Mavingu 20 - Bhiblia Yo Sawuleka

¹ Vhinya mtseketseli, ni wusuke wu vangisa diguwa; ni wihi wule a ti ningetetelako ka wona, kha na mbi maha wo txhariha.

² Kuthisa ka mfumeli kufana ni kubhonga ka ngonyamo; awule a mwuselako kuhenya, o lwisa muhefemulo wakwe apune.

³ Wa dhundeka m'thu wule a vayilelako mazunga.

⁴ Mkara kha dima ngu mbimo ya wuxika, ngu kumaha keto, ngu mbimo yo funyela a na kombela, aniko kha na mbi amukela txilo.

⁵ Silayelo mbiluni ka m'thu, si fana ni mati o mita; kambe m'thu wa mapimo, a na ma kota kuretha.

⁶ Hagari ka vathu mmweyo ni mmweyo a pfalisa wunene wakwe; kambe i mani a nga mmanako m'thu wo thembeka kani?

⁷ M'thu wo lulama a tsimbila ditshurini kwakwe; va na kateka vanana vakwe vale va mu engisako.

⁸ Mfumeli a txi khalahatsha txituluni ka wulamuli, wa kuluveta kuwona mnandu ha wu ku kona.

⁹ Ina aho waku a nga khene: Ni basisile mbilu yangu, ni kuwutwe sionho sangu!

¹⁰ Tipimo timbidi to hambana, ni mipimo yimbidi yo hambana, nzinyenyeko ka Mkoma, tximwetxo ni tximwetxo ka sona.

¹¹ Hambi mwanana a zivaneka ngu mithumo yakwe, ngako mithumo yakwe i ti ya yinene ni kululama.

¹² Nzeve yi yi engisako, ni diso di di wonako, ngu wumbidi wa sona si mahilwe ngu Mkoma.

¹³ U nga rande wukohe, kasi ku u si ti wuleti wusiwanani; tula maso ako, u na so khura ngu dipawu.

¹⁴ Kha si vhuni txilo, kha si vhuni txilo, kuwomba mxavi, aniko a txi khukha a na ti guleta.

¹⁵ Ku ni nzalama ni marigwi amangi a lisima; kambe lisima la hombe li ka txisofu txa wuzivi.

¹⁶ Awule a tumelako kudiha mnandu wa m'thu wo mbi m'ziva, a na thavise syambalo sakwe.

¹⁷ Dipawu da wukanganyisi da mtshambela m'thu, aniko msana keto, mkanani kwakwe ku na tala ngu sibwinzyana sa mafu.

¹⁸ Otshe makungo ma tsaniswa ngu wusungukati; kambe yimbi yi tsimbitiswa ngu wusungukati wa wutxhari.

¹⁹ M'thu wo tolovela malengo, wa humisa txihunja; ngu toneto, u nga ti patanise ni m'thu wo lalata.

²⁰ Awule a rukako tate wakwe mwendo mwamwakwe, a na timekelwa ngu dilambu dakwe, se a na zumba ka txidema txa hombe.

²¹ Thomba yo yi mana ngu txikuluveta kukhatani, magwito a kona kha ma nga ni kukateka.

²² U nga wombe ku khawe: Ni na tshumetela wubihi; themba ka Mkoma, se ene a na kuhulukisa.

²³ Tipimo timbidi to hambana njinyenyeko ka Mkoma, ni sikalo so kanganyisa hi nga sa sinene.

²⁴ Mazambo a m'thu ma tsimbitiswa ngu Mkoma; sekoko m'thu a nga yi zivisa kutxani nzila yakwe apune kani?

²⁵ Mlawu ku kuluvetela kuwomba u txi khawe: Ti sawulekile; ni kutshumela u kana-kana msana ka kuxambanya.

²⁶ Mfumeli wo txhariha wa wona wu a ku ni mnandu, e mtshinda ngu dirigwi do tsana.

²⁷ Dihika da m'thu, dilambu da Mkoma kwakwe, adile di wonako kotshe mndani ka m'thu.

²⁸ Wunene ni ditshuri ngu sona si xayisako mfumeli, se wukoma wakwe wu tsaniswa ngu wunene.

²⁹ Kutshura ka majaha ku mtamoni ka ona; se wudhundo wa sikosana ngu wunvi wa sona.

³⁰ Mikhwimbiriti ya silonda yi sawulekisa vo biha, kumweko ni kupandisa kule ku wulelako mndani.