Mavingu 21 - Bhiblia Yo Sawuleka

¹ Mbilu ya mfumeli manzani ka Mkoma, yi fana ni txinambwana txa mati; yi maha totshe ti ene a ti lavako.

² Yotshe nzila yi lulamile masoni ka m'thu, aniko Mkoma a wona timbiluni.

³ Ta tumeleka ngutu ka Mkoma kumaha kulumula, ni kulamula ngu kululama, kupinda ku mninga mphaxo.

⁴ Kuwona ko tikulisa, ni mbilu yo ti guleta, njionho txa wo biha.

⁵ Mapimo ya wule a mahako ta tinene ma humelelisa, aniko a votshe vale vo kuluvetela, mbusiwana dwe.

⁶ Kuthumela kusengela thomba ngu lidimi la makuhu, mbukanganyisi, se avale va wekelelako keto va ti xotela lifo.

⁷ Wulala wa vabihi wu gwita ngu ku va lovisa, nguko vona va lamba kumaha kululama.

⁸ Nzila ya m'thu wo biha njo xanisa ngutu, kambe mithumo ya wo sawuleka njinene.

⁹ I txhuko kuzumba likasani ko tutelwa, kupinda kuzumba hagari ka nyumba ni msikati wo karata.

¹⁰ Dihika da wo biha, di alakanyela kubiha; muakelani wakwe ka tsakisi masoni kwakwe.

¹¹ Mbimo yile mtseketseli a tsayiswako, awule wo divala o maha wo txhari; se mbimo yile a gondiswako wule wo txhariha, a amukela wuzivi.

¹² Ngu wuzivi wakwe wule wo lulama, wa khatalela nyumba ya wo biha, mbimo yile vabihi va ndindwako ve yiswa kubihani.

¹³ Awule a tsivako nzeve yakwe ka huwa ya txisiwana, nene a na dila kambe kha na mbi engiswa.

¹⁴ Txiningo txa txihunjani, txa hungula kuhenya, ni hakhelo ya ha kusisalani, ya boxisa kuhenya ka hombe.

¹⁵ Kumaha kululama litsako ka wo lulama, aniko njixamaliso ka vale va maha wubihi.

¹⁶ M'thu wule a lekako nzila ya wuzivi, a na maneka a di mtaloni ka vafi.

¹⁷ Awule a randako ku ti tsakisa a na mana kukelelelwa; awule a randako vhinya ni mafura, kha na mbi dhuka e va ni thomba.

¹⁸ M'thu wo lulama a tekiswa ngu wo biha, ni wa kululama a na tekiswa ngu muonhi.

¹⁹ I txhuko kuzumba ka mafu a txiwula, kupinda wamsikati wo karata, wa mazunga.

²⁰ Thomba ya yinene ni mafura siho nyumbani ka txhari, aniko wamwamna wo mbi pfisisa wa yi hangalasa.

²¹ Wule a londetako kululama ni wunene, a na mana wutomi, kululama ni kudhundeka.

²² Txhari ya kwela didhoropani ka vanyamitamo, yi haxula mtamo wule va thembako wona.

²³ Awule a xayisako txisofu txakwe ni lidimi lakwe, wa vhikela dihika dakwe ka sikarato.

²⁴ M'thu wa matshanza ni kutikulisa, ditina dakwe ku mnyenyi, wule a mahako totshe ngu kuhenya ni kutikukumukisa.

²⁵ Maalakanyo a mkara ma m'daya, nguko manza akwe ma lamba kuthuma.

²⁶ A heta dotshe ditshiku a txi navela, aniko mlulami wa ninga, kha toni.

²⁷ Mphaxo wa muonhi njinyenyeko; ngutu-ngutu wu txi ningelwa ngu kulava to biha.

²⁸ Fakazi ya makuhu yi na lova, aniko m'thu wule a engisako, a womba-womba ngu kutsana.

²⁹ M'thu wu i ku muonhi, wa thuvikisa khohe yakwe, kambe awule wo lulama wa tsana nzilani kwakwe.

³⁰ Kha ku nga ni wutxhari, hambi kupfisisa, ni sileleto, kasi kuwukela Mkoma.

³¹ Dihantxhi di lulamiselwa ditshiku da yimbi, aniko kuxula kuta ngu ka Mkoma.