Mavingu 23 - Bhiblia Yo Sawuleka

-6-

¹ Mbimo yile u khalahatshako udya kumweko ni mfumeli, wonisisa kha kwati sile si ku masoni kwako;

² Dyana kha kwati, u nga ti mahe wa makolo.

³ U nga navele sakudya sakwe so tshamba ngutu, nguko dipawu da wukanganyisi.

-7-

⁴ U nga ti karatele kuva nyatithombe; ninga wukhalo wo khata wutxhari wako.

⁵ Ina u nga dhuka u ronokela sa kuva i si nga sa txilo kani? Nguko eso si na ti mahela tibhapi si purumela nzumani kufana ni digama.

-8-

⁶ U ngadye sakudya sa wule a ku ni maso a wutona, hambi kunavela sakudya sakwe so tshamba ngutu.

⁷ Nguko a ti a nga ti alakanya, ti mbiluni kwakwe; ene a na kugela ku khene: Dyana kha kwati u sela; na kuve mbilu yakwe kha yi nga ni nawe.

⁸ U na kosa sakudyanyana sile u nga dya, ni kuluzekelwa ngu mapswi ako o bonga.

-9-

⁹ U nga womba-wombe tinzeveni ka txiphukuphuku, nguko txi na txhipisa mapswi ako a wutxhari.

-10-

¹⁰ U nga thavise mihingano ya kale kambe u nga wulelele tithomba ta vo felwa ngu vaveleki,

¹¹ nguko Mtiruli wawe mbwa mtamo; ene a na va emela, se awe e kuwukela.

-11-

¹² Ningetetela mbilu yako kulaywani, ni tinzeve tako ka mapswi a wuzivi.

-12-

¹³ U nga leke kulaya mwanana, nguko u txi mkwapa ngu limhika, kha na mbi fa ngutu.

¹⁴ Awe u na mkwapa ngu limhika, u hulukisa dihika dakwe kuya kufani.

-13-

¹⁵ Mwanangu, ngako mbilu yako yi di txharihile, yangu mbilu koko yi na tsaka, ina, mbilu yangu yipune.

¹⁶ Yi na tsaka ngutu mbilu yangu, mbimo yile txisofu txako txi no womba mapswi a ditshuri.

-14-

¹⁷ Mbilu yako yi nga bavele vaonhi; kukhata ninga txithavo ka Mkoma, otshe masiku.

¹⁸ Nguko u na va ni magwito amanene; themba yako kha yi na mbi lova.

-15-

¹⁹ Engisa, awe mwanangu, txhariha, mbilu yako yi na tsimbile ngu nzila ya yinene.

²⁰ U nga maneke hagari ka vaseli va vhinya, hambi hagari ka vathu va txinyamanyama.

²¹ Nguko didevi ni m'thu wa lidyo, va na wa wusiwanani; kambe wukohe wu na va ambeka wusakato.

-16-

²² Engisa tate wako wule a nga kuveleka, kambe u nga txhipise mwamwako mbimo yile a no kumba.

²³ Xava wunene, aniko u nga wu xavise; ina, wutxhari, gondo, ni kupimisisa.

²⁴ Tate wa m'thu wo lulama a na tsaka ngutu, ni wule a velekako txhari, a na yi tsakela.

²⁵ Va na tsake tate wako ni mwamwako, kambe a na tsake ngutu wule a nga kuveleka.

-17-

²⁶ Mwanangu, nihe mbilu yako, kambe maso ako ma na wonisise tinzila tangu.

²⁷ Nguko wamsikati wa digelegele diphala do hokoma, kambe njisima txo songa, ka mmwani m'thu.

²⁸ Kambe ene, a fana ni dikhokhokho, mbwo zumba ni kusolelela, e andisa vaonhi hagari ka vathu.

-18-

²⁹ I mani a ku ni dikhombo kani? I mani a ku xomuloni kani? I mani a ku ni mazunga kani? I mani a ti tsetsako kani? I mani a ku ni silonda hahanze ka mnandu kani? I mani wa maso o bhilivila kani?

³⁰ Ngu vale va zumbako kuselani ka vhinya, vale va tsimbilako ve lava wusuke wo patelwa.

³¹ U nga yi wone walo vhinya, kule yi wonekisako kubhilivila, mbimo yile yi pupumako mu ka dijingo yi thekelela kha kwati.

³² Ngu magwito ka kona yi na luma kufana ni mnyoka, yi gwaya kufana ni mamba.

³³ Maso ako ma na wonetela vavasikati vavane, se mbilu yako yi na womba-womba wubihi.

³⁴ U na nga m'thu wo otela hagari ka linene, hambi ku nga wule a nga otela tshokani ka phande

³⁵ se u na khawe: Va ni balisete, aniko kha na kupfa kupanda; va ni pekile, kambe ni ya tipfa; ni na wuka yihi mbimo kani? Ni na tsula niya yi lava kambe.