Mika 6 - Bhiblia Yo Sawuleka

Txizimu txa lamula vathu va txona

¹ Engisani konkuwa ti a wombako Mkoma: Khukha, ulwa ni mimango, se simangwana si na engisa dipwsi dako.

² Engisani anu mimango dizunga da Mkoma, ni nanu makhato a mtamo a mafu; nguko Mkoma a ni dizunga ni vathu vakwe, se a na thethisana ni Israyeli.

³ Anu vathu vangu! Njitxani ni nga mi mahela kani? Niku nji txani ni nga mi rera ngu txona kani? Ni xamule!

⁴ Kha ditshuri ni mi humisile ditikoni ka Egipta, ni ka nyumba ya wukhumbi ni mi tirute, kambe ni vekile Mosi, ni Aroni, ni Meriamo, masoni kwanu.

⁵ Anu vathu vangu, alakanyani makungo a Bhalake, mfumeli wa Mowabhi, ni ti a nga mxamula Bhalahamu, mwana Bheyori, kukhukhela Sitime kala Giligali; kasi ku mi ziva wululamo wa Mkoma.

A ti Txizimu txi ti lavako

⁶ Ni na ya ni di ni txani masoni ka Mkoma, ni txi ya nama ka Txizimu Nyatxitimwi kani? Ni nata masoni kwakwe ni di ni miphaxo yo hiswa, ni marole a dilembe dimwedo kani?

⁷ Ina Mkoma a na tsaka ngu magumi a mazana a tinvuta kani? Ngu 10.000 ya siya so tala ngu mafura kani? Ni na ningela matiwula angu ngu mhaka ya wuhambunyeti wangu kani? M'hando wa mndani kwangu, ngu mhaka ya txionho txa dihika dangu kani?

⁸ Ene a kuzivisile, awe m'thu, a ti i ku ta tinene; ni ti Mkoma a ti kombelako kwako, kuva u maha kululama, u randa tinene, u tsimbila ngu kutinamisa ni Txizimu txako.

⁹ Dipswi da Mkoma da huwelela didhoropani, se txhari yi na wona ditina dako: Engisani ndonga ni wu a nga yi ruma.

¹⁰ Ina yi nga diho thomba ya wubihi nyumbani ka m'bihi kani? Ni mpimo wa wudotho wo vengeka kani?

¹¹ Ina ani ni nga huluka ni sikalo so kanganyisa kani? Ni disaka da mipimo ya wudyeleli kani?

¹² Nguko vanyatithombe kona va tate ngu kulwisa, kambe vahanyi va kona va womba-womba makuhu; se lidimi lawe la kanganyisa mkanani kwawe.

¹³ Ngu toneto, ani nani ni na kuheta mtamo, ni kudayisa, ni ku kuhoxota ngu mhaka ya sionho sako.

¹⁴ Awe u na dya aniko khu na mbi khura; kambe kutxipiswa kwako ku nava mndani kwako; u na sengeletela aniko kha si na mbi huluka; se ni si u no si hulukisa, ani ni na si ningela ka ditxhari.

¹⁵ Awe u na phaya, aniko khu na mbi funyela; u na kamela miolivha, anko khu na mbi tola mafura a kona; se ni mauvha, aniko khu na mbi yi sela vhinya ya kona.

¹⁶ Nguko mi txi xayisa sileleto sa Omiri, ni yotshe mithumo ya nyumba ya Akabhi, ni nanu mi tsimbila ka milayo yawe; kasiku ani ni kumaha dirumbi, ni vahanyi vako ve va mloti; ngu kumaha keto mi na wuyisa txiruko txa vathu vangu txitimwi kwanu.