Mavingu 24 - Bhiblia Yo Sawuleka

-19-

¹ U nga bavele vathu vo biha, hambi ku navele kuve navo,

² nguko timbilu tawe ti alakanyela wubihi, ni sisofu sawe si womba-womba kubiha.

-20-

³ Nyumba yi akwa ngu wutxhari, kambe yi tsaniswa ngu mapimo amanene;

⁴ se ngu mhaka ya wuzivi, tinyumba ti na tala ngu siya sa lisima, so tshura ngutu.

-21-

⁵ Wamwamna wo txhariha a tsani ngutu, kambe wamwamna wo ziva a ni mtamo ngutu.

⁶ Nguko ngu sileleto sa wutxhari wa sikota kulwa yimbi; kutala ka sileleto ka ninga kuxula.

-22-

⁷ Wutxhari wu txitimwi ngutu, kha wu manelwi ngu txiphukuphuku; txi tandeka ni kutula txisofu banzani.

-23-

⁸ Awule a ti ningetetelako kumaha to biha, va na m'dhana ku kha vona mkhulumeteli.

⁹ Mapimo a txiphukuphuku nja kuonho dwe, kambe mtseketseli njinyenyeko ka vathu.

-24-

¹⁰ U txi ti wona u txi relela ngu ditshiku da xomulo, tikomba ku khwa tsana.

-25-

¹¹ Hulukisa vale va ndindelwako dawani, ngako u txi sikota ku va thavisa.

¹² Ngako u txi khawe: Kha hi ti zivi; ina awule a xolako timbilu, kha na mbi ti tumbula kani?

-26-

¹³ Dyana wulombe mwanangu, nguko mbunene, ni txihesa txa wulombe, txa lombela mkanani kwako.

¹⁴ Wu na nga toneto wuziva wa wutxhari dihikani kwako; ngako u txi wu mana, ku nava ni hakhelo kwako, kambe khu na mbi komiselwa kuverela kwako.

-27-

¹⁵ Awe m'bihi, u nga baramele m'ti wa m'thu wo lulama, hambi kuhanda nyumbani kwakwe.

¹⁶ Nguko awule wo lulama hambi a txi wa mtxhanu ni kumbidi, ngu magwito a na wuka; aniko vabihi va na ti gumula kubihani.

-28-

¹⁷ Ngako a txi wa mlala wako, u nga tsake, hambi a txi ti gumula, yi nga tsake ngutu mbilu yako;

¹⁸ kasiku Mkoma asi ti woni eto, e maneka a ti bihile masoni kwako, se e vayilelisa kuhenya kwakwe masoni ka m'thu wule.

-29-

¹⁹ U nga ti xanise ngu mhaka ya vamahi va kubiha, hambi kubavela vaonhi.

²⁰ Nguko m'bihi kha na mbi va ni hakhelo ni ya yimweyo, kambe dilambu da vo biha di na timeka.

-30-

²¹ Mwanangu, thava Mkoma, ni mfumeli, kambe u nga ti wulete ka vale va lavako kuwusa kulwa.

²² Nguko valala, kha va na mbi swela kumwalala, hambi dirumbi dawe, i mani a no swa e di ziva kani?

Mamwani mavingu a titxhari

²³ Aawa ni ona, ngu ona mavingu titxhari. Hi nga ta tinene kulamula ngu kuwona khohe.

²⁴ Awule a wombako ka muonhi, a txi khene: U lulamile, vathu va na mruka, a na nyenywa ngu matiko.

²⁵ Aniko avale va no mkawuka, va na tsaka, se txitimwi kwawe ku nava ni kukateka ka hombe.

²⁶ Mpswopswa ngu txisofu, awule a xamulako mapswi amanene.

²⁷ Tshurisela mithumo yako hahanze, u yi hetisela thembweni, sekoko aka nyumba yako.

²⁸ U nga fakaze ta kwa mbi tiziva, u wukela mwakelani wako; nguko u na mkanganyisela txani ngu txisofu txako kani?

²⁹ U nge khawe: Nga tonti a nga ni mahela, nani ni na mmahelisa toneto; mmweyo ni mmweyo ni na mtshumetela madingano ni mithumo yakwe.

³⁰ Ni pindile ngu thembweni ka mkara, kumweko ni mivhinyani ka m'thu wo pwata mapimo;

³¹ wona taku yotshe thembwe yi ti ti tate ngu mipa, yi ti tshuletwe ngu mimwasi, madhawani ku ti wite diguma da marigwi.

³² Mbimo yile ni nga ti wona tile, ni to khani; se ni to wonisisa ni gonda to kari.

³³ Wukohyana wa wudotho, kuotelanyana, u petanyana mawoko mbimoanyana, ku va u maneka u di otete.

³⁴ Wusiwana wu nata txitimwi kwako, kufana ni dikhamba, ni kupwata kwako, kufana ni wamwamna wu a nga xoma.