Mavingu 1 - Bhiblia Yo Sawuleka

Lisima la Mavingu

¹ Mavingu a Solomoni, mwana Dhavhidha, mfumeli wa Israyeli.

² Kasi ku na ziva ngu ona wutxhari ni gondo; kasi ku na pfisisa mapswi o pimeka;

³ kasi kuamukela gondo ya wutxhari, wululamo, kulamula, ni kudinganisa;

⁴ kasi kuninga wutxhari ka vale vo kelelelwa ngu mapimo, ni kuninga vale vavaphya maalakanyo amanene;

⁵ kasi ku txhari yi engisa, ni kukula mu ka wutxhari, ni ku awule a gondiswako e mana sileleto sa wutxhari;

⁶ kasi kupima mavingu ni ku ma txhamusela ka kona, kumweko ni mapswi a titxhari, ni kuhutetela ka kona.

⁷ Kuthava Mkoma, ngona makhato a wuzivi; siphukuphuku sa txhipisa wutxhari ni gondo.

Sileleto ka mazambi

⁸ Mwanangu, engisa gondo ya tate wako, kambe u nga leke sileleto sa mwamwako.

⁹ Nguko sona si na va m'bhoti wa wunene ha msungo kwako, ni wusekenya thamoni kwako.

¹⁰ Mwanangu, ngako vaonhi va txi ku kujetela, u nga va tumelele.

¹¹ Va txi kha vona: Tsimbila ni nathu, hi baramela vathu, hi duka vale vo pwata mnandu,

¹² a hi va miteni va txi hanya, ku nga ho va mayiva, votshe nga vale va relelako diphalani;

¹³ hi na mana totshe tixaka ta tithomba totshura; hi na tata tinyumba tathu ngu so handa;

¹⁴ tisa dikato dako hagari kwathu; hotshethu hi na abanelana ngu kudingana.

¹⁵ Mwanangu, u nga tsimbile navo ngu tinzila tawe; vayilelisa mkondo wako ka tisoko tawe.

¹⁶ Nguko minenge yawe yi tutumela to biha, kambe va kuluveta kutheketa mnoha.

¹⁷ Ngu ditshuri, mlawu wo riyelwa u txi wonwa ngu sinyana, kha wu vhuni txilo.

¹⁸ Se vona va riyela kutheketa mnoha wawe vapune; ve baramela wutomi wawe vapune.

¹⁹ Edo ngu dona ditshuri da vale va ti ningetetelako mu ko navela; kunavela ku na ñola dihika da vale va ku ni kunavela.

Txiziviso txa Wutxhari

²⁰ Wutxhari wa hombe wa kwangula hahanze; wa guleta dipswi da wona tinzilani.

²¹ Amu ku nga sengeletana vathu vavangi, da kwangula; amu sitaratoni ni sikenini ka madhoropa, wutxhari wa pfalisa mapswi a wona:

²² Anu siphukuphuku, mi na randa wuphukuphuku wanu kala yihi mbimo kani? Ni nanu vatseketseli, mi na randa kutseketsela kani? Se anu siphukuphuku mi na venga wuzivi kani?

²³ Hundulukani ngu mhaka ya kukawuka kwangu; wonani taku ni na thela moya wangu txitimwi kwanu, kambe ni na mi maha mi ziva mapswi angu.

²⁴ Ani ni mi dhani, aniko anu mi lambile; nguko ni nawulutile diwoko dangu, aniko kha ka maneka wo pfisisa;

²⁵ anu mi to khata kulamba sileleto sangu, kambe kha ma tumela kukawuka kwangu;

²⁶ se nani ni na mi seka ni ku mi poyilela kutimelani kwanu, na ku txi hoka ati ti no mi maha mi thava.

²⁷ Kuthava kwanu ku txi ta kufana ni mxaseli, ni xomulo yanu yi txi na mi timeta, ku txi ta tximwi kwanu kutxikwa, ni xomulo.

²⁸ Sekoko mi na ni dhana, aniko ani kha ni na mbi xamula; mi na ni lava ngu mabimbi-kutxa, aniko kha mi na mbi ni mana.

²⁹ Ngako mi nga venga wuzivi, kambe kha ma lava kuthava Mkoma;

³⁰ kha ma si lava sileleto sangu, kambe mi kanetile kotshe kulaya kwangu.

³¹ Ngu konaho, va na dya mihando ya mahanyelo awe, kambe va na khuriswa ngu sileleto sawe vapune.

³² Nguko avale vo pwata mapimo va na dawa ngu kutimela kwawe, se kuhumelela ka siphukuphuku ku na va fuvisa.

³³ Aniko awule a no ni engisa a na hanya ngu kutsana, kambe a na humula mu ko thava kubiha.