Mavingu 6 - Bhiblia Yo Sawuleka

Simwani sileleto

¹ Mwanangu, ngako u di ti emisete kudiha mnandu wa mwakelani, ni kuva u di vhuni mmwani m'thu,

² u tandeka ka mapswi a txisofu txako, tile u nga thembisa ngu mapswi a txisofu txako.

³ Maha tiya koko awe mwanangu, ti txhatxhise nguko, se u wite manzani ka mwakelani wako: Tsula u ya ti namisa, u khongotela mwakelani wako;

⁴ u nga ninge wukohe maso ako, hambi kupfhumisa timboni tako;

⁵ ti txhatxhise, kufana ni mhoti manzani ka mxoti, ni ku nga txinyana manzani ka mriyeli.

⁶ Tsula u ya wonana ni titshokoti, awe mkara; wona tinzila ta tona, u na txhariha.

⁷ Eto ti singako ni wa hombe, hambi mthangeli, mwendo mfumeli.

⁸ Lulamisela sakudya sako ngu mbimo ya kuhisa; ngu kuverela mbimo ya pheho.

⁹ Mkarawe, u na otela kala yihi mbimo kani? U na wuka ngu mbimo muni, ngu wukoheni kwako kani?

¹⁰ Na nga khudhahela ka kudotho, ni otela ka kudotho, ni khutarelanyana mawoko, ni otela,

¹¹ ngu kumaha keto, wu nata kwako wusiwana kufana ni dikhamba, ni kuvilela kwako ku nga m'thu a nga xoma.

¹² M'thu wa wubihi, m'thu wo tolovela kumaha to biha, txisofu txakwe txi tsimbila ngu kuonhetela.

¹³ A valutela ngu maso, e womba-womba ngu mikondo, ni kumaha sikombiso ngu titiho.

¹⁴ Kuonha kuho mbiluni kwakwe; yotshe mbimo a pimisela wubihi; e tsimbila e phaya mazunga.

¹⁵ Ngu kumaha keto, kukhundumuswa kwakwe ku nata ngu txidhukisa; a na funyeletelwa ngu txikavikavi, ku si maneki ni kukalamuka.

¹⁶ Mtxhanu ni tximwetxo si Mkoma asi vengako, ni txa wutxhanu ni simbidi moya wakwe wu txi nyenyako:

¹⁷ Maso o ti guleta, lidimi la makuhu, manza o theketa mnoha wo mbi na mnandu,

¹⁸ mbilu yo luka mipimiso ya wubihi, ni mikondo yo tutumela to biha,

¹⁹ wufakazi wa walo wo womba-womba makuhu, ni wule a phayako mazunga ka vanawe.

Tiphango ta wugango

²⁰ Mwanangu, vekisa txirumo txa tate wako, kambe u nga leke mlayo wa mwamwako.

²¹ Si sungelele mbiluni kwako kala kupinduka, si hayeke thamoni kwako.

²² Mbimo yi u no tsimbila, txi na kutsimbitisa; aha u no otela, txi na kuxayisa; u txi wuka txi na womba-womba ni nawe.

²³ Nguko txirumo ndilambu, se mlayo liwoningo, kambe kukawuka ko lulamisa i nzila ya wutomi,

²⁴ kasi ku kuvhikela ka wamsikati wa wubihi, ni ka kutshambisela ka lidimi la walo.

²⁵ Ngu mbiluni kwako u nga navele kutshura kwakwe, hambi ku ku ndindetela ngu maso akwe.

²⁶ Nguko wamsikati wa wugango, wa hoka ku kukombela hambi dipawu da didotho; kambe digelegele, di tsimbila di lava wutomi wa wunene.

²⁷ Ina m'thu a nga veka mndilo hammidi kwakwe, syambalo sakwe si sihyi kani?

²⁸ Niku mwendo wokari a nga tsimbila txitimwi ka makala a mndilo, asi mani ni kuhya mikondo yakwe kani?

²⁹ Ti na nga toneto ka wule a wulelako ka msikati wa mwakelani wakwe; ni wihi wule a no m'gwesa kha na mbi pwata mnandu.

³⁰ Dikhamba do pa ngu kulava kukhurisa muhefemulo wa dona kha di ruketelwi, ngu pfa nzala;

³¹ aniko di txi manwa, di na diha ngu kupinda mtxhanu wa makhati ni mambidi; di na ningela yotshe thomba ya m'tini ka dona.

³² Awule a mahako wugango ni wamsikati, wa kelelelwa ngu mapimo; awule a mahako to nga eto, wa haxula muhefemulo wakwe.

³³ A na mana kutsayiswa ni kuwa tingana, kambe wubihi wakwe kha wu na mbi dhuka wu pfhiteka.

³⁴ Nguko txiluse txa mwamna wakwe txi na m'henyisa; kambe ditshiku da kuphota kwakwe, kha na mbi m'divalela.

³⁵ Kha na mbi amukela txo kombela ngu txona divalelo, hambi ku txi tumela, hambi u txo engetela so mxava ngu sona.