Mitengo 9 - Bhiblia Yo Sawuleka

Pasika ya wumbidi

¹ Se Mkoma a to womba ka Mosi amu txiwulani ka Sinayi, ngu mtxima wo khata ka dilembe da wumbidi, msana ka kuva va di humile ngu Egipta, a txi khene:

² Vanana va ka Israyeli va na xayise Pasika ngu timbimo ta kona.

³ Mi na yi maha ngu mbimo yi yinga emiswa ngu Mkoma, ngu ditshiku da digumi ni mune ka wona wuwa mtxima, ni minova, mi na yi maha ngu milayo ya kona yotshe, ni sileleto sa kona sotshe.

⁴ Se Mosi a to gela vanana va ka Israyeli ti to va fanete kuxayisa Pasika.

⁵ Sekoko va yi xayisile Pasika amu txiwulani txa Sinayi, amu ka ditshiku da digumi ni mune ka mtxima wo khata, ni minova. Vanana va ka Israyeli va to maha totshe ti Mkoma a nga leleta ka Mosi.

⁶ Ka onayo masiku, ku ti ti ni vathu va nga ti nyenyezisilwe ngu txirumbi txa m'thu wa kufa, se ve yila ngu donedo ditshiku. Va tota masoni ka Mosi ni ka Aroni, ve ta ti kombisa.

⁷ Se vavamna vale va to kha vona: Hi nyenyezisilwe ngu txirumbi txa m'thu, ina hi na tsimbwa kuningela mningelo ka Mkoma, ngu txikhati txi nga emiswa ka vanana va ka Israyeli kani?

⁸ Se Mosi a ti khene kwawe: Khalahatshani, na engisa ti Mkoma a no mi leleta tona.

⁹ Sekoko Mkoma a to womba ka Mosi, a txi khene:

¹⁰ Gela vanana va ka Israyeli u txi khawe: Ngako wokari hagari kwanu mwendo hangari ka tiveleko tanu, a txi tipfa ti to a nyete ngu mhaka ya kugwesa m'thu wa kufa, mwendo a mu kuendani ka dipfhumba da hombe, a fanete kuxayisa ditshiku da Pasika ya Mkoma.

¹¹ Va na dya ni vona ngu ditshiku da dingumi ni mune, ka mtxima wa wumbidi, ni minova ya kona, va na dya txinvutana txa Pasika, ni mapawu a kwa mbi tshumbelwa, ni mazokoro o bava.

¹² Se mbimo ya kudya, va nga siye txo tadya mangwana, kambe va nga funye dirambu ni da dimwedo; mi na maha madingano ni sotshe sileleto sa Pasika.

¹³ Kambe ngako m'thu a di sawulekile, a sa nga enda e leka kudya Pasika, eyo m'thu a na tutumiswa ka va ka kwawe, nguko kha nga humisa mningelo wa Mkoma ngu mbimo ya wona, eyo m'thu a na rwala mnandu wakwe apune.

¹⁴ Ni ku ngako mluveli wu a nga aka hagari kwanu, a txi lava kudya Pasika, madingano ni sileleto sa yona, mlayo wa kona wu na fana ni wu wanu, ka mluveli ni ka txizikwa txa ditiko.

Direfu txitimwi ka Ditenda do Sawuleka

¹⁵ Se ka ditshiku di va nga gwita kugwimba ditenda da msengeletano, direfu da Mkoma di to fenengeta nyumba ya kona, se kukhukhela ni minova, ku txi woneka txo nga mndilo wo tura txitimwi ka nyumba, kala ni mixo.

¹⁶ Direfu di ti ti fenengeta nyumba yotshe mbimo, ni wusiku ku txi woneka txifananiso txo nga mndilo wo tura.

¹⁷ Aniko, mbimo yi direfu di gulekako txitimwi ka nyumba, vanana va ka Israyeli va txo khukha, se aha direfu di emako, ni vona vanana va ka Israyeli va txo ema konaho, ve gova, ve gwimba matenda awe.

¹⁸ Vanana va ka Israyeli va ti ti khukha ka wukhalo ngu kuleleta ka Mkoma, ni ha va nga ti gova kona va ti ti ema, ve gova kona ngu kuleleta ka Mkoma, ve zumba matendani kwawe, aha direfu di nga ema.

¹⁹ Hambi ngako direfu di txi swela ka wukhalowo, di heta masiku o tala txitimwi ka nyumba, vanana va ka Israyeli va txa so landisela kuleleta ka Mkoma, va si khukhi.

²⁰ Ka simwani sikhati, direfu di ti ti ema masiku amadotho txitimwi ka nyumba, ngu kuruma ka Mkoma, va ti ti khukha va sa nga gova masiku o tala.

²¹ Kambe ngako direfu di txi ema kukhukhela minova kala mixo, di txa nga khukha direfu ni mixo yile, ni vona va txa so khukha; ngako direfu di txi zumba ditshiku dotshe ni wusiku, va si sikoti kukhukha.

²² Hambi ngako direfu di txi zumba txitimwi ka nyumba masiku mambidi, mwendo mtxima, mwendo mbimo yo lapha ngutu, ni vona vanana va ka Israyeli va ti ka so zumba ka matenda awe va si khukhi; se ku nga ti direfu di txi khukha ni vona va txo khukha.

²³ Va ti gwimba matenda ngu kuleleta ka Mkoma; se ngu kuleleta ka Mkoma va txi khukha; vona va ti ti xayisa txileleto txa Mkoma, madingano ni ti Mkoma a nga womba ngu dianza da Mosi.