mkoma a to tula mbilu yakwe, kasiku e engisa mapswi awa Paulo a nga ti womba-womba ona.

¹⁵ Se ngako a di bhabhatisilwe, kumweko ni va nyumba yakwe, a to hi kombela a txi khene: “Ngako mi txi ni wona ni di thembekile ka Mkoma, ngonani mi ta zumba nyumbani kwangu.” Se e hi kurumeta kuya kona.

Kuñolwa ni kuthukunyulwa ka Paulo ni Silasi va di Filipiya

¹⁶ Ka dimwani ditshiku, ngako hi txi ya kukhongelani, hi to manana ni muhorana wa khumbi, awu a nga ti ni moya wa kuhuta. A ti ninga dibhindu da hombe vanyamne vakwe ngu mhaka ya kona kuhuta.

¹⁷ Se a to londeta Paulo ni nathu, na a txi kwangula, a txi khene: “Vathu vava mbathumeli va Txizimu Nyatxitimwi; vona va mi zivisa nzila ya kuhanyisa.”

¹⁸ E tama a txi mahisa toneto masiku amangi; se Paulo e xamukiswa ngutu, a txi gwita ngu kutshembereka a txi gela moya, a txi khene: “Na kuruma ngu ditina da Mkoma Jesu Kristu: Huma ka muhoraneyo.” Se kunukunuko moya wu to huma.

¹⁹ Aniko vanyamne va khumbi, ngako va txi wona ti to dibhindu di va nga ti themba dona di mwalate, va to ñola Paulo ni Silasi, ve va ruruvisela banzani masoni ka vafumeli;

²⁰ se va to va yisa ka valamuli, va txi kha vona: “Vathu vava i Vajudha, kambe va wusa mazunga didhoropani kwathu;

²¹ Va gondisa mikhuwo yi hi si faneliko ku yi londetela ni ku yi maha athu hi ku Varoma.”

²² Se dibutho di to va wukela: Valamuli va to va tshambula syambalo, ve ruma kuve pekwa ngu tindonga.

²³ Ngako va di va humisile tivandwa ta tingi, va to va beta mkorani, ve leleta muwoneleti wa mkora kasiku e va woneleta ta tinene.

²⁴ Ene, ngako a di amukete txileleto txiya, a to va wuleta ka txinyumbana txi txi ku mndani ka mkora, e va sungelela minenge ha mitandani.

²⁵ Hagari ka wusiku, Paulo ni Silasi va ti khongela, ve embelela tindando ta kudhumisa Txizimu; se ava va nga ti seketwe navo va to va engisa.

²⁶ Kunukunuko ku to humelela kudekadeka ka hombe ka mafu, kuza kudekadekiswa ni marigwi a hahatshi ka mkora; matimba me tuleka, se titxhini ta votshe ti thuseka.

²⁷ Muwoneleti wa mkora a to wuka ngu wukoheni, se ngako a txi wona matimba a mkora ma di tulelekile, a to swomola ditxhari dakwe, e lava ku ti daya, ngu kupimisa ti to sotshe sibotxhwa si thavile.

²⁸ Kambe Paulo a to kwangula ngu dipswi da hombe, a txi khene: “U nga ti mahe ta walo, nguko hi ho hotshethu.”

²⁹ Muwoneleti wa mkora a to kombela msanje, e tutuma eya wulela mkorani eya ti wisa minengeni ka Paulo ni Silasi, na a txi dhudhumela.

³⁰ Se ngako a di va humisile hahanze, a to khene kwawe: “Vanyamne, nji txani ni fanelako ku txi maha kufela ku ni hulukiswa kani?”

³¹ Vona va txi kha vona: “Kholwa ka Mkoma Jesu Kristu, se u na huluswa awe ni va mwaya wako.”

³² Se ve mu txhumayela dipswi da Mkoma, kumweko ni ka votshe va va nga ti nyumbani kwakwe.

³³ Se muwoneleti wa mkora a to va teka ka yona mbimo yile ya wusiku e va kuwulela tivandwa tawe; se konaho e bhabhatiswa ene ni yotshe ngamu yakwe.

³⁴ Sekoko a to kwela e tsula navo nyumbani kwakwe eya va vekela sakudya masoni kwawe; se a to tsaka ni yotshe ngamu yakwe ngu kuwa va nga kholwa ka Txizimu.

³⁵ Ngako di txi txa, valamuli va to ruma maphoyisa kuya gela muwoneleti va txi kha vona: “Thukunyula vathuvo ve tsula.”

³⁶ Muwoneleti wa mkora a to zivisa Paulo mhaka yiya, a txi khene: “Vanyamne va rumete ku mi thusa, humani konkuwa mi tsula ngu kudikha.”

³⁷ Kambe Paulo a to khene kwakwe: “Va hi pekile masoni ka vathu hi sinzi kuthethiswa, na athu hi di Varoma, ve hi vinza mkorani. Se konkuwa va lava ku hi humisa ti si ziwi ngu m'thu kani? Lambi! Va nate vona ngu wutumbu wawe, va ta hi humisa hahanze.”

³⁸ Maphoyisa ma to yisa mapswi awa ka vafumeli. Se vona, ngako va txi pfa ti to mba Roma, va to wika misana.

³⁹ Sekoko va to ta, va ta kombela divalelo, se ve va humisa hahanze, ve va kombela ti to ve huma didhoropani kwawe.

⁴⁰ Ngako va di humile ngu mkorani, Paulo ni Silasi va to tsula ka Lidhiya. Se ngako va di wonani ni vanawe, va to va laya, ve khukha ve tsula.