Mitengo 11 - Bhiblia Yo Sawuleka

Vathu va ngungurukela kona Tabhera

¹ Ku to maheka ti to vathu ve khata kungungurukela tinzeveni ka Mkoma; se a di ti engisile eto Mkoma, kuhenya kwakwe ku to hisa, mndilo wakwe wu to tura hagari kwawe, wu tshokomisa vale va nga ti ti magwito ka wugovelo.

² Sekoko, vathu va to dila ka Mosi, ene a to va kombelela ka Mkoma, se mndilo wu to timeka.

³ Awuwa wukhalo wu to dhanwa ku i Tabhera, nguko mndilo wa Mkoma wu turile hagari kwawe.

Mosi e sawula mtxhanu wa magumi ni mambidi a vavhuneteli

⁴ Ka wungi wa valuveli va nga ti zumbile navo, va to tala ngu kunavela kudya nyama; ni vona vanana va ka Israyeli, va to engeta ve dila ngu kulava nyama kudya. Va txi kha vona: “I mani a no hi ninga nyama hi txi dya kani?

⁵ Athu hi alakanya sihaka si hi nga txi dya walo ngu kuranda kwathu kona Egipta, mapswani, magamba, nyala, ni txinyalana.

⁶ Se timbilu tathu ti omile, ha goma, kha hi woni txilo, ho wona ona manna awa dwe!”

⁷ Se manna ma ti ti fana ni timbewu ta kowentro, kambe ma txi nga bhidheliyo.

⁸ Vathu va txi hangalaka ve tsimbila va txi rolela manna ve ma gaya ngu txigayo, ni ku ma sinza ngu ka dithudi; ve ma bhika khadini ve ma maha makhekhe; se kutshamba ka ona ma ti ti fana ni dikhekhe do kanyangelwa ni mtona.

⁹ Ni wusiku, mbimoyi hunguva yiwako ha wugoveloni, manna ni ona ma ti ti wa.

¹⁰ Sekoko Mosi a to engisa kudila ka vathu, mu mimwayani kwawe, m'thu ni m'thu a txi dila a ti ha txikeni ka m'dhuti wakwe; se Mkoma a to henya ngutu, Mosi a to karateka ngutu.

¹¹ Se Mosi a to khene ka Mkoma: Ngu kutxani u mahela wubihi txithumi txako kani, ngu kutxani ni si maniko dikato masoni kwako, na u ti ni rwekile mrwalo wa votshe vava vathu kani?

¹² Ina ngani ni ku tate ni mame wa ngamu yiya yotshe kani? Ina ngani ni nga va veleka, aha ka kuza u ni gela ku khawe: “Va beleke ha msana kwako, nga txikhonje txi belekako mwanana ha msana, u txi va yisa ka ditiko u nga thembisa ngu txixambanyo ka vatate vathu kani?”

¹³ Ni na yi mana hani nyama yo ninga vathu kani? Nguko va ni dilela, va txi kha vona: “Hi ninge nyama hidya!”

¹⁴ Kha ni sikoti ani nokha kurwala vathu vo talisa tiya, nguko va nemela kupinda mtamo wangu.

¹⁵ “Ti di ngeto, na ku kombela tito, u ni ninga lifo konkuwa, kasi ni si woni xomulo yiya.”

¹⁶ Se Mkoma a ti khene ka Mosi: “Dhana madhota a mtxhanu wa magumi ni magumi mambidi, a vanana va ka Israyeli, ava u ti zivako taku madhota a vathu, ni vathangeli va kona; u va yisa masoni ka ditenda da msengeletano, amu va no ya maneka kona ni nawe.”

¹⁷ Sekoko ani, ni na kwitima ni ta womba-womba ni nawe konaho; se ni nata hungula moya wu wu ku nemelako wekha, ni wu veka kwawe, kasi ve kuvhuna; se moya wu na kuvhuna kurwala vathu, na i si ngawe wekha u rwalako.

¹⁸ Se u na gela vathu u txi khawe: Ti basiseni, nguko mangwana mi na khata kudya nyama, nga ha mi nga txi yi dilela tinzeveni ka Mkoma, mi txi khanu: “I mani a no hi ninga nyama hi txi dya, nguko hi ti ti zumbisekile ditikoni ka Egipta.” Se Mkoma a na mi ninga nyama mi txidya;

¹⁹ kha mi na mbi dya ditshiku dimwedo dwe, mwendo masiku mambidi, hambi mtxhanu wa masiku, hambi digumi da masiku, hambi magumi mambidi a masiku.

²⁰ Se nga ha mi nga kanyisa Mkoma, mi na dya nyama mtxima wotshe, kala nyama yiza yi pfhuruka ngu tithonvuni kwanu, miza mi xamuka ngu yona. Ni kambe mi dite, mi txi khanu, ngu kutxani hi nga huma ditikoni ka Egipta kani?

²¹ Se Mosi a to khene: Vathu va ni ku hagari kwawe i 600.000 wa vavamna, na kuve awe u khawe: Ani ni na va ninga nyama va txi dya amu ka mtxima wotshe!

²² Se va na dayelwa tinvuta ni tihomu kasi kuza ve enela kani? Mwendo kutshanganiswa sihaka sa mu lineneni kasi kuza ve enela kani?

²³ “Kambe Mkoma a to khene ka Mosi: Ina diwoko da Mkoma di komile kani? Awe verela, konkuwa, u na wona ti to dipswi dangu, di na maheka mwendo kha di na mbi maheka.”

²⁴ Se Mosi a to huma a txi ya xawutela ka vathu timhaka ta Mkoma. A to tshanganisa mtxhanu wa magumi ni mambidi a madhota a vathu, e va emisa ve randela ditenda.

²⁵ Mkoma a to txhika ngu mu ka direfu, e ta womba-womba ni Mosi; se e teka moya wakwe e wu thela ka madhota ale a mtxhanu wa magumi ni mambidi. Se mbimo si moya wu nga wulela ka vathu, vona va to profeta; hambi keto, kha va nga engeta ve profeta kambe.

²⁶ Kambe wugoveloni ku to sala vavamna vambidi, mmweyo wawe a ti dhanwa ku i Eldhadhe, awu mmwani i Medhadhe. Moya wu to ya khandama txitimwi kwakwe (ngako i ngadi vamwevo va vale va ngadi bhatwe, hambiko va nga si ngaho ditendani), se va to profeta kona wugoveloni.

²⁷ Mmweyo wa dijaha a to tutuma eya gela Mosi tito: “Eldhadhe ni Medhadhe ni vona va profeta wugoveloni.”

²⁸ Se Joxuwa, mwana Nune, mthumeli wa Mosi, i ku mmweyo wa majaha akwe a nga ma sawula, a to xamula ka Mosi a txi khene: “Awe nyamne wangu Mosi, mtsimbe kuprofeta!”

²⁹ Kambe Mosi a to khene kwawe: “Ngu kutxani uva ni txiluse masoni kwangu kani? Ani ni khani i di tinene nga ti votshe vathu va Mkoma va txi profeta, Mkoma e va ninga moya wakwe!”

³⁰ Ngu msana ka totshe, Mosi a to tshumela e wuya wugoveloni kumweko ni madhota a ka Israyeli.

Txizimu txi rumela titshukwa

³¹ Sekoko Mkoma a to rumela diphuho, na di txita ngu lineneni, adi di nga thela titshukwa kotshe wugoveloni, ka mnava wo dingana ditshiku dotshe, ka didhawa dimwani ni dimwani ti txi mbambamela txitimwi ka mafu mpimo wa mikono yimbidi kuguleka.

³² Se vathu kukhukhela ka ditshiku dotshe, ni wusiku wotshe, va to ñolela titshukwa; awu a nga txi ñolela ta tidotho ngu wu a nga ti tatile digumi da tihomeri; va to ti anekela wugoveloni.

³³ Mbimo si va nga txidya, nyama yi ti mu makwasani, Mkoma a to kukumuka ngu kuhenya. Mkoma a to limata vathu ngu dikhombo da hombe.

³⁴ Wukhalowo wu to dhanwa ku i Kibroti-Hatavha, nguko ka wukhalowo ku to kelelwa va wudyi.

³⁵ Vathu va to khukha Kibroti-Hatavha, va txiya Hazerote, va txi ya gova kona.