Mavingu 31 - Bhiblia Yo Sawuleka

Sileleto ka mfumeli

¹ Mapswi a mfumeli Lemuweli, i ku txiprofeto txi a nga gelwa ngu mwamwakwe.

² Kutxani kani mwanangu kani? Se kutxani kani mwananawe wa mndani kwangu kani? Se kutxani awe mwanangu, wa sithembiso sangu kani?

³ U nga ningele mtamo wako ka vavasikati, hambi tinzila tako ka wule a khundumusako vafumeli.

⁴ Hi nga tona ka vafumeli, awe Lemuweli, hi nga tona ka vafumeli kusela vhinya, hambi ka madhota kunavela so sela sa mtamo.

⁵ Ku mahela ti to va si seli, se ve divala milayo, ni kuonhetela wululamo wa votshe vale va xanisekako.

⁶ Ningani so sela ka vale va lovako, ni vhinya ka vale va si tsakiko dihikani kwawe;

⁷ kasiku ve sela, ve divala wusiwana, kambe va si alakanyi ni kuya kuthumani.

⁸ Tula txisofu u womba-womba ka dotshe ditiko, ngu madingano a votshe vale va ti wonako va ti xasetwe.

⁹ Tula txisofu txako, lamula ngu kululama, u lamulela sisiwana ni vale va pwatako somaha.

Alefe

¹⁰ I mani a nga sikotako kumana msikati wamnene kani? Mtengo wakwe wa pinda ngutu wa marigwi a lisima.

Bheta

¹¹ Mbilu ya mwamna wakwe yi themba kwakwe, kambe msikati kha na mbi pwata txo maha.

Gimeli

¹² A maha ta tinene ka mwamna wakwe, na i si nga to biha masiku otshe a kuahanya kwakwe.

Dhalete

¹³ A lavetetela matoya ni masedha, kambe e ti thumela kha kwati ngu manza akwe.

He

¹⁴ A ya tshunza sakudya kule, ngu txitimela txa matini.

Vhawu

¹⁵ A wuka i di ngadi wusiku, e dyisa mwaya wakwe, ni ku abanisela mithumo ka sithumi sakwe sa txisikati.

Zayini

¹⁶ Wa wonisisa thomba e yi xava; e phaya mindonga ya mihando ngu manza akwe.

Hete

¹⁷ Wa sunga txiwunu txakwe txi tsana, kambe a ni mtamo mawokoni kwakwe.

Tete

¹⁸ Siya sakwe wa si xolisisa e si wona taku nzinene; kambe dilambu dakwe kha di timeki ni wusiku.

Jodhe

¹⁹ Wa ñola ndonga e luka simaha ngu manza akwe, kambe ona manza akwe ma ñola ndonga yo hora ngu yona.

Kafe

²⁰ Manza akwe ma vhuna wule a xanisekako; e tula kambe manza ka wule a pwatako somaha.

Lamedhi

²¹ Kha nga ni dizowa ni hunguva, nguko yotshe nyumba yakwe ngu mndani yi bhiyetwe ngu simaha so tshanzuketelwa.

Meme

²² Wa ti vekela so ateta hahatshi; a ambala sa masedha o hehuka, ni sa txiwunguwungu.

Nune

²³ Mwamna wakwe a zivaneka a di ngadi ha txikeni, mbimo yile a khalahatshako ha lirendoni ka madhota a mafu.

Sameki

²⁴ Wa luka simaha sa disedha do hehuka e si xavisa, ni kuninga tibhande ka vale va xavako.

Ayini

²⁵ Syambalo sakwe ngu mtamo ni wudhundo, kambe wa verela ta tinene mangwana wa ditshiku.

Pe

²⁶ Txisofu txakwe a txi tula ngu wutxhari, kambe a emela mlayo wa kuhumelela, ngu mapswi a lidimi lakwe.

Tsadhe

²⁷ A xayisa mwaya wakwe ngu nzila ya yinene, khadyi sakudya sa wukara.

Kofe

²⁸ Vanana vakwe va womba-womba ngu wunene wakwe; mwamna wakwe nene wa mdhunda, a txi khene:

Rexe

²⁹ Mahorana amangi ma vile ni mamahelo amanene, aniko awe wa va pinda ngutu votshe.

Ximi

³⁰ Kutshura ka kanganyisa, kambe kona kutshura ngutu mbukanganyisi, aniko msikati wule a thavako Mkoma, eyo a na dhundwa.

Tawu

³¹ Mningeni mihando ya manza akwe, kambe mithumo yakwe yi na m'dhunde txikenini.