Mitengo 28 - Bhiblia Yo Sawuleka

Minigelo ya ditshiku ni ditshiku

¹ Mkoma a to womba kambe ka Mosi, a txi khene:

² Leleta vanana va ka Israyeli, u txi kawe kwawe: Ni neheleni mningelo wo hiswa ngu mbimo ya wona, awu i ku kudya kwangu ko bhumula.

³ Se u na va gela tito: Mningelo wo hiswa wu mi ningelako ka Mkoma ngu wuwa: Mi na ningela tihamba timbidi ta dilembe dimwedo, ta kwa mbi na txibawa. Ewo wu na va mningelo wo hiswa wa ditshiku ni ditshiku.

⁴ Ni mixo u na phaxa ngu txinvutana, ni minova u phaxa ngu tximwani txinvutana;

⁵ se mpimo wa wugumi wa efa ya mpupu wo tshura, wu na va mningelo wa sakudya, wo kanyangelwa ngu mpimo wa wumune wa hini ya mtona.

⁶ Awuwa mphaxo wo hiswa wa ditshiku ni ditshiku, awu wu nga txi mahwa mmangoni ka Sinayi, kasi kuva mphaxo wo bhumula wu hiselwako Mkoma.

⁷ Mningelo wa sa kusela wu na va wa mpimo wa wumune wa hini, wa txinvutana txo khata: Vhinya ya yinene yi na thelwa kasi kuninga Mkoma ha wukhaloni ko sawuleka.

⁸ Ni minova u na ningela tximwani txinvutana; atxi txi no ningelwa kumweko ni mningelo wa sakudya ni mixo, ni sa kusela, wu na va mningelo wa kuhiswa, wo bhumula, ka Mkoma.

Miningelo ya Sabbata

⁹ Aniko, ngu ditshiku da Sabbata, ku na ningelwa sinvutana simbidi sa dilembe dimwedo, sa kwa mbi na txibawa, ni mningelo wa mpimo wa wumbidi wa mpupu wo kanyangelwa ni mtona, ni mningelo wa sakudya ni sa kusela sa kona.

¹⁰ Awuwa ngu wona mphaxo wa kuhiswa wa Sabbata ni Sabbata, kuleka mningelo wa kuhiswa wa ditshiku ni ditshiku, ni mningelo wa sakudya ni sa kusela.

Miningelo ya M'buso wa Kumeka ka Mtxima

¹¹ Se makhatoni ka mtxima ni mtxima, mi na ningela ka Mkoma mphaxo wa kuhiswa, wa marole mambidi, ni hamba, kumweko ni mtxhanu wa sinvutana ni simbidi sa dilembe dimwedo, sa kwa mbi na sibawa.

¹² Se ni mpimo wa wuraru ka wugumi, wo kanyangelwa ni mtona, wa mningelo wa sakudya, ka dirole; ni mpimo wa wumbidi ka wugumi, wa mpupu wo tshura, wo kanyangelwa ni mtona, i ku mningelo wa sakudya, ka hamba;

¹³ ni mpimo wa wugumi wa mpupu wo tshura, wo kanyangelwa ni mtona, kasi kumaha mningelo wa sakudya, ka nvuta yimweyo; wu na va mphaxo wa kuhiswa, wo bhumula, mningelo wo hiswa, ka Mkoma.

¹⁴ Se mningelo wa kona wa sa kusela, mbwa diphikama da hini ya vhinya, ka dirole, ni mpimo wa wuraru wa hini ka hamba, mpimo wa wumune wa hini ka txinvutana tximwetxo; awuwa mphaxo wa kuhiswa, wa kumeka ka mtxima ni mtxima, madingano ni mitxima ya dilembe.

¹⁵ Ni mabhongwe, ka Mkoma, kasi kumaha mphaxo wa kuthavisa txionho, kuleka ngu mphaxo wa kuhiswa, ka masiku otshe, ni mningelo wa kona wa sa kusela.

Miningelo ya M'buso wa Pasika - Mapawu o mbi tshumbelwa

¹⁶ Aniko ka mtxima wo khata, ka ditshiku da digumi ni mune ka mtxima, i Pasika ya Mkoma.

¹⁷ Ka ditshiku da digumi ni mtxhanu, ka wona mtxima wuwa, ku na mahwa m'buso. Se ngu mtxhanu wa masiku ni mambidi, ku na dyiwa mapawu a kwa mbi tshumbelwa.

¹⁸ Ka ditshiku do khata, ku nava ni msengeletano wo sawuleka; mi nga dhuke mi txi thuma mthumo wa kunemela, ngu dona ditshiku diya.

¹⁹ Se mi na ningela mningelo wa kuhiswa, ka Mkoma, marole mambidi ni hamba, ni mtxhanu wa sinvutana sa dilembe dimwedo; sa kwa mbi na sibawa.

²⁰ Kumweko ni mningelo wa sakudya, i ku mpupu wo kanyangelwa ni mtona; mi na ningela mpimo wa wuraru ka digumi, ngu dirole, ni mpimo wa wuraru ka digumi, ngu hamba.

²¹ Mi na ningela ngu txinvutana tximwetxo ni tximwani mpimo wa wugumi, ka txinvutana tximwetxo ni tximwani, ka sa mtxhanu ni simbidi.

²² Ni mabhongwe, kasi kuva mphaxo wa kuthavisa txionho, kasi kuthavisa sionho sanu.

²³ Mi na ningela kumweko ni mningelo wa kuhiswa, ngu mbimo ya mixo, i ku mningelo wa kuhiswa wa yotshe mbimo.

²⁴ Madingano ni mamahelo awa, ditshiku ni ditshiku mi na ningela, mndani ka mtxhanu wa masiku ni mambidi, mningelo wa sakudya sa mphaxo wa kuhiswa, wo bhumula, ka Mkoma; hahanze ka mphaxo wa kuhiswa wa yotshe mbimo, ku na ningelwa siya, ni sa kusela sa kona.

²⁵ Se ngu ditshiku da wutxhanu ni mambidi, mi na va ni msengeletano wo sawuleka; mi nga maheni mthumo wo nemela.

Miningelo ya M'buso wa Kuelula

²⁶ Kufana ni tona eto, ma txi hoka masiku a mihando yo khata, ka mbimo yi mi ningelako mningelo wa wuphya wa sakudya ka Mkoma, madingano ni M'buso wanu wa Mavhiki; mi nga thumeni mthumo ni wawumwewo wo nemela.

²⁷ Sekoko mi na ningela ka Mkoma, mphaxo wa kuhiswa, wo bhumula; i ku marole mambidi, ni hamba, ni mtxhanu wa sinvutana ni simbidi, sa dilembe dimwedo.

²⁸ Ni mningelo wa sakudya sa mpupu wo tshura, wo kanyangelwa ni mtona; wa mpimo wa wuraru ka wugumi ngu dirole, mpimo wa wumbidi ka wugumi ngu hamba;

²⁹ ka txinvutana tximwetxo ni tximwetxo mpimo wa wugumi, ka sotshe sa mtxhanu ni simbidi;

³⁰ ni mabhongwe, kasi kumaha mphaxo wo thavisa sionho sanu.

³¹ Hahanze ka mphaxo wa kuhiswa wa yotshe mbimo, ni mningelo wa kona wa sakudya, mi na si ningela ( si si nga ni sibawa), ni sa kusela sa kona.