Mitengo 26 - Bhiblia Yo Sawuleka

Kubalwa ka wumbidi ka vathu va ka Israyeli

¹ Ku to maheka koko ti to msana ka mtungu wule, Mkoma a to womba ka Mosi ni Eleyazari, mwana Aroni, mphaxeli, a txi khene:

² “Balani wotshe msengeletano wa vanana va ka Israyeli, ngu tinyumba ta vatate vawe: Votshe vale va magumi mambidi a malembe kuya masoni, ava va ku ni tanga ya kuya ka yimbi ya matxhari.”

³ Mosi koko, ni mphaxeli Eleyazari, va to womba ka vahombe va ka Israyeli, libalani ka Mowabhi, hafuhi ni Jordhani, ni Jeriko, va txi kha vona:

⁴ Balani vathu va tanga ya kukhukhela ka magumi mambidi a malembe ni kuya masoni, nga ti Mkoma a nga rumisa tona ka Mosi ni ka vanana va ka Israyeli, vale va nga huma Egipta.

⁵ Rubheni ngene matiwula a Israyeli; vanana va Rubheni i Enoki, ni Palu, i ku mwaya wa va ka Palu;

⁶ wa Hezironi, i ku mwaya wa va ka Hezironi; ni Karima, i ku mwaya wa va ka Karima.

⁷ Atiya ngu tona tinyumba ta liveleko la Rubheni, ali li nga balwa hagari kwawe, i 43.730.

⁸ Se mwanana wa Palu, i Eliyabhe.

⁹ Se vanana va Eliyabhe, i Nemuweli ni Dhatani, ni Abhiramu. Se Dhatani ni Abhiramu ngu vona va nga ti ni wudhumo amu ka msengeletano, va to wusa vhunyawunya, yo wukela Mosi ni Aroni ka msengeletano wa ka Kora, mbimo yi va nga wusa vhunyawunya yo wukela Mkoma.

¹⁰ Se mafu ma to asama txisofu meva mita, kumweko ni Kora, mbimo yile wu nga fa msengeletano konaho ku nga fa mtxawa wa hombe; ni mbimosi mndilo wu nga txi hisa 250 wa vavamna, ve maha txikombiso.

¹¹ Aniko vanana va Kora kha va fa.

¹² Kasi vanana va Simiyoni ngu tinyumba tawe, ngu vava: Va ka Jamini, i ku va nyumba ya ka Jamini; va ka Jakini, i ku va nyumba ya ka Jakini.

¹³ Va ka Zera mba nyumba ya ka Zera; va ka Xawule mba nyumba ya ka Xawule.

¹⁴ Atiya ngu tona tinyumba ta va ka Simiyoni, i ti 22.200.

¹⁵ Ka liveleko la Gadhi ngu tinyumba tawe: Ka Zefoni, mba nyumba ya ka Zefoni; ka Hagi, mba nyumba ya ka Hagi; ka Suni, mba nyumba ya ka Suni

¹⁶ Ka Ozini, mba nyumba ya ka Ozini; ka Heri mba nyumba ya ka Heri.

¹⁷ Ka va ka Arodhi, mba nyumba ya ka Arodhi; ka va ka Areli, mba nyumba ya ka Areli.

¹⁸ Atiya ngu tona tinyumba tawe va ka Gadhi, ngu mitengo yawe i di 40.500.

¹⁹ Ka liveleko la Judha i Heri ni Onani, va tiya fela Kanana.

²⁰ Vanana va ka Judha ngu tinyumba tawe ngu vava: Ka Sela, i nyumba ya ka Sela. Ka Perezi, mba nyumba ya ka Perezi; ka Zera, mba nyumba ya ka Zera.

²¹ Vanana va Perezi ngu vava: Va ka Herizoni, va ka Hamula, i ku va nyumba ya ka Hamula.

²² Atiya ngu tona tinyumba ta va ka Judha, mtengo wawe i ti 76.500.

²³ Vanana va Isakari ngu tinyumba tawe: Va ka Tola, i ku va nyumba ya ka Tola; va ka Puwa, i ku va nyumba ya ka Puwa.

²⁴ Va ka Jaxubha, mba nyumba ya ka Jaxubha; va ka Xiniromi, mba nyumba ya ka Xiniromi.

²⁵ Atiya ngu tona tinyumba ta ka Isakari, ni mtengo wawe i ti 64.300.

²⁶ Vanana va Zebhuloni ngu tinyumba tawe: Mba ka Seredhi, i ku nyumba ya Seredhi; va ka Eloni, i ku nyumba ya ka Eloni; va ka Jaleli, i ku nyumba ya ka Jaleli.

²⁷ Atiya ngu tona tinyumba ta vanana va Zebhuloni, ngu mtengo wawe wa 60.500.

²⁸ Vanana va Josefa ngu tinyumba tawe, i Manasi ni Efrayime.

²⁹ Vanana va Manasi, ngu vava: Va Makiri, ka mwaya wa va ka Makiri; se Makiri a to veleka Gileyadhi; va ka Gileyadhi, ka mwaya wa va ka Gileyadhi.

³⁰ Avava ngu vona vanana va Gileyadhi: Va ka Jezeri, mba nyumba ya ka Jezeri; va ka Heleke, mba nyumba ya ka Heleke.

³¹ Va ka Asiriyeli, mba nyumba ya ka Asiriyeli; va ka Xekemi, mba nyumba ya ka Xekemi.

³² Va ka Xemidha, mba nyumba ya ka Xemidha; va ka Hefera, mba nyumba ya ka Hefera.

³³ Kambe Zelofeyadhi, mwana Hefera, kha ngava ni vanana va majaha, a ti ka sova ni vanana vamahorana dwe; matina awe i ku awa: Makla, Nowa, Hogla, Milka ni Tiriza.

³⁴ Atiya ngu tona tinyumba ta va ka Manasi; ava va nga ti batwe i ti 52.700.

³⁵ Avava mbanana va Efrayime, ngu tinyumba tawe; va ka Sutela, va nyumba ya ka Sutela; va ka Bhekera, va nyumba ya ka Bhekera; va ka Tahana, va nyumba ya ka Tahana.

³⁶ Vanana va Sutela ngu vava: Ka Erani, i ku va nyumba ya ka Erani.

³⁷ Atiya ngu tona tinyumba ta va ka Efrayime, mtengo wa kona, i ti 32.500. Kambe avava ngu vona vanana va Josefa, ngu tinyumba tawe.

³⁸ Vanana va ka Bhenjamini ngu tinyumba tawe ngu vava: Va ka Bhela, mba nyumba ya ka Bhela; va ka Asibheli, mba nyumba ya ka Asibheli; va ka Ahiramu, mba nyumba ya ka Ahiramu.

³⁹ Va ka Xefufani, mba nyumba ya Xefufani; va ka Hufani, mba nyumba ya ka Hufani.

⁴⁰ Vanana va Bhela i ti ti Aridha ni Nahanani; va ka Aridha, mba nyumba ya ka Aridha; va ka Nahanani, mba nyumba ya ka Nahanani.

⁴¹ Avava ngu vona vanana va Bhenjamini, madingano ni tinyumba tawe; se ava va nga gelwa ngu vona i ti mtengo wa 45.600.

⁴² Avava mbanana va Dhani, madingano ni tinyumba tawe: Va ka Suwani, ka mwaya wa va ka Suwani; ayiya ngu yona mimwaya ya va ka Dhani, madingano ni tinyumba tawe.

⁴³ Totshe tinyumba ta va ka Suwani, madingano ni va va nga balwa ka vona, i ti mtengo wa 64.400.

⁴⁴ Vanana va Aseri, madingano ni tinyumba tawe, ngu vava: Va ka Imina, ka va ka Imina; ngu ka va ka Isivhi, ka va ka Isivhi; va ka Bheriyasi, ka nyumba ya ka Bheriyasi.

⁴⁵ Vanana va Bheriyasi ngu vava: Va ka Hebheri, ka nyumba ya ka Hebheri; va ka Malikiyele, ka nyumba ya ka Malikiyele.

⁴⁶ Se ditina da mwanana wa Aseri, i Sera.

⁴⁷ Atiya, ngu tona tinyumba ta vanana va Aseri, madingano ni va va nga balwa ka vona, i 53.400.

⁴⁸ Vanana va ka Naftali, madingano ni tinyumba tawe: Va ka Jezeeli ka nyumba ya ka Jezeeli; va ka Guni, ka nyumba ya ka Guni;

⁴⁹ va ka Jerezi, ka nyumba ya ka Jezeri; va ka Silemi, ka nyumba ya ka Silemi.

⁵⁰ Atiya, ngu tona tinyumba ta ka Naftali, madingano ni tinyumba tawe; se ava va nga balwa kwawe, i 45.400.

⁵¹ Avava ngu va va nga balwa ka vanana va ka Israyeli, i 601.730.

Va ka Levhi

⁵² Se Mkoma a to womba ka Mosi a txi khene:

⁵³ Ka vava di na abaniselwa ditiko di maha thomba yawe, kudingana ni mtengo wa matina.

⁵⁴ Ka va i ku vangi, u na wuyeletela thomba yawe; ka vavadotho u na hungulela thomba yawe; mmweyo ni mmweyo a na ningwa thomba yakwe, madingano ni va hagari kwawe va nga balwa.

⁵⁵ Hambi keto, ditiko di na abaniselwa ngu kuxaxuva tixolo; madingano ni matina a tihunzu ta vatate vawe, va na ningwa.

⁵⁶ Nga ti di no humisa tona dikato, ku na abaniselwa thomba yawe hagari ka va i ku vangi, ni ka vavadotho.

⁵⁷ Avava ngu va va nga balwa ka Levhi, madingano ni tinyumba tawe: Va ka Gerisoni, ka nyumba ya ka Gerisoni; va ka Kohate, ka nyumba ya ka kohate; va ka Merari, ka nyumba ya ka merari;

⁵⁸ atiya ndinyumba ta ka Levhi: Nyumba ya ka Libhina, nyumba ya ka Hebroni, nyumba ya ka Mali, nyumba ya ka Musita, nyumba ya ka Kora, se Kohate a to veleka Anirami.

⁵⁹ Se ditina da msikati wa Anirami, i Jokebhedhi, mwana Levhi, awu a nga veleka Levhi a di Egipta; se awuwa i Anirami, a to veleka Aroni, ni Mosi, ni ndiyawe Miriyamu.

⁶⁰ Se Ka Aroni ku to velekwa Nadhabhi, Abhihu, Eleyazari ni Itamari.

⁶¹ Kambe Nadhabhi ni Abhihu va to fa, mbimo yi a nga tisa mndilo wa hahanze ka Mkoma.

⁶² Se ava va nga balwa hagari kwawe i 23.000, votshe vavamna va tanga ya mtxima kuya masoni; nguko avava kha va balwa hagari ka vanana va ka Israyeli, nguko kha va ningwa thomba hagari ka vanana va ka Israyeli.

⁶³ Avava ngu va va nga balwa ngu Mosi ni Eleyazari, mphaxeli, va nga bala vanana va ka Israyeli mikovani ka Mowabhi, hafuhi ni Jordhani, ka Jeriko.

⁶⁴ Se hagari ka vava, kha ku nga ni wammweyo ka va va nga balwa ngu Mosi ni Aroni, mphaxeli, mbimo yi va nga bala vanana va ka Israyeli txiwulani ka Sinayi.

⁶⁵ Nguko Mkoma a wombile ngu vona ti to ngu ditshuri va na fela txiwulani; se kha ka sala ni wammweyo, hahanze ka Kalebhi, mwana Jefoni, ni Joxuwa, mwana Nuni.