Mitengo 12 - Bhiblia Yo Sawuleka

Kutsayiswa ka Miriyamu

¹ Se Aroni ni Miriyamu va to khata kulenga Mosi, ngu mhaka ya wamsikati wa ka Kuxe, a nga ti tekani ni Mosi; ngu kule a nga ti tekile wamsikati wa ka Kuxe.

² Va to womba-womba va txi kha vona: “Kasi Mkoma a to womba-womba ngu Mosi ekha kani?” Ina kha womba-womba ngu ngathu nathu kani? Se Mkoma a to engisa.

³ Se Masoni ka Mkoma kuwonekile ti to Mosi i ti m'thu wo dikha ngutu kupinda votshe vathu ha mafuni.

⁴ Koneko, ngu txikuluveta, a to dhana Mosi, ni Aroni, ni Miriyamu, a txi khene: “Humani anu vavararu mi txiya ditendani da msengeletano!” Konako va to huma ngu wuraru wawe ve tsula.

⁵ Sekoko Mkoma a to txhika ngu ka phande ya direfu, a txi ta ema ha txikeni ka ditenda; msana keto, a to dhana Aroni ni Miriyamu, se va to huma ngu wumbidi wawe.

⁶ Se a txi khene: “Konkuwa engisani mapswi angu; ngako ku ti ni mprofeti, ani Mkoma, ni na ti wonekisa kwakwe ngu txiwoniso, ni womba-womba nayo ngu mloro.

⁷ Kambe kha ni mahi eto ka Mosi txithumi txangu; a thembekile amu nyumbani kwangu kotshe.

⁸ Ene no womba-womba nayo ngu txisofu, ni ti kombisa, na i si nga kusisalani; kambe ene wa so maha ngu kuwona wutumbu wa Mkoma; ngu kutxani koko mi nga mbi thava kulenga txithumi txangu Mosi kani?”

⁹ Kuhenya ka Mkoma ku to kukumuka ngutu, e khukha e tsula.

¹⁰ Mbimosi direfu di nga khukha txitimwi ka ditenda, koneko Miriyamu mmidi wakwe wu to basa ngu tshekela, wu txi fanana ni hunguva. Aroni a to wona Miriyamu ti to ana ni tshekela.

¹¹ Se Aroni a to gela Mosi a txi khene: “Ayiwe, nyamne wangu! U nga hi vekele txiviti ngu mhaka ya txionho txi hi nga va natxo txa wuphukuphuku, txa kwa mbi ziva ta tinene ta Mkoma.

¹² Maalakanyo angu ni ti kombela tito, Miriyamu a nga fane ni mwanana wo huma ngu mndani ka mame wakwe a di fite, awule nyama yokari yakwe yi nga sina!”

¹³ Se Mosi a to dila ka Mkoma, a txi khene: Txizimu txangu, “na ku kombela ti to u mninga kukalamuka Miriyamu!”

¹⁴ Se Mkoma a to khene ka Mosi: “Ku nga ti tate wakwe a txi mthurela khoheni, ina kha na mbi va ni tingana mndani ka mtxhanu wa masiku ni mambidi kani? A na khotelwa mtxhanu wa masiku ni mambidi hahanze ka wugovelo; se msana keto, a na wuyiswa kambe.”

¹⁵ Ngu kumaha keto, Miriyamu a to khotelwa mtxhanu wa masiku ni mambidi, hahanze ka wugovelo, vathu kha va nga khukha kala Miriyamu e wuya.

¹⁶ Kambe msana keto, vathu va to khukha ngu Hazerote; va txi ya zima matenda awe Parani.