Mavingu 8 - Bhiblia Yo Sawuleka

Kuguletwa ka Wutxhari

¹ Ina Wutxhari kha wu dhuki wu kwangula kani? Ni kupfisisa kha kuhumisi dipswi da kona kani?

² Titshokani ko guleka, hafuhi ni nzila, mahandakanyani ka tinzila, wutxhari wa maneka.

³ Madhawani ka matimba a didhoropa, sidingeni ka didhoropa ni hamatimbani wa dhana:

⁴ Kwanu anu vathu, na kwangula; kambe dipswi dangu diya ka vanana va vathu.

⁵ Pfisisani anu vo mbi na wutxhari, ni wuzivi; ni nanu siphukuphuku pfisisani ngu mbiluni.

⁶ Engisani nguko ni na womba mapswi amanene; txisofu txangu txi na asama, kasi ku dinganisela.

⁷ Nguko txisofu txangu txi na womba ditshuri; txisofu txangu txa venga wubihi.

⁸ Ngo lulama otshe mapswi a txisofu txangu; ka ona kuwalo ni tximwetxo txo xanisa ni txo onha.

⁹ Otshe mapswi amanene ka wule a ma pfisisako; ni kululama ka vale va manako wuzivi.

¹⁰ Amukelani silayelo sangu, i si nga silivhela, ni wuzivi kupinda nzalama yo hehuka yo sawulwa.

¹¹ Nguko i txhuko wutxhari kupinda marigwi a lisima; hambi sotshe si si navetisako, kha si na kufana ni wutxhari.

¹² Ani wutxhari, ni zumba ni wuzivi, ni mana wutxhari ngu ka sileleto.

¹³ Kuthava Mkoma ngu venga wubihi; na venga kutikulisa ni mahanyelo o biha, ni nzila ya walo, ni txisofu txo ruketela.

¹⁴ Sileleto ni wutxhari wa ditshuri si huma kwangu; ani ngani mapimo, mtamo wu huma kwangu.

¹⁵ Vafumeli va fumiswa ngu ngani, ni vathangeli va ruma wululamo.

¹⁶ Vathangeli ni va nduma va fumiswa ngu ngani, ina, ni votshe valamuli va ha mafuni.

¹⁷ Ani ni randa vale va ni randako, ni vale va ni lavako ni mabimbi-kutxa, va ni mana.

¹⁸ Tithomba ni kudhundeka, si ni nani; ina, tithomba ta kwa mbi guma, ni wululamo.

¹⁹ Mihando yangu yi txhuko kupinda nzalama, ina nzalama yo sefwa; ni si si humako ngu kwangu, si txhuko kupinda silivhela yo sawulwa.

²⁰ Na tsimbitisa ngu nzila ya kululama, hagari ka tinzila ta wulamuli.

²¹ Kasi kumaha ti taku avale va ni randako, ve mana thomba ya kwa mbi guma, ve tata sisangala sawe.

²² Mkoma a ni mani makhatoni ka tinzila takwe, na asi se maha mithumo yakwe ya kale ngutu.

²³ Kukhukhela ka kaleko ani ni totilwe; kukhukhela kukhatani, na ma si se khatwa mafu.

²⁴ Ni vangilwe ku si se vaho kuhokoma; kambe na ku si se vaho sisima so tala ngu mati.

²⁵ Ani ni vangilwe ku si se mahwa mimango, kambe na ku si se mahwa simangwana.

²⁶ Mkoma asi se maha mafu ni sitinga, na asi se khata kumaha lithulu la ditiko.

²⁷ Mbimo yile ene a nga gwimba nzuma ani ni ti ti ho; mbimo yile a nga ti ti pimeletela mabambe ka kuhokoma;

²⁸ mbimo yile a nga ti ti tsanisa marefu txitimwi, mbimo yile a nga ti ti tsanisa sisima sa kuhokoma;

²⁹ mbimo yile a nga ti ti veka magwito a linene, kasi ku mati ma si pindi kuruma kwakwe; mbimo yile a nga ti ti folisela sitsaniso sa mafu,

³⁰ sekoko ani ni ti ti kumweko nayo, ni ti ti m'gondiswa wakwe; kambe ditshiku ni ditshiku ni ti ti mtsakisa, ni zilimuka masoni kwakwe yotshe mbimo,

³¹ ni zilimuka ka ditiko dakwe do zumba ka dona, se ni mana kutsaka kwangu ni vanana va vathu.

³² Kona kuwa koko, vanangu, ni engiseni, nguko va na kateka vale va no veketa tinzila tangu.

³³ Engisisani kukawukwa, mi nga ku lambeni, kambe kulaveka ku mi txhariha.

³⁴ A katekile m'thu wule a ni engisako, a zumbako e wonetela ha txikeni kwangu ditshiku ni ditshiku, e verela misasimoni ka sike sangu.

³⁵ Nguko awule a no ni mana a na mana wutomi, kambe a na mana kukatekiswa ngu Mkoma.

³⁶ Se wule a no ni onhela, a na lwisa muhefemulo wakwe apune, votshe vale va ni vengako, va randa kufa.