Mitengo 5 - Bhiblia Yo Sawuleka

Milayo yayingi ni mamahelo Vathu va kwa mbi sawuleka

¹ Se Mkoma a to womba ka Mosi, a txi khene:

² “Laya vanana va ka Israyeli tito, awu a ku ni malwati a tshekela, ni vathu votshe ava va mahako kubiha ni ku ti nzambwisa ngu kugwesa sirumbi, va na humiswa hahanze ka wugovelo.

³ Humisani vavamna ni vavasikati mi txi va veka hahanze ka wugovelo. A ti to vanana va ka Israyeli va si nzambwiswi ka wugovelo wawe, vale ni zumbako hagari kwawe.”

⁴ Sekoko, vanana va ka Israyeli va to maha toneto: Va to va humisa hahanze ka wugovelo. Vanana va ka Israyeli va mahile nga ti Mkoma a nga ti leletisile tona ka Mosi.

Kudihelwa ka sile si nga onheka

⁵ Mkoma a to womba kambe ka Mosi, a txi khene:

⁶ Womba kambe ka vanana va ka Israyeli u txi khawe: Ku nga ti m'thu, wamwamna mwendo wamsikati a txi maha txionho txo hambana ni wuthu, eyo m'thu a na va a di onhete Mkoma; se eyo m'thu ana ni mnandu wa toneto.

⁷ Se ene a fanete ku ti solisa ngu txionho txi a nga txi maha; se e tshumetela sotshe si a nga si mana ngu kuonha kwakwe, se a txi engetela ngu lipimo la wutxhanu, e ninga awu a nga muonhela.

⁸ Sekoko, ku nga ti awu a nga onhelwa, asi na dixaka daku m'vhuna kuamukela midiho ya mnandu, midiho yoneyo yi na ningelwa ka Mkoma, kasi yi thumiswa ngu mphaxeli, hahanze ka hamba ya m'diho, ayile mphaxeli a no maha ngu yona mphaxo wa kudivalelwa ka txionho.

⁹ Sotshe si so sawuleka, asi vanana va ka Israyeli va heleketako ka mphaxeli si lumba ene.

¹⁰ Simaha so sawuleka sa m'thu ni m'thu si lumba ene nyamne; asi si heleketwako ka mphaxeli si na va sakwe.

Nzila yo ziva kuthembeka ni kwa mbi thembeka ka msikati

¹¹ Mkoma a to womba kambe ka Mosi, a txi khene:

¹² Gela vanana va ka Israyeli, u txi khawe: Ku ngako msikati wa wokari a txi phazama e onhela mwamna wakwe;

¹³ ti to e sengela ditaho ni mmwani wamwamna, eyo wamsikati a ti nzambwisile amu kusisalani;

¹⁴ se ti nga maheka ti to moya wa txiluse wu txita ka mwamna wa kona; e lusela mkatakwe wu a nga ti nzambwisa; mwendo kulusela wamwamna wule a nga onha ni msikati wakwe.

¹⁵ Se wamwamna wule, a na yisa msikati wakwe masoni ka mphaxeli, eya maha mningelo wa sa wugumi, sa mpimo wa efa ya sevhadha. Aniko txitimwi wona kha ku na mbi thelwa mtona, hambi kuveka dibaselo, nguko mningelo wa txiluse; awuwa mningelo wa txialakanyiso, awule mangwana wa ditshiku, wu no ku alakanyisa ka mapimo ako.

¹⁶ Se mphaxeli a na tshuketisa wamsikati masoni ka Mkoma.

¹⁷ Se mphaxeli a na teka mati o sawuleka amu ka khadi ya mraka, na a di tekile lithulu li li ku hahatshi ka dithepele e li thela mu ka mati.

¹⁸ Sekoko mphaxeli a na yisa wamsikati masoni ka Mkoma, e vhunungula msungo e sala ngu timbobo, e veka manzani kwakwe mningelo wa txialakanyiso, awu i ku mningelo wa txiluse, mphaxeli, manzani kwakwe, ku nava ni mati o bava, a txiruko.

¹⁹ Ngu msana, mphaxeli a na xambanyisa wamsikati a txi khene kwakwe: Ku nga ti i si nga ditshuri ti to awe u ya sengela ni mmwani wamwamna, ni ti taku u ngava u di mahile kubiha, ti ti nga ku nzambwisa, na kuve awe u mu ka tifanelo tako ni mkatako, se mati ayo o bava ma nga ku pandise.

²⁰ Aniko ku nga ti u di mahile to biha ni mmwani wamwamna a txi otela ni nawe;

²¹ sekoko, mphaxeli a na gela wu wamsikati e maha txixambanyo txa hombe e m'gela tiya: Hagari ka vathu vakakwanu, Mkoma a na kutisela dikhombo ni kukuruketela, e maha taku ti txi oma tinyonga tako, ni kusimba mrumbu wako,

²² a ti to mati awa o bava ma txi wulela mndani kwako, kasi ku mrumbu wako wu txi simba ni kuoma tinyonga tako! Se wamsikati a na xamula a txi khene: Amen! Amen!

²³ Ngu msana mphaxeli a na bhala amu ka dibhuku otshe makhombo awa, e tshumela a txi ma pfhita ngu mati o bava.

²⁴ Awu wamsikati a na maha tito, e ma sela matiyo o bava ni makhombo, se kwakwe ma nava ma txi bava.

²⁵ Ngu msana keto mphaxeli a na amukela ngu manzani ka wamsikati, mningelo wa txiluse, e wu guleta, e wu kombisa masoni ka Mkoma e wu yisa ha magandeloni.

²⁶ Kambe mphaxeli a na wela mpupu ngu manza akwe, wa mningelo wa txialakanyiso e hisa ha txiluveloni, se e seta wu wamsikati.

²⁷ Sekoko, a di msetile matiyo, na ene wu wamsikati a di ti nzambwisile, ni kungako a di onhete mwamna wakwe ngu ditshuri, matiyo ma nyenyezisako, ma na wulela mndani kwakwe, me mmahela phango; se mrumbu wakwe wu na simba, nyonga yakwe yi na oma, ni wu wamsikati a na va txiruko ditikoni kwawe.

²⁸ Se ngako wamsikati a sa ti nzambwisa ni mmwani wamwamna, a txi za e ti basisa, lambi kha na mbiswa epfa kupanda ka txilo, ene wu wamsikati wa sikota kuwusa liveleko lakwe.

²⁹ Awuwa ngu wona mlayo wo ti basisa, ku ngako wamsikati a txi ti nzambwisa na a di hahatshi ka mlayo wo fumwa ngu mkatakwe.

³⁰ Ni yihi mbimo wamwamna a wulelelwako ngu moya wo lusela mkatakwe mbiluni kwakwe, e maha wukhuxu, ene a fanete kuhenjeleta msikati wakwe masoni ka Txizimu, se mphaxeli a na mxola ngu mlayo wotshe.

³¹ Kambe wamwamna a na va asi nga ni mnandu; aniko wamsikati a na rwala kubiha kwakwe.