Mitengo 13 - Bhiblia Yo Sawuleka

Tixoli ta digumi ni timbidi

¹ Se Mkoma a to gela Mosi a txi khene:

² “Ruma vathu va txi ya xola ditiko da Kanana, adi ni ngadi ningela ka vanana va ka Israyeli. Mi na sawula m'thu mmweyo, mmweyo, ka nyumba yimwani ni yimwani, ka vatate vanu, mi ruma dwe awu i ku wa hombe wa kona.”

³ Se Mosi a to va ruma madingano ni kuleleta ka Mkoma, na va di txiwulani Parani; votshe vavamna ava i nga ti misungo ya vanana va ka Israyeli.

⁴ Se matina awe ngu awa: Ka lihunzu la Rubheni i Samuwa, mwana Zakuri;

⁵ ka lihunzu la Simiyoni i Safati, mwana Hori;

⁶ ka lihunzu la Judha i Kalebhi, mwana Jefoni;

⁷ ka lihunzu la ka Isakari i Igali, mwana Josefa;

⁸ ka lihunzu la ka Efrayime i Hoseya, mwana Nuni;

⁹ ka lihunzu la ka Bhenjamini i Paliti, mwana Rafu;

¹⁰ ka lihunzu la Zebhuloni i Gadhiyeli, mwana Sodhi;

¹¹ ka lihunzu la Josefa amu ka va ka Manasi, i Gadhi mwana Suzi;

¹² ka lihunzu la ka Dhani i Amiyeli, mwana Gemali;

¹³ ka lihunzu la Aseri i Setura, mwana Mikayeli;

¹⁴ ka lihunzu la Naftali i Nabhi, mwana Vapisi;

¹⁵ ka lihunzu la Gadhi i Geweli, mwana Maki.

¹⁶ Aawa ngu ona matina a vathu va Mosi a nga va ruma kuya xola ditiko; konaho Mosi a to thula Hoseya, mwana Nune, ditina daku: I Joxuwa.

¹⁷ Mosi a to va ruma kuya xola ditiko da Kanana; a txi khene: “Tsimbilani ngu didhawa da mswa-ditambo, mi komba mmangoni ka wulambwe

¹⁸ mi txi ya xola makhalelo a ditiko dileya; mi wona ni vathu va va nga aka ka dona; ti to mbathu va ku ni mtamo. Mi tshumela mi wona kambe ti to mbavangi, mwendo kha va tala.

¹⁹ Mi wona kambe ditiko da kona tito, ditshurile mwendo di ya tshura, mi txi wona ni miti yi va nga aka ka yona, mwendo nja magovelo, mwendo mikhokhola.

²⁰ Mi wona mafu a kona ti to ma nonile mwendo njigwangwa; mi wona ni mindonga taku yiho mwendo kha yi ngaho. Tsanisani, mi na wuya ni mihando ya kona ya ditikodo.” I ti ti mbimo yo vitwa mauvha.

²¹ Ngu tona eto, va to kwela kasi kuya xola ditiko, ve khatela txiwulani ka Zimi, veza ve hoka Rohobhi, ngu nzila yi yiyako Hamati.

²² Se ve kwela ngu didhawa da wulambwe ka kona, veza ve hoka Hebroni; eho ku nga ti zumbile Ahimani, ni Sezayi, ni Talimayi, vatukulu va Anaki (Hebroni ngu kona ko khata kuakwa ngu masoni ka mtxhanu wa malembe ni mambidi na ku si se akwa Zowani, ka Egipta.)

²³ Kambe va to hoka mkovani ka Exikoli, konemo va to phatula didhavi da muuvha, ni txizangwa txa mauvha, ve ta hayeka ka donga, vathu vambidi ve pakata, ni maromani, ni makuwu.

²⁴ Wukhalo wa kona va to wu dhana ti taku mkovani ka Exikoli, ngu mhaka ya ku va nga ya funya txizangwa txa mauvha atxiya vanana va ka Israyeli va nga txi funya.

²⁵ Va di fungate mune wa magumi a masiku, va to wuya ngu kuxolani ka ditiko.

²⁶ Mbimo yi va nga wuya, va to ya ka Mosi ni ka Aroni, ni ka wotshe msengeletano wa ka Israyeli, amu txiwulani ka Parani, hafuhi ni Kadhesi.

²⁷ Va to ya xawutela tiya ka Mosi, va txi kha vona: “Hi wulete ka ditiko di mi nga hi ruma ka dona; kha ditshuri, di khulunga masi ni wulombe; mihando ya kona ngu yona yiya.

²⁸ Kambe vathu va nga aka ka ditikodo, mbathu va mtamo; madhoropa awe mikhokhola ya hombe ngutu; koneyo kambe, hi woni vatukulu va ka Anaki.

²⁹ Vaamaleki va akile ngu didhawa da wulambwe, Vaheti, ni Vajebhusi, ni Vaamori, va akete mmangoni. Vakanana va akile hafuhi ni linene, ni txinambwanani ka Jordhani.”

³⁰ Sekoko konaho Kalebhi a to malata vathu, va va nga ti tshanganile masoni ka Mosi, a txi khene: “A hi tsimbileni hi ya teka ditiko, nguko kha ditshuri hi na ya va xula.”

³¹ Kambe msana ka kuva Kalebhi a di va tsanisile kutshumela, vathu va va nga ti tsute kuya xola ditiko, va to kaneta va txi kha vona: “Hambi hi nga tshumela, kha hi na mbi ya va xula, nguko mbathu va ku ni mtamo ku hi pinda.”

³² Konaho va to xawutela kubiha masoni ka vanana va ka Israyeli, ngu ditikodo va nga ya di xola, va txi kha vona: “Ditiko hi ngaya ka dona, ditiko do dayela vaaki va dona; votshe vathu va hi nga va wona mbo lapha ngutu.

³³ Kambe hi woni vanyasihakate vanana va ka Anaki, va liveleko la vanyasihakate. Amu kuwonani kwathu, athu hi txi fanana ni titshera masoni kwawe; ni vona va txi hi wonisa toneto.”