Mitengo 7 - Bhiblia Yo Sawuleka

Miningelo ya vathangeli va tihunzu

¹ Ngu ditshiku di Mosi a nga gwitisa kuaka Ditenda da Msengeletano, a to di tota mafura, ni ku di katekisa, kumweko ni sotshe simaha sa dona, ni txiluvelo.

² Vathangeli va ka Israyeli, va to maha mningelo, i ku misungo ya mimwaya ya vatate vawe, avale i ku vathangeli va tihunzu, ni kuva va nga balwa;

³ se va to ningela masoni ka Mkoma, mtxhanu wa sikotxikani ni tximwetxo si nga fenengetwa, ni digumi da tihomu ni timbidi, txikotxikani tximwetxo i ti vathangeli vambidi ni homu yimweyo ka mthangeli mmwani ni mmwani. Va to si ningela masoni ka nyumba yo sawuleka.

⁴ Se Mkoma a to womba ka Mosi, a txi khene:

⁵ “Si amukele awe Mosi, nguko si na lumba mthumo wa Ditenda da Msengeletano, u na si ningela ka Valevhi; mmwani ni mmwani ka mthumo wakwe.”

⁶ Ngu kumaha keto, Mosi a to teka sikotxikani ni tihomu, e si ningela ka Valevhi.

⁷ Vanana va Gerisoni a va ningile sikotxikani simbidi ni mune wa tihomu, madingano ni mthumo wawe.

⁸ Ka vanana va Merari a va ningile mune wa sikotxikani, ni mtxhanu wa tihomu ni tiraru, e ninga madingano ni mthumo wawe, awu va nga thangelwa ka wona ngu Itamari, mwana mphaxeli Aroni.

⁹ Se vanana va ka Kohate, kha va nga ningwa txilo, nguko mthumo wawe i ti wo pakata siya so sawuleka.

¹⁰ Se vathangeli va to ningela miningelo yawe ya mphaxo wa ha txiluveloni, ngu ditshiku di va ngadi sawula.

¹¹ Se Mkoma a to khene ka Mosi: Mthangeli mmweyo ni mmweyo a na ningela miningelo wakwe (mmwani ni mmwani ngu ditshiku dakwe), ka msengeletano wa txiluvelo.

¹² Awu koko a nga ningela mningelo wakwe ngu ditshiku do khata i Nasoni, mwana Aminadhabhe, wa lihunzu la ka Judha.

¹³ Se mningelo wakwe i ti ti wa mbiya ya silivhela, ya kunemela ka 130 wa maxekele, ni mbiya ya silivhela, ni mtxhanu wa magumi ni magumi mambidi a maxekele, madingano ni maxekele a wukhalo wo sawuleka; ka totshe timbiya tatimbidi, ti di tate ngu mpupu wo kanyangelwa ni mtona, kasi kumana mningelo wa sakudya;

¹⁴ digombe dimwedo da nzalama, adi kunemela ka dona i ku ka digumi da maxekele, do tala ngu dibaselo;

¹⁵ dirole da matune, ni txinvutana tximwetxo txa matune, txa dilembe dimwedo ni hamba, kasi kumaha mningelo wo hiswa;

¹⁶ mabhongwe, kasi kumaha mningelo wa txionho;

¹⁷ ni kumaha mphaxo wa kuthutha, se ni tihomu timbidi, ni mtxhanu wa tihamba, ni mtxhanu wa vamabhongwe, ni mtxhanu wa sinvutana sa dilembe dimwedo; awuwa ngu wona mningelo wa Nasoni, mwana Aminadhabhe.

¹⁸ Ka ditshiku da wumbidi, awu a nga maha mningelo wakwe i Nathaniyele, mwana Zuwari, mthangeli wa Isakari.

¹⁹ Se ka mningelo wakwe a to ningela mbiya ya silivhela, ya kunemela ka 130 wa maxekele, ni mtxhanu wa magumi ni magumi mambidi a maxekele, a wukhalo wo sawuleka; ni mbiya. Se totshe timbiya tiya ti di tate ngu mpupu wo tshura, wo kanyangwa ngu mtona, kasi kumaha mningelo wa sakudya;

²⁰ ni khadi ya nzalama ya digumi da maxekele ma di tate ngu dibaselo;

²¹ ni dirole da matune, ni hamba, ni txinvutana txa dilembe dimwedo, kasi kumaha mphaxo wa kuhiswa;

²² ni mabhongwe wa mphaxo wa txionho;

²³ ni sa mphaxo wa kuthutha, ni tihomu timbidi, ni hamba, ni mtxhanu wa vamabhongwe, ni mtxhanu wa tihamba ta dilembe dimwedo; awuwa ngu wona mningelo wa Nathaniyele, mwana Zuwari.

²⁴ Ka ditshiku da wuraru, ku to ningela Eliabhe, mwana Eloni, mthangeli wa vanana va lihunzu la Zebhuloni.

²⁵ Mningelo wakwe i ti ti wa mbiya ya silivhela, ya kunemela ka 130 wa maxekele, ni mtxhanu wa magumi ni magumi mambidi a maxekele, madingano ni dixekele da wukhalo wo sawuleka; ka miningelo yimbidi, yi di tate ngu mpupu wo tshura, wo kanyangelwa ngu mtona, kasi kumaha mningelo wa sakudya.

²⁶ Se ku ti ti ni dijingo da nzalama, da digumi da maxekele yo tala ngu dibaselo;

²⁷ ni dirole da matune, ni hamba, ni txinvutana tximwetxo txa dilembe dimwedo, kasi kumaha mphaxo wo hiswa;

²⁸ ni mabhongwe, kasi kumaha mphaxo wa txionho;

²⁹ Ni kumaha mphaxo wa kuthutha, tihomu timbidi, mtxhanu wa tihamba, ni mtxhanu wa vamabhongwe, ni mtxhanu wa sinvutana sa dilembe dimwedo; awuwa ngu wona mningelo wa Eliyabhe, mwana Eliyoni.

³⁰ Ka ditshiku da wumune, a tisile mningelo wakwe Elizuri, mwana Sedhewuri, mthangeli wa vanana va ka Rubheni.

³¹ Mningelo wakwe mbwa mbiya ya silivhela, kunemela ka wona i di ka 130 wa maxekele, yi ku ni mtxhanu wa magumi ni magumi mambidi a maxekele, madingano ni dixekele da wukhalo wo sawuleka. Se amu ka timbiya timbidi, ti di tate ngu mpupu wo tshura wo kanyangelwa ngu mtona, kasi kumaha mningelo wa sakudya.

³² Se dijingo da nzalama, ya digumi da maxekele, do tala ngu dibaselo;

³³ dirole, ni hamba, ni txinvutana txa dilembe dimwedo wukale wa txona, kasi kumaha mningelo wo hiswa.

³⁴ Mabhongwe wa mphaxo wo thavisa txionho,

³⁵ ni mphaxo wa kuthutha, ni tihomu timbidi, ni mtxhanu wa tihamba, ni mtxhanu wa vamabhongwe, ni mtxhanu wa tihamba ta dilembe dimwedo wukale wa tona. Awuwa i ti mningelo wa Elizuri, mwana Sedhewuri.

³⁶ Ka ditshiku da wutxhanu, a tisile mningelo wa Selumiyeli, i ku mwana Zurixadhayi, mthangeli wa vanana va ka Simiyoni.

³⁷ Mningelo wakwe i ti ti wa mbiya ya silivhela, awuwa kunemela ka wona i ku ka 130 maxekele, ni mkamba wa silivhela, kunemela ka wona i ku ka mtxhanu wa magumi ni mambidi a maxekele, madingano ni dixekele da wukhalo wo sawuleka, ni timbiya timbidi, ti di tate ngu mpupu wo tshura, wu ti kanyangetwe ngu mtona, kasi kumaha mningelo wa sakudya.

³⁸ Dijingo dimweyo da nzalama, adi kunemela ka dona i ku ka digumi da maxekele, do tala ngu dibaselo.

³⁹ Ku ti ni dirole da matune, ni hamba, ni txinvutana txa dilembe dimwedo, kasi kumaha mphaxo wo hiswa;

⁴⁰ ni mabhongwe wa mphaxo wo thavisa txionho;

⁴¹ Ni mphaxo wa kuthutha, ni tihomu timbidi, ni mtxhanu wa tihamba, ni mtxhanu wa vamabhongwe, mtxhanu wa sinvutana sa dilembe dimwedo; awuwa ngu wona mningelo wa Selumiyeli mwana Zurixadhayi.

⁴² Ngu ditshiku da wutxhanu ni dimwedo, a nehile mningelo wakwe Eliyasafi, mwana Reweli; mthangeli wa vanana va ka Gadhi.

⁴³ Mningelo wakwe mbwa mbiya ya silivhela, wu ku ni kunemela ka 130 wa maxekele, ni mkamba wa silivhela, awu kunemela ka wona i ku ka mtxhanu wa magumi ni magumi mambidi a maxekele, madingano ni dixekele da wukhalo wo sawuleka, sotshe sa simbidi so tala ngu mpupu wo tshura, wu nga kanyangwa kumweko ngu mtona, kasi kumaha mningelo wa sakudya.

⁴⁴ Dijingo da nzalama, ayi kunemela ka yona i ku ka digumi da maxekele yo tala ngu dibaselo.

⁴⁵ Ku ti ni dirole, ni hamba, ni txinvutana txa dilembe dimwedo, kasi kumaha mphaxo wa kuhiswa;

⁴⁶ ni mabhongwe wa mphaxo wa txionho.

⁴⁷ Kasi ta mphaxo wa kuthutha, tihomu timbidi, ni mtxhanu wa tihamba, ni mtxhanu wa vamabhongwe, ni mtxhanu wa sinvutana sa dilembe dimwedo; awuwa ngu wona mningelo wa Eliyasafe, mwana Reweli.

⁴⁸ Elisama, mwana Amihudhi, mthangeli wa vanana va ka Efrayime, a to ningela siya:

⁴⁹ Mningelo mbwa mbiya ya silivhela, wu ku ni kunemela ka 130 wa maxekele, ni mkamba wa silivhela, awu kunemela ka mtxhanu wa magumi ni magumi mambidi wa maxekele, madingano ni dixekele da wukhalo wo sawuleka, se sotshe sa simbidi si di tate ngu mpupu wo tshura, wu nga kanyangelwa ni mtona, kasi kumaha mphaxo wa sakudya;

⁵⁰ dijingo da digumi da maxekele a nzalama, do tala ngu dibaselo;

⁵¹ dirole, ni hamba, ni txinvutana txa dilembe dimwedo, kasi kumaha mphaxo wo hiswa;

⁵² ni mabhongwe, kasi kumaha mphaxo wo dihela txionho;

⁵³ ni mphaxo wa kuthutha, tihomu timbidi, mtxhanu wa tihamba, mtxhanu wa vamabhongwe, mtxhanu wa sinvutana sa dilembe. Awuwa mningelo wa Elisama, mwana Amihudhi.

⁵⁴ Ka ditshiku da wutxhanu ni mararu, mthangeli a to ningela Gamaliyeli, mwana Pedhazuri, mthangeli wa vanana va ka Manasi.

⁵⁵ Mningelo wakwe mbwa mbiya ya silivhela, ayi kunemela ka yona i nga ti ka 130 wa maxekele, ni mkamba wa silivhela, wa mtxhanu wa magumi ni magumi mambidi a maxekele, madingano ni dixekele da wukhalo wo sawuleka, sotshe sa simbidi so tala ngu mpupu wo tshura, kasi kumaha mningelo wa sakudya;

⁵⁶ dijingo da nzalama, da digumi da maxekele, na di di tate ngu dibaselo;

⁵⁷ ni dirole, ni hamba, ni txinvutana txa dilembe dimwedo, kasi kumaha mningelo wo hiswa;

⁵⁸ ni mabhongwe wa mningelo wo dihela txionho;

⁵⁹ ni mphaxo wa kuthutha, tihomu timbidi, mtxhanu wa tihamba, mtxhanu wa vamabhongwe, mtxhanu wa sinvutana sa dilembe dimwedo; awuwa, ngu wona mningelo wa Gamaliyeli, mwana Pedhazuri.

⁶⁰ Ka ditshiku da wutxhanu ni mune, awu a nga maha mningelo wakwe i Abhidhani, mwana Gidhiyoni, mthangeli wa vanana va ka Bhenjamini.

⁶¹ Mningelo wakwe ngu wuwa: Dijingo da silivhela, adi kunemela ka dona i ku ka 130 wa maxekele, ni mkamba wa silivhela, awu kunemela ka wona i ku ka mtxhanu wa magumi ni mambidi a maxekele, madingano ni dixekele da wukhalo wo sawuleka, sotshe sa simbidi so tala ngu mpupu wo tshura, wo kanyangelwa kumweko ni mtona, kasi kumaha mningelo wa sakudya.

⁶² Ku ti ni dijingo da nzalama da digumi da maxekele, do tala ngu dibaselo.

⁶³ Ni dirole, ni hamba, ni txinvutana txa dilembe dimwedo, kasi kumaha mphaxo wa kuhiswa.

⁶⁴ Mabhongwe, kasi kumaha mphaxo wa kudivalela;

⁶⁵ ni mphaxo wo ninga kuthutha, tihomu timbidi, mtxhanu wa tihamba, mtxhanu wa vamabhongwe, mtxhanu wa sinvutana sa dilembe dimwedo; awuwa ngu wona mningelo wa Abhidhani, mwana Gidhiyoni.

⁶⁶ Ngu ditshiku da wugumi, Ayezeri, mwana Amixadhayi, mthangeli wa vanana va ka Dhani, a to ningela mningelo wakwe.

⁶⁷ Mningelo wakwe i ti wuwa: Dijingo da silivhela, adi kunemela ka dona i ku ka 130 wa maxekele, ni mkamba wa silivhela, awu kunemela ka wona i ku ka mtxhanu wa magumi ni magumi mambidi a maxekele, madingano ni dixekele da wukhalo wo sawuleka, sotshe sa simbidi so tala ngu mpupu wo tshura, wu nga kanyangelwa ni mtona, kasi kumaha mningelo wa sakudya.

⁶⁸ Dijingo dimwedo da nzalama, da digumi da maxekele, do tala ngu dibaselo;

⁶⁹ ni dirole, ni hamba, ni txinvutana txa dilembe dimwedo, kasi kumaha mningelo wo hiswa,

⁷⁰ ni mabhongwe, kasi kumaha mningelo wo diha txionho;

⁷¹ ni kumaha mphaxo wa kuthutha, ni tihomu timbidi, mtxhanu wa tihamba, mtxhanu wa vamabhongwe, mtxhanu wa sinvutana sa dilembe dimwedo; awuwa ngu wona mningelo wa Ayezeri, mwana Amixadhayi.

⁷² Ka ditshiku da wugumi ni dimwedo, Pajiyeli, mwana Okrani, mthangeli wa vanana va ka Aseri, a to neha mningelo wakwe.

⁷³ Mningelo wakwe mbwa: Dijingo da silivhela, adi kunemela ka dona i ku ka 130 wa maxekele, ni mkamba wa silivhela, awu kunemela ka wona i ku ka mtxhanu wa magumi ni magumi mambidi a maxekele, madingano ni dixekele da wukhalo wo sawuleka, ngu wumbidi wa sona si di tate ngu mpupu wo tshura, awu wu nga kanyangelwa ni mtona, kasi kumaha mningelo wa sakudya;

⁷⁴ ni dijingo da nzalama, adi kunemela ka dona i ku ka digumi da maxekele, do tala ngu dibaselo;

⁷⁵ dirole, hamba, ni txinvutana txa dilembe dimwedo, kasi kumaha mphaxo wo hiswa,

⁷⁶ ni mabhongwe, kasi kumaha mphaxo wo dihela txionho;

⁷⁷ se ka mphaxo wa kuthutha, tihomu timbidi, mtxhanu wa tihamba, mtxhanu wa vamabhongwe, ni mtxhanu wa sinvutana sa dilembe dimwedo; awuwa ngu wona mningelo wa Pajiyeli, mwana Okrani.

⁷⁸ Ka ditshiku da wugumi ni mambidi, ku to ningela Ayira, mwana Enani, mthangeli wa vanana va ka Naftali.

⁷⁹ Mningelo wakwe ngu wuwa: Mbiya ya silivhela, ayi kunemela ka yona i ku ka 130 wa maxekele, ni mkamba wa silivhela, wa mtxhanu wa magumi ni magumi mambidi a maxekele, madingano ni wukhalo wo sawuleka; sotshe sa simbidi, si di tate ngu mpupu wo tshura, wo kanyangelwa ni mtona, wa mningelo wa sakudya;

⁸⁰ ni dijingo da nzalama da digumi da maxekele, do tala ngu dibaselo;

⁸¹ dirole, hamba, ni txinvutana txa dilembe dimwedo, kasi kumaha mphaxo wo diha txionho;

⁸² mabhongwe, kasi kumaha mphaxo wo thavisa txionho;

⁸³ se ka mphaxo wa kuthutha, tihomu timbidi, mtxhanu wa tihamba, mtxhanu wa vamabhongwe, mtxhanu wa sinvutana sa dilembe dimwedo; awuwa ngu wona mningelo wa Ayira, mwana Enani;

⁸⁴ ayiya ngu yona miningelo ya txiluveloni, yo mahwa ngu vathangeli va ka Israyeli, ka ditshiku di a nga totwa ngu dona: Digumi da timbiya ni timbidi ta silivhela, digumi da mikamba ni yimbidi ya silivhela, ni digumi da majingo ni mambidi a nzalama;

⁸⁵ mbiya yimwani ni yimwani, yi di tate ni kunemela ka 130 wa maxekele, kasi mkamba wumwewo ni wumwani, wu ti ti ni mtxhanu wa magumi ni mambidi a maxekele; sotshe siya sa silivhela si ti ti ni kunemela ka 2.400 wa maxekele, madingano ni dixekele da wukhalo wo sawuleka;

⁸⁶ digumi da majingo ni mambidi a nzalama, o tala ngu dibaselo, dimwani ni dimwani di ti ti ni kunemela ka digumi da maxekele, madingano ni dixele da wukhalo wo sawuleka, yotshe nzala ya majingo, yi ti ti ni kunemela ka 120 wa maxekele;

⁸⁷ totshe tihomu ta mningelo wa kuhiswa, i ti ti digumi da marole ni mambidi; ni digumi da tihamba ni timbidi; ni digumi da sinvutana ni simbidi sa dilembe dimwedo, ni miningelo wa sakudya, ni digumi da vamabhongwe ni vambidi, kasi kumaha mphaxo wa txionho;

⁸⁸ se totshe tihomu, kasi kumaha mphaxo wa kuthutha, i ti ti magumi mambidi ni mune wa marole; ni mtxhanu wa magumi ni dimwedo a tihamba, ni mtxhanu wa magumi ni dimwedo a vamabhongwe, ni mtxhanu wa magumi ni dimwedo a sinvutana sa dilembe dimwedo; awuwa ngu wona mningelo wa kusawulekisa txiluvelo, msana ka kuva txi di totilwe.

⁸⁹ Se mbimo yile Mosi a nga ti wulela ditendani ka msengeletano, kasi kuya womba-womba ni Mkoma, a ti ti engisela dipswi, di di nga ti womba kwakwe, ngu txitimwi ka txikhalo txa wumbilu, txitimwi ka dibhokiso da Wufakazi, ngu hagari ka makerubhima mambidi; di ti ti wombawombisa tona tiya nayo.