Mavingu 18 - Bhiblia Yo Sawuleka

¹ Awule a ti vekako kule a xota maalakanyo akwe ekha; ene a lwisa wutxhari wa ditshuri.

² Txiphukuphuku kha txi txakiswi ngu mipimiso ya yinene, hahanze ka kuhumisa ti ti ku mbiluni ka txona.

³ A txi ta muonhi, ata ni kutxhipisa; txiruko txita ngu mu ka tingana.

⁴ Mapswi a mkanani ka m'thu, mati o mita, txisima txa wutxhari txi fanana ni txinambwana txo tala ngu mati me thekelela.

⁵ Hi nga tinene kuemela m'bihi, ku txi wiswa wo lulama kulamulwani.

⁶ Txiphukuphuku txi wuletwa mazungani ngu mapswi a txona, txisofu txa txona txa txi wuleta kutsayiswani.

⁷ Txiphukuphuku txi fuviswa ngu txisofu txa txona txi pune, se txisofu txa txona, mlawu ka muhefemulo wa txona.

⁸ Mapswi a m'thu wa txibwebwe ma nga sakudya so lombela, si wulelako mndani ka mrumbu.

⁹ Nene wule a thumisako kuonhetela, mmweyo ni mxakeli.

¹⁰ Ditina da Mkoma dinera do tsana, mlulami a na tutumela ka dona, eya ti khongelela a di txitimwi.

¹¹ Didhoropa do tsana da m'thu ngu thomba yakwe, yi fana ni diguma do guleka mu ka mapimo akwe.

¹² Mbilu ya m'thu ya ti guleta na ku si se hoka kufuviswa kwakwe; ku khata ti veke hahatshi, se kudhundeka ku nata.

¹³ Kuxamula u si se pfisisa, mbuphukuphuku ni tingana.

¹⁴ Kutsaka ka mbilu ya m'thu, ku na kalamukisa malwati akwe, aniko i mani a nga wusako mbilu yo pandiseka kani?

¹⁵ Mbilu ya txhari ya mana wuzivi, se nzeve ya titxhari ya mana wuzivi.

¹⁶ Txiningo txa m'thu txa mtulela nzila, ni ku mtshuketisa hafuhi ka vahombe.

¹⁷ Awule a khatisako kuangula, a nga a maneka ditshurini; aniko a txita mmwani e ta mkaneta.

¹⁸ Xolo ya malata kukanetisana, yi abanisa vathu va mitamo.

¹⁹ Ta karata kuboxisa mwananu a di henyisilwe, kupinda kuxula didhoropa do tsana; ni mazunga ma fana ni matimba a tisimbi nyumbani ka wukoma.

²⁰ Mrumbu wa m'thu ni m'thu wu na khuriswa ngu mapswi a txisofu txakwe; a na khuriswa ngu si si humako txisofuni kwakwe.

²¹ Kufa ni kuhanya si mtamoni ka lidimi; se awule a li dhundako a na dya mihando ya lona.

²² Awule a manako msikati a mana txilo txatxinene, kambe a mani kukatekiswa ngu Mkoma.

²³ Txisiwana txi womba-womba ngu kukhongotela, aniko nyatithombe a womba-womba ngu kunemetisela.

²⁴ M'thu wu a ku ni vangana vavangi a nga ti tsakisa, kambe ku ni mngana wo thembeka ngutu kupinda mwanawe.