Mavingu 29 - Bhiblia Yo Sawuleka

¹ M'thu wule a ku a txi kawukwa ko tala e ti bangisa msungo, a na phatulwa ngu txikuluveta, asi kalamuki.

² Mbimo yile va kulako vale vo lulama, vathu va tsaka, se i ti muonhi a tongako, ditiko da xomuleka.

³ M'thu wule a randako wutxhari, a tsakisa tate wakwe, kambe mngana wa magelegele, wa xakela thomba.

⁴ Mfumeli wo lulama wa tsanisa ditiko dakwe, aniko awule i ku mngana wo xavwa, wa di hoxota.

⁵ M'thu wu a xengetelako mwakelani wakwe, o mriyela milawu mikondoni kwakwe.

⁶ Ku ni mlawu masoni ka m'thu wu i ku m'hambunyeti, aniko awule wo lulama, o embelela e ti tsakela ngutu.

⁷ M'thu wo lulama wa ziva kuxaniseka ka sisiwana, kambe muonhi kha nga ni mhaka nito.

⁸ Vatseketseli va turisa mndilo wa pfilu-pfilu didhoropani, kambe avale vo txhariha, va releta kuhenya.

⁹ M'thu wo txhariha a txi phikizanako ni txiphukuphuku, mwendo wa henya mwendo wa seka, kha na mbi mana kuhumula.

¹⁰ Sidayi si ni livengo ka m'thu wo lulama, kambe vale vo lulama va ti lavela wunene wawe.

¹¹ Txiphukuphuku txa hangalasa kuhenya ka txona kotshe, aniko txhari ya sisa, ni ku ti layetela.

¹² Mthangeli wule a engiselako timhaka ta makuhu, a na pimisa taku sotshe sithumi sakwe mbaonhi.

¹³ Txisiwana ni mxanisi wa txona va manana, se maso awe votshe vavambidi, ma woningetwa ngu Mkoma.

¹⁴ Mfumeli wu a lamulako sisiwana madingano ni ditshuri, a na tsanisa wukoma wakwe yotshe mbimo.

¹⁵ Limhika ni kukawuka sa ninga wutxhari, kambe mfana wo ti mahela takwe ekha, a wisa tingana mwamwakwe.

¹⁶ Mbimo yile vaonhi va engetelanako, kuhambunyeta ni kona ka engetelana, aniko avale vo lulama, va na wona kuwa ka vaonhi.

¹⁷ Laya mwanana wako, a na kuninga kuhumula, se a na tsakisa dihika dako.

¹⁸ Aha ku pwatekako ditshuri, vathu mbanyammahe dwe; kambe awule a vekisako mlayo, eyo a katekile.

¹⁹ Txithumi kha txi na mbi laywa ngu mapswi, nguko hambi i ti txo engisa kha txi na mbi pfisisa.

²⁰ U ti nga mmona m'thu wa magwava amu ka mapswi akwe kani? Txiphukuphuku txa thembeka kupinda ene.

²¹ Awule a fuyako txithumi txakwe ngu ku txi hena kukhukhela wananani ka txona, msana keto, txona txi na lava ku ti maha mwanana wakwe.

²² M'thu wa txihenyisani, wa wusa mazunga; se awule wa txiviti wa engetela sihambunyeto.

²³ Kutikulisa ka m'thu ku na m'dayisisa, kambe awule a ku ni moya wo ti veka hahatshi, a na mana kudhundeka.

²⁴ Awule a ku ni thomba yimweyo ni dikhamba, wa venga dihika dakwe apune; wa engisa ta walo, aniko kha wombi txilo.

²⁵ Dijowa da m'thu di na riya milawu, kambe awule a thembako ka Mkoma, a na vekwa ka wukhalo wo guleka.

²⁶ Vathu vavangi va lava khohe ya mthangeli, aniko kululama ka mmweyo ni mmweyo kuta ngu ka Mkoma.

²⁷ Muonhi njinyenyeko ka wule wo lulama, se nene wule wa tinzila ta tinene njinyenyeko ka muonhi.