Mika 3 - Bhiblia Yo Sawuleka

Mahungu o wukela vathangeli ni vaprofeti

¹ Se ani ni to khani kambe: Engisani konkuwa anu vathangeli va Jakobe, ni nanu vakoma va nyumba ya ka Israyeli: Ina kha ti lumbi anu kuziva madingano kani?

² Kwanu mi vengako wunene mi randa wubihi, mi thavisako didhowo dawe da txitimwi, ni nyama yawe txitimwi ka marambu awe,

³ ni ku mi dyako nyama ya vathu vangu, mi va thavisa didhowo, mi va fayetela marambu, ni ku va gangela nga vo lava kubetelwa khadini, nga nyama amu dibhotani.

⁴ Sekoko, mi na dila ka Mkoma, aniko kha na mbi mi engisa, ka mbimo yoneyo a na mi sisela khohe yakwe, nguko vona va mahile mithumo yo biha.

⁵ A womba tiya Mkoma ka vaprofeti, va va timetako vathu vangu, va va lumako ngu makwasa awe va txi kha vona: Kuthutha! Se awule asi va kovetisiko txilo mkanani, va mxomela yimbi.

⁶ Ngu toneto, ku na maha wusiku kwanu, kuva ku si maneki wuprofeti, kambe ku nava ni txidema kuva ku si maneki wuhuti, evo vaprofeti di na va swela ditambo, se kwawe ditshiku di na maha da mtima.

⁷ Se vamawona kule va na wa tingana, ni vahuteteli va na phazamiswa, ina, vona votshe va na vhala sisofu sawe, nguko kha ku na mbi va ni xamulo ya Txizimu.

⁸ Kambe ngu ditshuri ani ni tate ngu mtamo wa Moya wa Mkoma, ni tate ngu mapimo amanene ni txixinya, kasi kuzivisa Jakobe wuhambunyeti wakwe, ni ka Israyeli txionho txakwe.

⁹ Engisani konkuwa tiya anu vathangeli va nyumba ya Jakobe, ni nanu vavathangeli va nyumba ya Israyeli; mi nyenyako wululamo, mi sanula totshe ti i ku madingano,

¹⁰ mi aka Siyoni ngu mnoha, ni Jerusalema ngu wubihi.

¹¹ Vathangeli vawe va wila mahungu ngu kuxawa, se vaphaxeli vawe va gondisa ngu kulava txokari, vaprofeti vawe va huta ngu kulava male; kambe va ngadi va txi khigela ka Mkoma, va txi kha vona: Ina kha ngaho Mkoma hagari kwathu kani? Kha hi na mbi telwa ngu to biha ni tatimweto.

¹² Sekoko, ngu mhaka yanu, Siyoni a na dimwa nga thembwe, Jerusalema a na maha mmumbu wa marigwi, se mmango wa nyumba yiya, wu na va makhalo o guleka a txitinga.