Mitengo 1 - Bhiblia Yo Sawuleka

Kutilulamisela ka Vaisrayeli kukhukha gu mangoni ka Sinayi ( 1:1--9:23 ) Kubalwa kokhata ka vathu

¹ Mkoma a to womba kambe ka Mosi, txiwulani ka Sinayi, ditendani ka msengeletano, ka ditshiku do khata da mtxima wa wumbidi, ka dilembe da wumbidi da kuhuma kwawe ngu ditikoni ka Egipta, a txi khene:

² “Mahani bhalela ya wotshe msengeletano wa vanana va ka Israyeli, madingano ni tiveleko tawe, ni tinyumba ta vatate vawe, ngu matina a votshe vavamna, ngu mmweyo ni mmweyo;”

³ votshe va kukhukhela ka tanga ya magumi mambidi a malembe kuya masoni, va ka Israyeli vale vo dingano kuya yimbini, mi na va bala madingano ni mabutho awe a tiyimbi, awe ni Aroni.

⁴ Dhanani wamwamna mmweyo ka lihunzu ni lihunzu, ava va nova vathangeli, ka nyumba ni nyumba ya vatate vawe.

⁵ Ndiya koko, matina a vavamna vale va fanelako kuva ni nanu: Ka Rubheni, i Elizura, mwana Xedhura.

⁶ Ka Simiyoni, i Xelumiyeli, mwana Zurixadhayi.

⁷ Ka Judha, i Nasoni, mwana Aminadhabhe.

⁸ Ka Isakari, i Nathaniyele, mwana Zuwari.

⁹ Ka Zebhuloni, i Eliyabhe, mwana Heloni.

¹⁰ Ka vanana va Josefa: Ka Efrayime, i Elisama, mwana Amiyudhe; ka Manasi, i Gamaliyeli, mwana Pedhazuri.

¹¹ Ka Bhenjamini, i Abhidhani, mwana Gidhiyoni.

¹² Ka Dhani, i Ahiyezeri, mwana Amixadhayi;

¹³ ka Aseri, i Pajiyeli, mwana Okrani;

¹⁴ ka Gadhi, i Eliyazafi, mwana Reweli;

¹⁵ ka Naftali, i Ayira, mwana Enani.

¹⁶ Avava ngu va va nga dhanwa ka msengeletano, i ku vathangeli va tihunzu ta vatate vawe, misungo ya magumi a mazana a va ka Israyeli.

¹⁷ Sekoko Mosi ni Aroni, va to teka vavamna vale va nga ti sawutwe, ngu matina awe.

¹⁸ Ngu mtxima wa wumbidi, va to ramba wotshe msengeletano ngu ditshiku do khata, se va to, madingano ngu ni tiveleko tawe, ngu mimwaya yawe, ni tinyumba ta vatate vawe, ngu mtengo wa matina a va kukhukhela magumi mambidi a malembe kuya masoni, ngu mmweyo ni mmweyo.

¹⁹ Madingano ni kuleleta ka Mkoma, Mosi a to va bhalela mu txiwulani ka Sinayi.

²⁰ Vanana va Rubheni koko, i ku matiwula a Israyeli, tiveleko tawe, ngu mimwaya yawe, madingano ni nyumba ya vatate vawe, ngu mtengo wa matina awe, mmweyo ni mmweyo, votshe vavamna va magumi mambidi a malembe ni kuya masoni, avale va dinganako kuya yimbini.

²¹ Ka lihunzu la ka Rubheni ku bhaletwe 46.500.

²² Mbimo yi ku nga bhalelwa vanana va Simiyoni, ngu tiveleko tawe, ni mimwayaya, madingano ni tinyumba ta vatate vawe, va bhatwe mmweyo ni mmweyo, ngu matina a votshe vavamna va magumi mambidi a malembe kuya masoni, avale va dinganako kuya yimbini.

²³ Ku to bhaletwe 59.300, ka lihunzu la Simiyoni.

²⁴ Mbimo yi ku nga bhalelwa liveleko la vanana va Gadhi, ngu mimwaya yawe, madingano ni tinyumba ta vatate vawe, va bhatwe mmwani ni mmwani, ngu matina a votshe vavamna va magumi mambidi a malembe ni kuya masoni, va dinganako kuya yimbini.

²⁵ Kubhatwe ka lihunzu la ka Gadhi 45.650.

²⁶ Mbimo yi ku nga bhalelwa liveleko la vanana va ka Judha, ngu timwaya tawe madingano ni nyumba ya vatate vawe, kubhatwe ngu matina a votshe vavamna va magumi mambidi a malembe ni kuya masoni, avale va dinganako kuya yimbini,

²⁷ kubhatwe 74.600, ka lihunzu la ka Judha.

²⁸ Ka vanana va ka Isakari, ngu tiveleko tawe ni mimwaya yawe, madingano ni nyumba ya vatate vawe, va bhatwe, ngu matina a votshe vavamna va magumi mambidi a malembe kuya masoni, avale va dinganako kuya yimbini,

²⁹ ku batwe 54.400, ka lihunzu la ka Isakari.

³⁰ Mbimo yi ku nga balelwa liveleko la vanana va ka Zebhuloni, ngu mimwaya yawe, madingano ni nyumba ya vatate vawe, va bhatwe ngu matina a votshe vavamna va magumi mambidi a malembe ni kuya masoni, ava va dinganako kuya yimbini,

³¹ ku batwe 57.400, ka linzu la Zebhuloni.

³² Ka vanana va Josefa, ni ka vanana va Efrayime, ngu tiveleko tawe ni mimwaya yawe, madingano ni tinyumba ta vatate vawe, va bhatwe ngu matina a votshe vavamna va magumi mambidi a malembe ni kuya masoni, avale va dingano kuya yimbini.

³³ Ku batwe kwawe 40.500, ka lihunzu la Efrayime.

³⁴ Ka vanana va ka Manasi, liveleko lawe, ngu mimwaya yawe, madingano ni nyumba ya vatate vawe, va bhatwe, ngu matina a votshe vavamna va magumi mambidi a malembe kuya masoni, avale va dinganako kuya yimbini.

³⁵ Ka lihunzu la ka Manasi, kubhatwe 3.200.

³⁶ Mbimo yi ku nga bhalelwa liveleko la vanana va ka Bhenjamini ngu mimwaya yawe, madingano ni nyumba ya vatate vawe, va bhatwe, ngu matina a votshe vavamna va magumi mambidi a malembe ni kuya masoni, avale va dinganako kuya yimbini.

³⁷ Ka lihunzu la Bhenjamini, ku batwe, 35.400.

³⁸ Mbimo yi ku nga bhalelwa liveleko la vanana va ka Dhani, ngu mimwaya yawe, madingano ni nyumba ya vatate vawe, kubhatwe, ngu matina a votshe vavamna va magumi mambidi a malembe ni kuya masoni, avale va dinganako kuya yimbini.

³⁹ Ku batwe kwawe 62.700, ka lihunzu la ka Dhani.

⁴⁰ Mbimo yi ku nga bhalelwa liveleko la vanana va Aseri, ngu mimwaya yawe, madingano ni nyumba ya vatate vawe, kubhatwe, ngu matina a votshe vavamna va magumi mambidi a malembe ni kuya masoni, ava va dinganako kuya yimbini.

⁴¹ Ku batwe kwawe, ka lihunzu la Aseri 41.500.

⁴² Mbimo yi ku nga bhalelwa liveleko la vanana va ka Naftali, ngu mimwaya yawe, madingano ni nyumba ya vatate vawe, va bhatwe ngu matina a votshe vavamna va magumi mambidi a malembe ni kuya masoni, ava va dinganako kuya yimbini.

⁴³ Ka lihunzu la Naftali ku batwe 53.400.

⁴⁴ Avava, ngu va va nga balelwa ngu Mosi ni Aroni, va txi vhunwa ngu digumi da vathangeli ni vambidi va ka Israyeli, i ngadi vaemeli va tinyumba ta vatate.

⁴⁵ Vanana va ka Israyeli va magumi mambidi a malembe ni kuya masoni, vo dingana kuya yimbini, va batwe madingano ni tinyumba ya vatate vawe;

⁴⁶ Votshe va nga balwa i 603.550.

Va ka Levhi

⁴⁷ Ti di ngeto, va ka Levhi, madingano ni lihunzu la vatate vawe, kha va balwa ni vamwani,

⁴⁸ nguko Mkoma a ti wombile ka Mosi, a txi khene:

⁴⁹ Lihunzu la ka Levhi lokha, u nga li bale, hambi kupata mtenga wawe, ka va ka Israyeli;

⁵⁰ aniko, awe, ninga mthumo ka va ka Levhi, wa kuxayisa Nyumba ya Wufakazi, ni siya sa yona, ni sotshe si si yi lumbako. Vona va na rwala Nyumba ni sotshe siya sa kona, va na thumela ka yona mthumo wa yona, kambe va na zumbisa ku yi randela.

⁵¹ Nyumba yi txi lava kuthaviswa, va ka Levhi va na yi khunulela; ngako yi txi dingana kuphemberuswa, va ka Levhi va na yi aketa. Ni wuhi m'thu wa walo a tshuketako hafuhi ka yona a na fa.

⁵² Vanana va ka Israyeli va na zumba mmwani ni mmwani ka wukhalo wakwe, hafuhi ka m'jeke wakwe, ngu mabutho awe a yimbi.

⁵³ Kambe va ka Levhi va na gwimba matenda awe ngu madhawani ka Nyumba ya Wufakazi, kasi Txiviti txa Txizimu txi si weli txitimwi ka msengeletano wa vanana va ka Israyeli; ngu kumaha keto, va ka Levhi va na ñola mthumo wo xayisa Nyumba ya Wufakazi.

⁵⁴ Vanana va ka Israyeli va to maha nga ti Mkoma a nga leletisa tona ka Mosi.