Mitengo 27 - Bhiblia Yo Sawuleka

Vanana va Zelofeyadhi

¹ Se va tota vanana vamahorana va Zelofeyadhi, mwana Heferi, mwana Gileyadhi, mwana Makiri, mwana Manasi, hagari ka vanana va Manasi, mwana Josefa, se matina a vanana vakwe vamahorana ngu awa: Makla, Nowa, Hogla, Milka ni Tiriza;

² se va to ya ema masoni ka Mosi, ni masoni ka Eleyazari, mphaxeli, ni masoni ka vathaveli, ni ka wotshe msengeletano, ka ditimba da ditenda da msengeletano, va txi kha vona:

³ Tate wathu a fite txiwulani, na a si nga hagari ka msengeletano wa va va nga sengeletana, ve hambana ni Mkoma, ka msengeletano wa Kora, kambe a fite asi nga ni mwanana, ka txionho txakwe apune.

⁴ Aku tate a nga mbi va ni vanana, ditina dakwe di na thaviswa hagari ka m'ti wakwe kani? Hi nigeni wukhalo wu wu no va wathu, hagari kwathu.

⁵ Se Mosi a to teka timhaka e ti veka masoni ka Mkoma.

⁶ Mkoma a to womba ka Mosi, a txi khene.

⁷ Vanana va Zelofeyadhi va womba to pfala; mi fanela kuvaninga makhalo, awe awa ma no maha thomba hagari kwawe; se mi va ninga sotshe sitate wawe a nga si siya.

⁸ Se u gela vanana va ka Israyeli u txi khawe: Ngako m'thu a txi fa asi nga ni mwanana wa dijaha, ningani mwanana wa dihorana thomba yakwe.

⁹ Sekoko asi nga ni mwanana wa dihorana, ningani mwanawe thomba yakwe.

¹⁰ Kambe ngako asi nga ni mwanawe, ningelani thomba yakwe ka tatanyani wakwe

¹¹ Se ngako nene tatanyani wakwe asi nga ni vanawe, ningani awu a ku hafuhi, mwendo masoni ka tixaka ta m'ti, ka vanana va ka Irsayeli, i nava wona mlayo ni tifanelo tiya Mosi a nga rumwa ngu Mkoma.

Joxua mthangeli wampya wa vathu

¹² Msana keto, Mkoma a ti khene ka Mosi: Kwela ka mmango wa Abharime u wona ditiko diya ni nga ninga vanana va ka Israyeli.

¹³ Sekoko u ti di woni, u na tshumetelwa ka vakwanu, nga ti a nga mahiswa tona mwananu Aroni.

¹⁴ Ngako mi nga ni eyisa txiwulani ka Zimi, kuhenyani ka msengeletano, mbimo yi ni nga ruma ku u ni phaxela matini, masoni kwawe: (Awa mati a Meribha wa Kadhesi, txiwulani ka Zimi).

¹⁵ Sekoko Mosi a to womba ka Mkoma, a txi khene:

¹⁶ Mkoma Txizimu txa mimoya ya yotshe nyama, veka m'thu txitimwi ka msengeletano wuwa,

¹⁷ e huma masoni kwawe, e wulela masoni kwawe, e va maha ve huma, ni ku va maha ve wulela, kasi ku msengeletano wa Mkoma, wu si nga tinvuta to pwata m'dyisi.

¹⁸ Sekoko Mkoma a to gela Mosi a txi khene: Teka Joxuwa, mwana Nuni, m'thu wu aku ni moya, u msanzeka dianza dako.

¹⁹ Se u na mkombisa masoni ka Eleyazari, mphaxeli, ni masoni ka wotshe msengeletano, u niga mlayo masoni kwawe.

²⁰ U veka wudhumo wako tximwi kwawe, ti to wotshe msengeletano wa vanana va ka Israyeli ve mxonipha.

²¹ Se a na vekwa masoni ka Eleyazari, mphaxeli wu ni no mtisa ka Urime, masoni ka Mkoma; nga ti a nga womba, va na huma; ni ku nga ti a nga ti womba ve wulela, ene ni votshe vanana va ka Israyeli, ni wosthe msengeletano.

²² Se Mosi a to maha nga ti Mkoma a nga m'gelisa tona; e teka Joxuwa eya mkombisa masoni ka Eleyazari, mphaxeli, ni masoni ka wotshe msengeletano.

²³ Se txitimwi kwakwe, a to sanzeka manza, e mninga mlayo, nga ti Mkoma a nga leletisa tona, ngu dianza da Mosi.