Mavingu 13 - Bhiblia Yo Sawuleka

¹ Mwanana wo txhariha wa engisa kulaya ka tate wakwe, aniko mtseketseli kha engisi kukawukwa.

² Mmweyo ni mmweyo ngu mihando ya txisofu txakwe, a na dya wunene, aniko moya wa vakanganyisi wu na dya timboyinga.

³ Awule a veketako txisofu txakwe, a xayisa moya wakwe, aniko m'thu wa siwombawomba wa ti xanisa.

⁴ Zumbelo ya mkara ngu kunavela, aniko kha gwitisi kumana txilo, kambe moya wa vale va ti thumelako wa tsaka.

⁵ M'thu wo lulama wa venga mapswi a makuhu, aniko muonhi wa nyenyeka, kambe wa ti kanganyisa.

⁶ Wululamo wa xayisa m'thu wamnene nzilani kwakwe, aniko wubihi wu na wisa muonhi.

⁷ Ku ni wule a ti mahako nyatithombe, na asi nga ni txilo ni txa tximwetxo, ni wule a ti mahako txisiwana, na a di ni thomba yayingi.

⁸ Kuwuyelwa ka m'thu ni m'thu ngu tithomba takwe, aniko txisiwana kha txi pfi kudhukiselwa.

⁹ Liwoningo la vo lulama la tsakisa, aniko dilambu da vaonhi di na timeka.

¹⁰ Kutikulisa kutisa mazunga, aniko wutxhari wu manwa ka vale va ningako milayo.

¹¹ Thomba yo manwa ngu wukanganyisi yi na boxa, aniko awule a yi manako ngu kuthuma, a na engetelwa.

¹² Kuverela ko swela ka karalisa mbilu, aniko kuhoka ka tile ti navelwako, mndonga wa wutomi.

¹³ Awule a nyenyako silayelo a na lova, aniko awule a thavako mlayo, a na wuyelwa.

¹⁴ Gondo ya txhari, njisima txa wutomi, txo vayilelisa m'thu ka milawu ya lifo.

¹⁵ Mapimiselo amanene ma tsakisa, aniko nzila ya vakanganyisi ya lovisa.

¹⁶ Votshe vale vo txhariha va tsimbila ngu wuzivi, aniko txiphukuphuku txi hangalasa wuphukuphuku wa txona.

¹⁷ Txirumwa txo biha txi wela kubihani, aniko txirumwa txo thembeka ngu hanya.

¹⁸ Wusiwana ni tingana si nata ka wule a nyenyako kulaywa, aniko awule a veketako kukawukwa, a na dhundwa.

¹⁹ Kunavela kule kutatisekako ka tsakisa moya, aniko kuhambana ni wubihi njinyenyeko ka siphukuphuku.

²⁰ Hanya ni titxhari u na txhariha, aniko mngana wa siphukuphuku a na xaniswa.

²¹ Wubihi wu na londisela vaonhi, aniko vo lulama va na wuyelwa ngu wunene.

²² M'thu wa wunene, a siyela thomba vanana va vanana vakwe, aniko thomba ya muonhi yi ningelwa ka wo lulama.

²³ Thembweni ka txisiwana ka pfuna sakudya, aniko vaho vokari va xanisekako ngu kupwata mapimo.

²⁴ Awule a vekako limhika lakwe a venga mwanana wakwe, aniko awule a mrandako, wa mtsayisa ngu mbimo ya kona.

²⁵ M'thu wo lulama wa dya kala kuza moya wakwe wu tsaka, aniko mndani ka wo biha ku na otela ni nzala.