Mitengo 30 - Bhiblia Yo Sawuleka

Sithembiso ni sixambanyo

¹ Se Mosi a to womba-womba ka misungo ya tihunzu ta vanana va ka Israyeli, a txi khene: Ndide dipswi di Mkoma a nga ni ruma dona:

² Ngako m'thu a txi thembisa mwendo kuxambanya masoni ka Mkoma, kumaha mwendo kuleka kumaha tifanelo takwe, a nga thuke e hambuka ka dipswi dakwe, a fanete kumaha ati a nga thembisa tona.

³ Kambe ngako wamsikati wu a sanziko kutekwa, a txi thembisa ka Mkoma kumaha to kari mwendo kuxambanya ku a na ti leka,

⁴ se tate wakwe e tipfa, asi wombi txilo, wamsikati wule a fela kumaha totshe ti a nga xambanya ni kuthembisa tona.

⁵ Aniko ngako tate wake a txi tipfa, se e mtsimba ditshiku edo kumaha ti a nga thembisa ni kuxambanya tona, wasikati wuwa a na ti leke, Mkoma a na m'divalela, nguko a na va a di tsimbilwe ngu tate wakwe.

⁶ Se ngako a di ni mwamna, e kurumetwa kuxambanya kokari, mwendo kuwomba a sa pimisa txilo, ngu txisofu txakwe, atxi txi wombako ta mbilu yakwe;

⁷ Ngako mwamna wakwe a txi tipfa, asi wombi txilo ditshiku edo, ati a nga thembisa tona, ti na maheka; se ati a nga xambanya tona, to tsimbilelana ni mbiluni kwakwe, ti na maheka.

⁸ Se ngako mwamna wakwe a txi mtsimba ka ditshiku edo a tipfako, se a txi mtsimba ka ti a ngadi xambanyile, kumweko ni ti a nga womba ngu txisofu txakwe, atxi txi wombako ta mbilu yakwe, Mkoma a na m'divalela.

⁹ Votshe vavasikati va tinoni ni vo wuya ngu wukati, totshe ti va tsanisako ngu timbilu tawe, ti na maheka.

¹⁰ Aniko a di mahile txixambanyo a di m'tini ka mwamna wakwe, mwendo a di vekile mbilu yakwe amu ka txikurumeto txa txixambanyo,

¹¹ ngako mwamna wakwe a di ti pfite e mmalalela, asi mtsimbi, totshe ti a nga thembisa ti na maheka, ni txotshe txikurumeto txi txi ku mbiluni kwakwe, txi na maheka.

¹² Kambe ngako mwamna wakwe a di mtsimbile, ka ditshiku di a nga tipfa ngu dona, totshe ti ti nga huma ngu txisofuni kwakwe, ta kuxambanya kwakwe, mwendo ta txikurumeto txa mbilu yakwe, kha ti na mbi maheka: Mwamna wakwe a ti tsimbile, se Mkoma a na m'divalela.

¹³ Sotshe sithembiso ni sotshe sixambanyo a nga si tsanisa, kasi kuxanisa mbilu yakwe, mwamna a na si tumela mwendo ku si lamba.

¹⁴ Kambe ngako mwamna wakwe a txi malala kupinda ditshiku asi wombi txilo, a na tsanise sotshe sixambanyo sakwe, ni sithembiso si wansikati a lavako ku si maha, nguko a malate ka ditshiku a nga tipfa ngu dona.

¹⁵ Kambe ngako a txi mlambela ka totshe, msana ka kuva a di ti pfite, sekoko wamwamna ngene a no rwala mnandu wa msikati wakwe.

¹⁶ Asiya ngu sona sileleto si Mkoma a nga ruma ka Mosi, hagari ka mwamna ni msikati wakwe; ni ka tate ni mwanana wakwe wa dihorana, wuphyani kwakwe, m'tini ka tate wkwe.