Mitengo 18 - Bhiblia Yo Sawuleka

Tifanelo ta vaphaxeli ni ta Valevhi

¹ Sekoko Mkoma a to khene ka Aroni: Awe, ni vanana vako, ni nyumba ya tate wako, mi na amukela kunemela ka nyumba yo sawuleka, ni ti to awe ni vanana vako, mi na rwala mnandu wa wuphaxeli wanu.

² U na tsuketisa hafuhi vananu i ku va nyumba yaka Levhi, lihunzu la tate wako, va na va kumweko ni nawe, va txi kuthumela, mbimosi awe ni vanana vako mi khozelako masoni ka ditenda da Wufakazi.

³ Vona va na maha mthumo wako ni wa ditenda dotshe. Aniko va nga thuke ve tshuketa aha ka siya so sawuleka, hambi ha txiluveloni, nguko va ngafa, kumweko ni nawe.

⁴ Aniko va na va hafuhi ni nawe, ve kuvhunetela mithumo ya mu ditendani ka msengeletano, ni yotshe mithumo ya ditenda; kambe awu i ku mluveli a nga tshukete hafuhi kwanu.

⁵ Mi na xayisa siya sa wukhalo wo sawuleka, ni mthumo wa txiluvelo, kasi ku si maneki kambe txiviti txo wukela vanana va ka Israyeli.

⁶ Wonani ti to konkuwa, ni sawute vanana va ka Levhi, ni va thavisa hagari ka vanana va ka Israyeli, ve ningelwa kwanu ni ka Mkoma, kasi ve thuma mthumo wa ditenda, ni wa msengeletano.

⁷ Awe ni vanana vako, mi na teka mthumo wa wuphaxeli ka totshe ti ti lumbako mthumo wa stxiluvelo, ni sotshe si si ku ngu msana ka m'jiyo; se anu mi na teka mthumo wa mphaxeli, se mluveli ngako a txi tshuketa hafuni a na fa.

Txyavelo txa vaphaxeli

⁸ Mkoma a to khene kambe ka Aroni: “Wona ti to awe ni ku ningile mthumo wa sotshe so sawuleka asi vanana va ka Israyeli va nga si ningela kwangu; se ni si ningete kwako, kasi si txi va txyavelo kwako ni ka vanana vako, kala ka mbimo yo mbi guma.”

⁹ Hagari ka siya si so sawuleka ngutu kuleka ngu si so maha ngu kuhiswa; asi i ku sako ngu siya: Miningelo yawe yotshe, miningelo ya sakudya, ni miphaxo; yotshe ya kuonha, ni miphaxo yotshe ya minandu, ayi va no maha midiho kwangu; sotshe asi so sawuleka ngutu nzako, ni vanana vako.

¹⁰ Anu mi na dya sakudya sa sinene ngutu; kambe votshe vathu va na sidya. Nguko nzilo so sawuleka ngutu.

¹¹ Asi ni sona si na maha sako: Miningelo yi vanana va ka Israyeli va humisako, ka sotshe si si guletwako ngu txikombiso txa mningelo, va txi si ningela ngu kwako, ni ka vanana vako, va mazambi ni vamahorana, eto ti nava mlayo wa yotshe mbimo. Se votshe ava va nga sawuleka ka nyumba yako, va na ni fanelo ya kusidya.

¹² Wotshe mtona wa wunene, ni vhinya yotshe ya yiphya, kumweko ni fulaho, ni sotshe si ku sa sinene, si lumbako mningelo wa Mkoma, ni si ningile kwako.

¹³ Yotshe mihando yo khata ya ditikoni kwako, ayi yi ningelwako ka Mkoma, yi na kulumba; ni votshe ava va mahako ta tinene va nyumbani kwako, va na dya sotshe.

¹⁴ Sotshe si si no mahwa mningelo ka Mkoma ngu va ka Israyeli, si na maha sako.

¹⁵ Otshe matiwula ma no tiswa ka Mkoma, a vathu ni a sihari, ma nava ako; hambiko u na tirula matiwula a vathu; ni matiwula a sihari so yila, u ma tekisa.

¹⁶ Se awe u na ma tirula ma di ni tanga yo dingana mtxima, u na dinganisa ngu tanga ya mtxhanu wa maxekele a silivela, madingano ni dixekele da wukhalo wo sawuleka, awu wu ku ni magumi mambidi a magera.

¹⁷ Aniko matiwula a homu ya makati, ni a nvuta, ni a phongo, kha ma na mbi tirulwa; nguko ma sawulekile: U na theketa mnoha wa kona ha txiluveloni, u hisa mafura a kona ngu mningelo wo hiswa, wo bhumula ka Mkoma.

¹⁸ Se nyama ya kona yi na kulumba, kumweko ni khana yo ndiwitelwa, u na wila mnenge wa txinene u txi dya.

¹⁹ Yotshe miningelo ayi vanana va ka Israyeli va no ninga Mkoma, ya simaha so sawuleka si nota ningelwa kwako, kumweko ni ka vanana vako, va mazambi ni vamahorana, awuwa wu na va mlayo wa yotshe mbimo. Nguko atxiya, njitumelelano txa kala kupinduka, txa mnyu masoni ka Mkoma, a txi txi no maha txako ni ka liveleko lako.

²⁰ Mkoma a to womba ka Aroni, a txi khene: Awe, khu na mbi va ni thomba ditikoni kwawe, awe khu na mbi va ni txyavelo txa txilo hagari ka vanana va ka Israyeli.

Asi si lumbako va ka Levhi

²¹ Wonani tito, vanana va ka Levhi ni vaningile sotshe sa wugumi si txi va thomba yawe, asi si humiswako sa miningelo ngu va ka Israyeli, ngu mhaka ya mthumo wu va mahako ditendani ka msengeletano.

²² Ti to vanana va ka Israyeli, va siswi ve tshuketa hafuhi ka ditenda da msengeletano, nguko va nga rwala mnandu, va txifa.

²³ Ngu mhaka yeto, va na thuma mthumo wa ditenda da msengeletano, ve rwala vapune mnandu wawe. Atxiya txi na va txileleto txa kala kupinduka, ka tiveleko tanu, kha si na mbi va ni thomba hagari ka vanana va ka Israyeli.

²⁴ Nguko sawugumi, asi vanana va ka Israyeli va ningelako ka Mkoma, ni si ningete ka va ka Levhi, si txi maha thomba yawe. Ngu konaho, ni wombile ti to kha va na mbi va ni thomba yimwani, hahanze ka vanana va ka Israyeli.

Sawugumi, ni va ka Levhi

²⁵ Mkoma a to womba ka Mosi a txi khene:

²⁶ Se u na womba ka Valevhi u txi khawe: Ku ngako u txi amukela sa wugumi sa vanana va ka Israyeli, asi ni mi ningako kuva thomba yanu, nanu mi na thavisa sa wugumi ka sona, mi ningela ka Mkoma.

²⁷ Se mningelo wanu wo ndiwitelwa wu na balwa kwanu, kufana ni mningelo wa ha wuhuleloni, ni ku nga vhinya ya yiphya ya dipipani.

²⁸ Konaho mi na ningela ka Mkoma sa wugumi, ka sotshe si mi no si amukela ka vanana va ka Israyeli; ngu msana keto mi na ningela mningelo wa Mkoma ka mphaxeli Aroni.

²⁹ Ka sotshe si mi no ningwa, mi na thavisa simwani sa sinene mi ningela; awuwa ngu wona mningelo wo sawuleka.

³⁰ Ngako u di mahileto, u na khawe kwawe: Ku nga ti mi txi ningela ngu so tshura ngutu, si na ningwa Valevhi, kufana ni fulaho ni vhinya si ningwako ngu vamwani.

³¹ Kasi ku anu mi na sidya ni ka wuhi wukhalo; anu ni mimwaya yanu, nguko i txhatxhazelo ya mithumo yanu, ayi mi thumako ditendani ka msengeletano.

³² Mi txi ningela ngu so tshura ngutu, kha mi na mbi va ni mnandu ni wawumwewo, aniko ko mi nga nzabwiseni miningelo yo sawuleka ya vanana va ka Israyeli, nguko mi nga fa.