Matewu 28 - Bhiblia Yo Sawuleka

Kuwuka ka Jesu ngu ka vakufa

¹ Msana ka ditshiku da Sabbata, se i di mabimbi-kutxa ka ditshiku do khata ka divhiki, Mariya wa Magdhala ni mmwani Mariya, va tsute veya wona diyiva.

² Se ku txi khata kuzinginikela ka hombe ka mafu, nguko Ngelozi ya Mkoma yi ti txhikile ngu nzumani yi ta wumbuluta dirigwi, yi khalahatsha txitimwi ka dona.

³ Khohe ya yona yi ti khetima nga kukeluka ka nzuma, se tinguwo ta yona ti ti basile kufana ni hunguva.

⁴ Se vawoneleti, ngu ku yi thava va to dhuka va txi tsotsowolo nga va to fa.

⁵ Aniko ngelozi yi to womba ka vavasikati, yi txi kha yona: “Mi nga thaveni txilo, na tiziva ti to mi lava Jesu, awuwa a nga ti bethetwe ha txihambanoni.

⁶ Ene kha nga ho hawa, nguko a wukile nga ti a nga wombisa tona. Ngonani mi ta wona wukhalo wu Mkoma a nga ti vekilwe ka wona.

⁷ Kambe tsulani ngu kukuluveta mi ya gela vagondiswa vakwe, mi txi khanu: ‘Ene a wukile ngu ka vofa, kambe a na mi thangela kuya Galileya. Mi na ya mu wonela kona.’ Ngu toneto, ni nga ti lava ku mi gela.”

⁸ Se vona va di khukhile ha diyivani ngu kukuluveta, na va di tate ngu kuthava ni litsako la hombe, va to tutuma veya zivisa vagondiswa vakwe.

⁹ Konako Jesu a to huma e va txingameta, a txi khene kwawe: “Xeweni!” Vona va to tshuketa hafuhi kwakwe, ve mu demberela milenge yakwe, ve mu khizamela.

¹⁰ Sekoko Jesu a to va gela a txi khene: “Mi nga thaveni txilo, tsulani mi ya gela vanathu ti to ve tsula Galileya, va na ya ni wonela kona.”

Makuhu a vawoneleli

¹¹ Ngako vona va txi tsula, vamwani vawoneleti va to ya didhoropani, va txi ya zivisa vaphaxeli va hombe totshe ti ti nga humelela.

¹² Se ngako vaphaxeli va hombe va di sengeletani ni madhota a ditiko, ve maha navo txikungo, va to xavelela masotxhwa ngu male yayingi ngutu,

¹³ va txi va gela ku kha vona: “Wombani ku khanu vagondiswa vakwe va to ta ni wusiku, anu mi di otete, va ta mu pa.

¹⁴ Ngako ti txi hoka tiya tinzeveni ka mfumeli, hi na ya m'kholwisa, hi txi mi vhikela.”

¹⁵ Vona va to teka male ve mahisa tonti va nga leletiswa tona. Se mawombelo awa ma to hangalaka hagari ka Vajudha, ti wombiswa toneto kala ni nyamsi.

Jesu a txi woneka ka vagondiswa va digumi ni mmweyo

¹⁶ Vagondiswa va digumi ni mmweyo va to tsula Galileya, va txi ya mmangoni hawa Jesu a nga va leleta kona.

¹⁷ Mbimo yi va nga mu wona, va to mu khizamela, aniko vamwani ve khata kukanakana.

¹⁸ Jesu a to tshuketa hafuhi, a txi khene kwawe: “Ni ningilwe mtamo wotshe, nzumani ni ha mafuni:

¹⁹ Ngu toneto, tsulani mi txi ya phindula vamatiko votshe, ve maha vagondiswa vangu, mi va bhabhatisa ngu ditina da Tate, ni da Mwanana, ni da Moya wo Sawuleka,

²⁰ mi txi va gondisa kuvekisa totshe tiya ni nga mi leleta tona. Se wonani, ni ni nanu yotshe mbimo, kala kugumani ka mafu.”