Mitengo 33 - Bhiblia Yo Sawuleka

Kukhukhela Egipta kala Mowabhi

¹ Aawa ngu ona mapfhumba a vanana va ka Israyeli, va nga huma ngu ditikoni ka Egipta, madingano ni mabutho awe, ngu dianza da Mosi ni da Aroni.

² Se Mosi a bhate ngu kuhuma kwawe, madingano ni mapfhumba awe, nga tile Mkoma a nga va leletisa tona, mbimo yile va nga huma, va tsimbilisile tiya:

³ Ngu mtxima wo khata, va to khukha ngu Ramisesi, i ti ditshiku da digumi ni mtxhanu, ka mtxima wo khata. Mangwanani ka kona, i ti ditshiku da Pasika, va to huma vanana va ka Israyeli ngu dianza do guleka, masoni ka votshe Vaegipta,

⁴ Vaegipta va to kelelela vale va nga ti datwe ngu Mkoma, ka otshe matiwula, se Mkoma a to lamula sizimu sawe.

⁵ Na va di khukhile vanana va ka Israyeli ngu Ramisesi, va ti ya humula Sukote.

⁶ Se va to khukha ngu Sukote, veya humula Etani, ku manekako magwito ka txiwula.

⁷ Se va to khukha ngu Etani, ve tshumela veya Pi-Hayiroti, ku nga rendekelana ni Bhahali-Zefoni, se ve humula masoni ka Migidholi.

⁸ Se va to khukha ngu Pi-Hayiroti, ve txhatuka ngu hagari ka linene, kala txiwulani, va to tsimbila mndani ka masiku mararu txiwulani ka Etani, veya humula Mara.

⁹ Se va to khukha ngu Mara, ve ta Elime; se Elime ku ti ti ni digumi da sisima sa mati, ni mtxhanu wa magumi ni mambidi a mikhokho, va to humula konaho.

¹⁰ Se va to khukha ngu Elime, veya humula ka Linene lo Bhilivila.

¹¹ Se ngu ka Linene lo Bhilivila veya humula ka txiwula txa Sini.

¹² Se va to khukha ngu txiwulani ka Sini veya humula Dhofika.

¹³ Se va to khukha ngu Dhofika, veya humula Alusi.

¹⁴ Se va to khukha ngu Alusi, veya humula Refidhime; sekoko eho ku si nga ni mati o dingana kusela.

¹⁵ Va to khukha koko ngu Refidhime, veya humula txiwulani ka Sinayi.

¹⁶ Va to khukha ngu txiwulani ka Sinayi, veya humula Kibroti-Hatavha.

¹⁷ Va to khukha ngu Kibroti-Hatavha, veya humula Hazerote.

¹⁸ Se va to khukha ngu Hazarote veya humula Ritima.

¹⁹ Se va to khukha ngu Ritima veya humula Rimoni-Perezi.

²⁰ Se va to khukha ngu Rimoni-Perezi, veya humula Libhina.

²¹ Se va to khukha ngu Libhina, veya humula Risa.

²² Se va to khukha ngu Risa, veya humula Kehelata.

²³ Se va to khukha ngu Kehelata, veya humula mmangoni ka Seferi.

²⁴ Se va to khukha ngu mmangoni ka Seferi, veya humula Haradha.

²⁵ Se va to khukha ngu Haradha, veya humula Makelote.

²⁶ Se va to khukha ngu Makelote, veya humula Tahate.

²⁷ Se va to khukha ngu Tahate, veya humula Tera.

²⁸ Se va to khukha ngu Tera, veya humula Mitika.

²⁹ Se va to khukha ngu Mitika, veya humula Asimona.

³⁰ Se va to khukha ngu Asimona, veya humula Moserote.

³¹ Se va to khukha ngu Moserote, veya humula Bhene-Jahakamu.

³² Se va to khukha ngu Bhene-Jahakamu, veya humula Hori-Hagidhigadhi.

³³ Se va to khukha ngu Hori-Hagidhigadhi veya humula Jotibhata.

³⁴ Se va to khukha ngu Jotibhata, veya humula Abrona.

³⁵ Se va to khukha ngu Abrona, veya humula Eziyoni-Gebheri.

³⁶ Se va to khukha ngu Eziyoni-Gebheri, veya humula txiwulani ka Zini, i ku Kadhesi.

³⁷ Se va to khukha ngu Kadhesi, veya humula mmangoni ka Hori, magwito ka mafu a Edhomi.

³⁸ Sekoko Aroni mphaxeli, a to kwela mmangoni ka Hori, madingano ni kuruma ka Mkoma; se a fete koneyo, ngu mtxima wa wutxhanu, na ku di pindile mune wa magumi a malembe, na vanana va ka Israyeli va di humile ngu ditikoni ka Egipta, ka ditshiku do khata da mtxima.

³⁹ Se Aroni i di wa tanga ya 100 da malembe, ni malembe mararu, mbimo yi a nga fa, mmangoni ka Hori.

⁴⁰ Se a ti pfite Mkanana, mfumeli wa Aradhi, a nga txi zumba wulambwe ka ditiko da Kanana, a ti to va bwaka vanana va ka Israyeli.

⁴¹ Se va to khukha ngu Hori, veya humula Salmona.

⁴² Se va to khukha ngu Salmona, veya humula Punoni.

⁴³ Se va to khukha ngu Punoni veya humula Obhoti.

⁴⁴ Se va to khukha Obhoti, veya humula simangwanani ka Abharimu, magwito ka Mowabhi.

⁴⁵ Se va to khukha ngu simangwanani ka Abharimu, veya humula Dhibhomi-Gadhi.

⁴⁶ Se va to khukha ngu Dhibhomi-Gadhi veya humula Alimoni-Dhiblatayimi.

⁴⁷ Se va to khukha ngu Alimoni-Dhiblatayimi, veya humula mimangoni ka Abharime, ko rendekelana ni Nebho.

⁴⁸ Se va to khukha ngu mimangoni ka Abharime, veya humula mikovani ka Vamowabhi, hafuhi ni Jordhani, ka Jeriko.

⁴⁹ Se va to zumba hafuhi ni Jordhani, kukhukhela Bheti-Jesimote, kala Abhele-Sitime, mikovani ka Vamowabhi.

Txizimu txi lulamisela vathu na va si se txhatuka mnambo wa Jordhani ( 33:50--36:13 ) Txizimu txi ruma kututumisa Vakanana

⁵⁰ Mkoma a wombile ka Mosi, mikovani ka Mowabhi, hafuhi ni Jordhani, ka Jeriko, a txi khene:

⁵¹ Gela vanana va ka Israyeli u txi khawe: Aha mi no va mi di txhatukile mnambo wa Jordhani, miya ditikoni ka Kanana,

⁵² mi na tutumisa votshe va zumbako ka dona, masoni kwanu, ni kukhundumusela sotshe sithombe sawe; kambe mi na khundumusela sotshe sifananiso sawe sa tisimbi, mi na khundumusela sotshe sithombe sawe;

⁵³ se mi na honyola ditiko mi zumba ka dona; ngako ni nga mi ninga ditiko diya, kuva di mi lumba.

⁵⁴ Se ngu kuxaxuva tixolo, mi na mana ditiko di na maha thomba yanu, madingano ni mimwaya yanu; ngu wungi wa kona, mi na talelwa ngu tithomba, eyo dikato di no wela kwakwe; madingano ni tihunzu ta vatate vanu, mi na teka tithomba.

⁵⁵ Aniko ngako mi si tutumisi vazumbi va ditiko dile masoni kwanu, se ava mi no va leka ve zumba, vona va na maha mipa amu ka maso anu, ni mindombo makatani kwanu, se va na mi tsindaveta ka ditiko diya mi no zumba ka dona.

⁵⁶ Se ti na maneka ti to ni maha kwanu, ati ni nga ti fela kumaha kwawe.