Mitengo 23 - Bhiblia Yo Sawuleka

¹ Sekoko Bhalahamu a to womba ka Bhalake, a txi khene: “Ni akele kona hawa mtxhanu wa siluvelo ni simbidi, u ni nehela mtxhanu wa marole ni mambidi, ni mtxhanu wa tihamba ni timbidi.”

² Bhalake koko a to maha madingano ni ti Bhalahamu a nga m'gela; se Bhalake ni Bhalahamu, va to ningela dirole ni hamba txitimwi ka txiluvelo tximwetxo ni tximwani.

³ Sekoko Bhalahamu a to khene ka Bhalake: Ema kona hafuhi hawa ka mphaxo kwako wo hiswa ani ni na tshuketa didhawa; mwendo Mkoma a nata woneka kwangu; se ni nata kugela ti a no ni leleta tona. Sekoko a to kwela ka wukhalo wo guleka.

⁴ Se mbimo yi Txizimu txi nga manana ni Bhalahamu, ene a to khene: Konkuwa ni lulamisile siluvelo sa mtxhanu ni simbidi, ni maha mningelo ngu dirole ni hamba txitimwi ka txiluvelo tximwani ni tximwani.

⁵ Sekoko Mkoma a to gela Bhalahamu a ti a fanelo kuya womba, a txi khene: Konkuwa tshumela u txiya ka Bhalake, u ya m'gela ti ni tiya.

⁶ Se Bhalahamu a to tshumela eya ka Bhalake, eya mmana a di emile hafuhi ka mphaxo wo hiswa, kumweko ni votshe vathangeli va Vamowabhi.

⁷ Sekoko Bhalahamu a to thula ndando e embelela, a txi khene: “Bhalake a ni dhani na ni di Arani, mfumeli wa Mowabhi, ngu mimangoni ka wutxani, a txi khene: Hi nga ruketela Jakobe! Ngono u ta henyela Israyeli.”

⁸ Ni na mrukisa kutxani ani, awu Txizimu txi si mrukiko kani? Ina ni nga vengela awu Mkoma asi m'vengeliko kani?

⁹ Nguko na mmona ni di txitimwi ka marigwi, ni wonisisa ni di mmangoni, ni wona vathu va nga zumba ngu didhawa. Ava va si ti fananisiko ni vamwani vathu, va mamwani matiko.

¹⁰ I mani a sikotako kubala Jakobe wo tala nga lithulu kani? Hambi kuziva mtengo wa wumune wa va ka Israyeli kani? Moya wangu wu nafe ngu mafelo a vo lulama, ni magwito angu nga awe!

¹¹ Sekoko Bhalake a to khene ka Bhalahamu: “Ngu kutxani u ni mahelako to nga tiya kani? Ani ni ku dhanete ku ta ruketela valala vangu, se awe wo ta va katekisa!”

¹² Se ene la to xamula a txi khene: “U pimisa ti to ani kha ni nga ni fanelo yo womba ti Mkoma a vekako ha txisofu kwangu kani?”

Txiprofeto txa wumbidi txa Bhalahamu

¹³ Sekoko Bhalake a to khene ka Bhalahamu: “Na kukombela ti to hi tsule ka wumwani wukhalo, eyo u no ya va wona kona; u na wona didhawa dokari dwe, aniko khu na mbi va wona votshe; se awe u na va ruketela, u di koneho.”

¹⁴ Ngu koneho, a to mteka e tsula nayo thembweni ka Zofima, ngu txitimwi ka Pisiga; se konaho a to aka mtxhanu wa siluvelo ni simbidi, e ningela dirole ni hamba, txitimwi ka txiluvelo tximwani ni tximwani.

¹⁵ Sekoko Bhalahamu a to khene: “Zumba kona hafuhi hawa ka mphaxo wako wa kuhiswa, ani ni na ya tshangana ni Mkoma haleya.”

¹⁶ Se mbimo yi Mkoma a nga manana ni Bhalahamu, a to m'gela ti a fanelako kuya womba, a txi khene: “Tshumela u txiya ka Bhalake, u na ya m'gela ti ni tiya.”

¹⁷ Se Bhalahamu a to tshumela eya ka Bhalake, a txi ya mmana a di emile hafuhi ni mphaxo wakwe wo kuhiswa, ni vathangeli va Vamowabhi, a di emile navo. Bhalake a to khene kwakwe: “Mkoma a ti khene txani kani?”

¹⁸ Sekoko Bhalahamu a to thula kambe ndando yakwe, a txi khene: “Wuka Bhalake, u engisa; riya nzeve, awe mwana Zipora!

¹⁹ Txizimu kha txi na makuhu nga m'thu. Lambi, txona hi nga mwanana wa m'thu wo txitxa-txitxa. Txizimu hi nga txo womba dwe txi si mahi, ina kha txi mahi ti txi nga womba kani? Kasi hi nga txo womba ti txi tatiseka kani?

²⁰ Wona taku, ni amukete txirumo txo katekisa; Txizimu txi katekisile, se ani kha ni na mbi hundulusa.

²¹ Ani kha ni woni dikhombo ka Jakobe, hambi kukarateka ka Israyeli. Mkoma Txizimu txawe a kumweko nayo mndani kwakwe. Mkoma wawe, awu va mahako migiyo ya ku mtsakela.

²² Txizimu txi va humisile Egipta. Txi va ningile mtamo wa nyari.

²³ Nguko kha wu ngaho wurindi wo wukela Jakobe. Hambi wuñanga wo dingana kuwukela Israyeli. Yata mbimo yi ku no wombwa ngu Jakobe ni Israyeli ngu txikhati txa kona. Njitxani txi nga mbi mahwa ngu Txizimu!

²⁴ Wonani tito, ava vathu va wuka kufana ni ngonyamo ya makati. Va ema kufana ni matune wa ngonyamo. Yona kha yi oteli yi sanzi kumita mpfimba wa yona, ni kusela mnoha wa vale yi nga va daya.”

²⁵ Sekoko Bhalake a to angula a txi khene: “Awe Bhalahamu, ku nga ti u si lavi ku va phosela, u nga va katekise!”

²⁶ Kambe Bhalahamu a to xamula a txi khene ka Bhalake: “Ina kha na kugela ku totshe ti Mkoma a no womba, ani ni na ti maha kani?”

Txiprofeto txa wuraru txa Bhalahamu

²⁷ Bhalake a to engeta a txi khene ka Bhalahamu: “Ngono, ni ta kukomba wumwani wukhalo, mwendo Txizimu txi na tumela ku va phosela ngu kona.”

²⁸ Sekoko Bhalake a to yisa Bhalahamu txitimwi ka mmango wa Peyori, wo rendekelana ni txiwula.

²⁹ Bhalahamu a to khene ka Bhalake: “Ni akele kona hawa mtxhanu wa siluvelo ni simbidi, u ni lulametela mtxhanu wa marole ni mambidi, ni mtxhanu wa tihamba ni timbidi.”

³⁰ Bhalake koko a to maha madingano ni ti Bhalahamu a nga m'gela ti to e maha; mningelo wo hiswa, ngu dirole ni hamba, ka txiluvelo tximwetxo ni tximwani.