Mitengo 15 - Bhiblia Yo Sawuleka

Milayo madingano ni miningelo ni miphaxo

¹ Msana keto, Mkoma a to womba ka Mosi a txi khene:

² Gela vanana va ka Israyeli u txi khawe: “Ngako mi txi hoka ka ditiko di ni no mi ninga mi aka ka dona,

³ mi humisa mningelo ka Mkoma, mphaxo wo hiswa, mwendo mhamba yo tatisa txixambanyo, mwendo ku ngava mningelo wa kuranda kwanu, ngu mixuvo yo lava kuningela ka Mkoma mningelo wo bhumula, ngu tinvuta, mwendo tihomu ta mikati;

⁴ sekoko awu a humisako mningelo wakwe ka Mkoma, ngu mningelo wa sakudya, a na ningela sawugumi, ngu mpupu wo basa, wo kanyangelwa, i ku mpimo wa wumune wa txibhembzana, mpimo wa mifarasa yimbiya ya mtona.

⁵ U na ningela ngu vhinya ya mpimo wa wumune wa hini, kasi kumaha mningelo wa sa kusela, kumweko ni nvuta yimwani ni yimwani, yi phaxwako ngu kuhiswa, mwendo kudawa.

⁶ Se ka hamba ni yimwani, u na ningela mningelo wa sakudya sa magumi mambidi a mpupu wo tshura, wu ti kanyangetwe ngu mpimo wa wuraru wa hini ya mtona,

⁷ amu ka mpimo wa wuraru wa hini wa vhinya, kasi kumaha mningelo wa sa kusela, u na ningela ngu so bhumula, asi si tsakisako Mkoma.

⁸ Sekoko, u txi ningela ngu dirole da didhuna kasi kumaha mphaxo wo hiswa, ni wo tatisa txixambanyo, mwendo mphaxo wa kuthutha masoni Mkoma;

⁹ u na ningela didhuna da dirole kumweko ni mpimo wa wuraru wa sa wugumi sa mpupu wo tshura wo kanyangelwa ni diphikama ya hini ya mtona;

¹⁰ u na ningela ni diphikama ya hini ya vhinya, kasi kumaha mphaxo wo hiswa wu ku ni kubhumula ko tshamba, ka Mkoma.

¹¹ Ku na mahwa toneto ka didhuna dimwani ni dimwani, ni ka hamba yimwani ni yimwani, ni ka txifuyo tximwani ni tximwani txa tinvuta ni tiphongo.

¹² Mi na mahisa toneto ka txifuyo tximwani ni tximwani madingano ni kutala ka sona, nga ti mtengo wu ku ngu tona.

¹³ Awu i ku txizikwa hagari ka vathu vakakwawe, a txi humisa mningelo, a na mahisa tonto, ngu mphaxo wa kuhiswa, awu wu ku ni kubhumula ko tshamba ka Mkoma.

¹⁴ Mluveli a hanyako hagari kwanu, mwendo m'thu wuhi ni wuhi mi nga aka nayo, ngako a txi lava kusenga mningelo wa mphaxo wo hiswa, kasi kubhumulisa ka Mkoma, a na ningela kufana ni nanu.

¹⁵ Ku nava mlayo wumwewo motshenu ka msengeletano, ni kwa mluveli, wu a nga aka hagari kwanu; atxiya ngu txona txileleto kala ka tiveleko tanu, ni ka mluveli, ni kwanu, masoni ka Mkoma.

¹⁶ Ku na vaho mlayo wumwewo dwe, ni fanelo yimweyo kwanu ni ka mluveli wu a nga aka hagari kwanu.”

¹⁷ Mkoma a to womba-womba kambe ka Mosi a txi khene:

¹⁸ Gela vanana va ka Israyeli u txi khawe: “Ku nga ti mi txi hoka ka ditiko di ni no mi yisa ka dona;

¹⁹ sekoko ku na maheka tito, mbimo yi mi no lava kudya sakudya sa ha mafuni, mi na ningela mningelo wo ndiwutelwa ka Mkoma.

²⁰ Ka sile so khata kuelulwa, mi na ningela txibhubhutela txo ndiwitelwa; kumweko ni mningelo wa wuhuleloni, mi na ningela tona eto.

²¹ Ka sile mi no khata ngu sona kuelula, mi na ningela ka Mkoma, mningelo wo ndiwitelwa, ka totshe tiveleko tanu.”

²² Se ngako mi txi thuka mi hoheta ngu kwa mbi xayisa milayo yotshe ya Mkoma, ayi yi nga leletwa Mosi,

²³ ni sotshe asi Mkoma a nga txhamusela ngu txisofu txa Mosi, kukhukhela ka ditshiku di ku nga ningwa sileleto, kala ka tiveleko tanu totshe.

²⁴ Ngako i di kuonha ngu phazamo, na msengeletano wu sa nga tiziva, se wotshe msengeletano wu na ningela didhuna da mningelo wo hiswa, wo bhumula, masoni ka Mkoma, ni mningelo wa sakudya, ni sa kusela, madingano ni txileleto txa kona; msengeletano wu na ningela ni mabhongwe, kasi kumaha mphaxo wa kona.

²⁵ Se mphaxeli a na maha mphaxo wa m'diho wa txionho, kasi kubasisa msengeletano wotshe wa vanana va ka Israyeli, kasi kudivalelwa, nguko kuonha ka kona kumahilwe ngu phazamo, se vona va henile mningelo wawe i ku mphaxo wu hiselwako Mkoma, ni mphaxo wawe masoni ka Mkoma, ngu mhaka ya sionho sawe, asi va nga si maha ngu phazamo yawe.

²⁶ Wu na divalelwa wotshe msengeletano wa vanana va ka Israyeli, kumweko ni mluveli wule a nga aka hagari kwawe, nguko votshe vathu va to onha ngu kuphazama.

²⁷ Ngako m'thu mmweyo a di ni txionho txa phazamo, a na ningela phongo ya dilembe dimwedo, i ku mningelo wo thavisa txionho.

²⁸ Mphaxeli a na maha ka Mkoma mphaxo wa txionho txa m'thu wu a nga onha ngu kulunduma, masoni ka Mkoma, a txi mahelwa mphaxo wa txionho a na divalelwa.

²⁹ Hambi i ti txizikwa txa vanana va ka Israyeli, mwendo mluveli wu a nga aka hagari kwanu; wu na va mlayo wumwewo ka wule a nga onha ngu “kuluduma.”

³⁰ Se awu a nga onha khakwenye hambi i ti txizikwa mwendo mluveli, a ruka Mkoma; eyo m'thu a na tutumiswa hagari ka vanana va kakwawe.

³¹ Nguko a eyisile dipswi da Mkoma, e leka khakwenye ati a dinganako ku ti maha; eyo m'thu a na tutumiswa ngu txionho txakwe apune, ka va kakwe.

M'thu wu a nga mbi xayisa Sabbata

³² Ka mbimo yi vanana va ka Israyeli va nga ti txiwulani, va to mana wamwamna a txi ganga tikhuni ngu ditshiku da Sabbata.

³³ Ava va nga mmana a txi ganga tikhuni, va to mneha ka Mosi ni ka Aroni ni ka wotshe msengeletano.

³⁴ Va to m'veka e verela ti a no lamuliswa tona; nguko ku si se wombwa malamulelo akwe.

³⁵ Mkoma koko a to khene ka Mosi: “Eyo m'thu ti dingana ku e dawa; wotshe msengeletano wu na m'balisela ngu marigwi, hahanze ka wugovelo.”

³⁶ Sekoko wotshe msengeletano, wu to mndinda wu tsula nayo hahanze ka wugovelo, wu txi ya m'balisela ngu marigwi eza efa, madingano ni ti Mkoma, a nga leleta tona ka Mosi.

Makhatxa a mabhaji

³⁷ Se Mkoma a wombile ka Mosi a txi khene:

³⁸ Va gele vanana va ka Israyeli ti to ve timahela makhatxa, ve ma rungela ngu titshokani ka syambalo sawe, ka sotshe situkulwana sawe, ve ma rungela ka otshe madhawa, ngu malinya a mkuxe magwito ka kona.

³⁹ Ngu mhaka yeto, makhatxa a kona, mbimosi mi no ma wona, ma na mi maha mi khumbula milayo ya Mkoma, kasi kuxayisa milayo tito, mi si londeti minavelo yo biha ya wugango.

⁴⁰ Mi na khumbula yotshe milayo yangu, mi yi maha, mi txi maha eto mi na va vo sawuleka ka Txizimu txanu.

⁴¹ “Ani ngani Mkoma, Txizimu txanu, ni nga mi thavisa ditikoni ka Egipta, ti to niva Txizimu txanu; ani ngani Mkoma, Txizimu txanu.”